Fiskihrellir bloggar

2011.

2011-01-11T12:40:00.000-08:00

Nýtt ár og nýr áratugur að auki eru gengin í garð.Hjá mér byrjaði þetta með guðsvelsignaðri pest á gamlárskvöld. Er að verða nokkuð góður eftir sýklalyf og inniveru. Annars gengur lífið sinn gang að venju. Við sunnlendingar að mestu leyti lausir við snjó og tíðin almennt ekki til að kvarta yfir. Það er rólegt yfir öllu hér í Ástjörn. Sjónvarpsdagskráin vonlaus eins og flesta aðra daga. Endalaust bandarískt rusl í boði. Yfirgengilegt metnaðarleysi á þeim bænum. Þetta versnaði um allan helming þegar ríkisútvarpið var gert að opinberu hlutafélagi. Allir nauðbeygðir til að greiða kostnaðinn hjá þessari leiðindastofnun. Mér kæmi ekki á óvart þó kötturinn fengi bráðum rukkun líka. Honum gæti sem best orðið á að kíkja á skjáinn.
Við höfum það annars ágætt saman, ég og Kolbakur minn. Ósköp ljúfur kisi sem vill helst halda sig nærri fóstra sínum eins og Kimi áður. Eins og ég hef svo oft sagt hér áður er enginn einn sem hefur lítið dýr hjá sér. Það er líka gott fyrir einbúa að þurfa að hugsa um eitthvað. Gera ráðstafanir ef farið er af bæ í lengri tíma. Það er reyndar orðið sjaldgæft í seinni tíð nema Veiðivatnatúr einu sinni á ári.
Þetta ár leggst bara nokkuð vel í mig. Verð löggilt gamalmenni í mars. Kemst þá á próventu hjá Steingrími J. Skerta, vegna nokkurra króna úr lífeyrissjóði. Norræna velferðarstjórnin hefur fryst tekjur öryrkja og gamalmenna ásamt því að miða persónuafslátt við sömu krónutölu og áður. Vísitalan má leika lausum hala á sumum sviðum en ekki öðrum. Allt annað hækkar. Bifreiðagjöld, bensínskattar, brennivín, tóbak og nefndu það bara. Allt er réttlætt með því að verið sé að taka til eftir íhald og framsókn. Það er m.a.s. eins og ráðherrar samfylkingarinnar hafi gleymt því að þeir sátu sjálfir í hrunstjórninni. Þetta er þó engin tiltekt. Sama spillta stjórnsýslan og bankakerfið enn gegnsýrt af spillingu og eiginhagsmunum. Vonandi líður ekki of langur tími uns kosið verður. Þá fær fjórflokkurinn þungan skell. Sem hann óttast nú meira en allt annað. Þá verður Steingrímur að draga gamla blágræna Volvóinn fram á ný. Enginn svartur ráðherrajeppi með bílstjóra og næs. Þetta kemur allt í ljós síðar.
Kolbakur kúrir hér á borðinu hjá mér. Tiltölulega spakur. Líklega í draumalandinu því lappirnar hreyfast með taktföstum hætti. Við sendum okkar bestu kveðjur, ykkar Hösmagi.

að verða

Desemberpistill.

2010-12-22T21:16:00.000-08:00

Óralangt síðan síðast. Það er eins og facebokk síðan hafi yfirtekið alla mína ritgleði. Þessi síða er þó aðgengileg enn og kannski ágætt að ljúka árinu með einum jólapistli. Klukkan er nú að ganga sex á Þorláksmessumorgni og pækillærið góða var að fara í ofninn. Það hefur margt á dagana drifið frá síðasta pistli. Gott og illt eins gengur í lífinu. Kimi minn er nú kominn á nýjar veiðilendur og það var mér afar þungbært. Þetta yndislega dýr kvaddi þennan heim þann 4. október. Skyndilega, eins og þegar hann kom inn í líf mitt þann 1. júlí 2005. Þau voru erfið sporin er ég fór og gróf hann í landi bróður míns morguninn eftir. Tómleiki og depurð. Maður stendur frammi fyrir staðreyndum og lífið heldur áfram. Það eru ekki ný sannindi fyrir mér. Þegar ég greindist með krabbameinið fyrir rúmu ári hugsaði ég til kisa míns. Hvað um hann yrði ef eg færi frá honum. Hann var mér alla tíð félagi og vinur. Ég hugsaði minn gang og mánuði seinna sótti ég annan kött suður í Hafnarfjörð. Ungur fressköttur fæddur 3. júní. Svartur að mestu með smá hvítan blett á bringu og kvið. Hann hefur aðlagast vel hér og framhaldið lofar góðu. Ég gaf honum nafnið Kolbakur og hann ber það með sóma.
Það má segja að barátta mín við meinið hafi gengið frábærlega og eins og nú horfir er ég á beinu brautinni. Hress og glaður yfir árangrinum. Lífslöngunin, baráttuviljinn og hjálpin frá góðum læknum og hjúkrunarfólki hafa fleytt mér yfir erfiðan tíma. Þetta ár hefur því að mörgu leyti verið mér ágætt þó það skilji eftir sig sorgina eftir Kimi. Allar góðu minningarnar um hann á ég áfram þó leiðir okkar hafi skilið um sinn.
Það voru vetrarsólstöður í fyrradag. Það eru alltaf tímamót desembermánaðar og mér mikils virði. Ég hef margsinnis minnst á gangrimlahjólið sem alltaf snýst með sama hætti. Kannski herðir það aðeins á sér með hverju árinu sem líður. Allt er afstætt. Mest er um vert að halda ró sinni hvað sem á dynur. Þessi eilífu viðmið sem mér hafa alltaf verið mikilvæg. Í gleði og sorg. Eftir hin válegu tíðindi þann 30. nóvember í fyrra hugaði ég ráð mitt. Kveikti mér í vindli og hugsaði. Kannski að ég ætti að fá mér í glas og slá þessu uppí kæruleysi. Ég sá fljótlega að nú þyrfti ég á öllum mínum mínum kröftum að halda. Lét glasið eiga sig og hætti að reykja þann 4. desember. Hvort tveggja skynsamlegt og örugglega hjálpað í baráttunni. Ég er líka sannfærður um að ég muni ekki byrja aftur að reykja. Ávinningurinn af því er stórkostlegur á svo mörgum sviðum að það flökrar ekki að mér að fá mér smók. Þó ég láti mig stundum dreyma og hlutir reki tímabundið á reiðanum þá hef ég oftast nægilega staðfestu til að komast fram úr vanda sem ég stend frammi fyrir. Það er gott og mikilvægt í hverri baráttu. Kolbakur snuddar nú hér á borðinu og heimtar athygli. Ekki alveg ókunnugt frá liðnum árum. Brakandi malið gefur til kynna að hann sé sáttur. Það gefur mér heilmikið. Við sendum ykkur bestu kveðjur, ykkar Hösmagi.

Haust.

2010-09-21T23:06:00.000-07:00

Það er komið haust og jafndægur á morgun þann 23. Veðrið er indælt, logn og hitinn 2.8 gráður. Ævintýraleg birta af fullu tungli. Ölfusá hálfdraugaleg að sjá í tunglsljósinu. Veiði þar lauk í fyrradag og varð heldur endaslepp eftir feykigóða byrjun. Mikil sólbráð og hiti, ásamt öskugráma stórspillti veiðinni. Samt veiddust 283 laxar og allnokkuð af góðum sjóbirtingi. Ég er sæll með mína 18 laxa og 2 sjóbirtinga. Mín besta veiði í mörg ár og að auki var Veiðivatnatúrinn ógleymanlegur. Nú hefst aftur nýr meðgöngutími. Ég hef gefist upp á Tangavatni. Var þar á laugardaginn. Að sögn hafði fiski verið sleppt þar daginn áður. Hann var samt hvergi sjáanlegur. Vatnið kólnaði eftir jarðskjálftana árið 2000 og kannski hefur jörðin gliðnað þannig að fiskurinn kemst í fylgsni þar sem útilokað er að komast að honum. Mér finnst þetta hálfsorglegt, því ég á margar skemmtilegar minningar frá þessum stað. Það er lítið skemmtilegt að leggja á sig ferðalög, borga veiðileyfi og svo er fiskurinn í felum. Nú er bara að þrauka og bíða eftir nýjum æfintýrum næsta sumar.Mánuður í formlegan vetur og lífið gengur bara sinn gang. Ágæt heilsa og ég hugsa lítið um meinið í brjósti mér. Ég fer í rörið á mánudaginn og svo í viðtal í október. Kvíði engu og vona það besta eins og jafnan fyrr. Það hefur löngum reynst mér heilladrjúgt.
Kisi liggur nú hér á borðinu og malar. Óskaplega sæll eftir að ég fann eina af hinum fornu flískúlum í gær. Dró ísskápinn fram til afísunar og þar leyndist ein undir. Svo var ég svolítið montinn með mig að hafa haft mig í þetta. Nú er skápurinn eins og þegar hann kom úr búðinni. Einbúinn verður að bjarga sér sjálfur með allt á heimilinu. Það gengur furðuvel á þessum bæ. Sem sagt allt gott héðan og við Kimi sendum kveðjur. Ykkar Hösmagi.

Langt blogghlé.

2010-08-16T05:54:00.000-07:00

Ég hef vanrækt þessa ágætu síðu lengi. Eiginlega skömm að því.Stundum gleymir maður börnunum sínum og það er að sjálfsögðu miður. Síðan síðasti pistill var ritaður hefur margt á dagana drifið.Og sem betur fer flest jákvætt. Heilsan er góð eins sumarið hefur einnig verið. Ég fór í segulómun 5. júlí og hitti svo krabbameinslækninn þann 13.Þá hafði æxlið enn minnkað og ég fer svo næst í ómun þann 27. september. Ég get ekki beðið um meira að svo stöddu. Líðanin ágæt og verkjatöflurnar eru bara í skápnum. Ég hef sannarlega unað glaður við mitt í sumar. Búinn að veiða 16 laxa úr Ölfusá og kom úr geysivelheppnaðri Veiðivatnaför á fimtudaginn var.Töfrar Veiðivatnanna óbreyttir.Við feðgar og langfeðgar veiddum óhemju vel. Slatta af bleikju og 141 urriða.Veðrið var líka dásamlegt svo það var ekkert sem skyggði á lífið og tilveruna.Held að við höfum allir komið heim endurnýjaðir á sál og líkama. Ég hef oft sagt það áður að rólyndi hugans er ofar öllu hjá mér. Það hjálpar líka til að halda hinni líkamlegu heilsu í lagi. Ég finn líka nálægð þess góða í kringum mig. Verndarenglarnir hugsa um sína. Og samvistirnar við kisa minn eru líka alltaf ljúfar.Hann varhúsvörður hér í 2 sólarhringa í Veiðivatnatúrnum. Ósköp kátur þegar fóstri birtist á ný. Lítið dýr á heimili getur gefið einstæðingi heilmikið. Það er sem sé allt gott af Hösmaga gamla. Nokkrir veiðidagar eftir enn þó blóminn úr sumrinu sé liðinn. Að áliðnum slætti er nærri aldimmt á kvöldin. Ég kvíði þó ekki haustinu eða komandi vetri. Gangrimlahjólið snýst með gamalkunnum hætti. Ég ætla að þegja um pólitíkina í þetta sinn. Lofa þó engu um framhaldið. Líður reyndar orðið langbest þegar hún er ekki á dagskrá. Við Kimi biðjum að heilsa ykkur öllum, ykkar Hösmagi.

Vor.

2010-05-18T23:04:00.000-07:00

Það hefur aldrei skeð áður að pistlarnir mínir hér hafi fallið niður í heilan mánuð.Kannski er ástæðan sú að maður fær útrás á facebook og Moggablogginu. Eitt tekur við af öðru og svo er í mörg horn að líta. Veðrið er indælt. Smásúld og hitinn 9 gráður. Miðvikudagur og lífið gengur sinn gang. Kisi minn lúrir hér á borðinu hjá mér. Hann fékk gjöf frá mér í gær. Veiðistöng. Hún er svona hálfur metri á lengd og línan annað eins. Á línunni er stór beita. Loðin mús með rautt trýni og bleik augu. Þetta finnst kisa óhemjuskemmtilegt tæki. Kemur með músina í kjaftinum og heimtar leiki. Brauð og leikir eru líka okkar ær og kýr.
Ég mun sitja heima í kosningunum eftir 10 daga. Dettur ekki hug að bera neina ábyrgð á einum einasta bæjarfulltrúa. Fráfarandi bæjarstjórnarmeirihluti er reyndar gjörsamlega glataður. Með menn eins og Jón Hjartarson innanborðs. Manninn, sem stakk loforðum sínum undir stól eftir síðustu kosningar. Óþarfi að standa við nokkur loforð þegar kalt mat hans sjálfs var að betra væri að svíkja loforð sín en að halda þau. Það eru svona menn sem verða til þess að fólk fær algjöran viðbjóð á pólitík. Á tímabili var ég að hugsa um að kjósa íhaldið í fyrsta sinn á ævinni. Eingöngu til að stuðla að því að bæjarstjórnarmeirihlutinn félli. Svo sá ég að mér. Ég get þá að minnsta kosti dáið án þess að hafa það á samviskunni. Syndir mínar nógar fyrir.
Enn hef ég ekki farið neitt með Herconinn. Kemur að því fljótlega. Ætla að rifja upp kynnin við ósa Ölfusár. Þar er von í hinum göfuga fiski, sjóbirtingnum. Ég ætla að stunda veiðina stíft í sumar. A.m.k. ef heilsan leyfir. Ekkert bendir til annars en að svo verði. Ég er aðeins á milli vita sem stendur. Líður ágætlega. Krabbameinslæknirinn dvelur nú í Danmörku. Ég fór í sneiðmyndatöku 30. apríl og hef bara óljósar fregnir af henni. Eftir krókaleiðum. Finnst svolítið slæmt að ná engu sambandi við þann sem átti að sjá um mig í fjarveru míns ágæta læknis, Hlyns Grímssonar. Á reyndar traustan bakhjarl hér austanfjalls, Óskar Reykdalsson. Prýðisdrengur, sem ég hef fullt traust á. Þetta skýrist allt á næstunni og ég er alltaf jafn bjartsýnn. Við Kimi sendum ykkur öllum bestu kveðjur, ykkar Hösmagi.

Borubrattir vinir.

2010-04-17T01:02:00.000-07:00

Við Kimi höldum okkur hér á kontórnum. Hann liggur í glugganum og lætur sig dreyma. Fallegt gluggaveður. Sól og svali. Gosmökkurinn liðast uppúr gíg Eyjafjallajökuls. Það er tignarleg sjón en samt vona ég að þessu gosi ljúki sem allra fyrst.Mig rámar í Heklugosið 1947 en þá var ég nýorðinn 3ja vetra gamall.Síðan þá hef ég upplifað u.þ.b. 2 tugi eldgosa. Mesta návígið var við gosið í Vestmannaeyjum 1973 en þar var ég í hálfan mánuð. Minnisstæður tími og enn heyri ég hvæsið í gígnum. Hluti af tilveru okkar er að búa á þessari eldfjallaeyju hér norður í Ballarhafi.Veðráttan og dyntir náttúrunnar eru samofin lífinu og því sem við tökum okkur fyrir hendur. Við verðum að sætta okkur við það.
Ég hef verið linur við þessa gömlu síðu mína. Finnst þó reyndar miklu vænna um hana en Moggabloggið og facebook. Reyndar að hugsa um að hætta við Moggabloggið. Einkum vegna þess að þar gilda ósanngjarnar reglur og bloggið er ekki blogg nema að hluta til. Þar er viss hópur með sérréttindi. Hópur fólks sem leyfir engar athugasemdir á eigin síðu en finnst sjálfsagt að troða skoðunum sínum uppá aðra. Menn á borð við Hannes Hólmstein, allmarga þingmenn og ýmsa aðra. Ég held að Mogginn sé deyjandi dagblað. Á tímabili var hann ágætur. Allt að því blað allra landsmanna. Nú er öldin önnur eins og í svo mörgu öðru.Ég ætla að láta mér það í léttu rúmi liggja.

Það er heilmikið að gera í fjölskyldulífinu. Nýbúið að ferma Egil sterka Magnússon. Faðir hans verður svo fertugur á miðvikudaginn og Eyþór bróðir hans er að ljúka stúdentsprófi. Hösmagi gamli reynir að taka þátt í öllu og það er bara indælt. Mér leist líka afar vel á Apótek Hafnarfjarðar þegar ég kom þar í marslok. Ég vona að þetta gangi vel hjá Magga mínum og er verulega stoltur af þessu framtaki hans. Ég vildi gjarnan hafa svona apótek hér á Selfossi. Þá myndi ég losna við að skipta við lyfjamafíuna sem hefur tröllriðið markaðnum hér allt of lengi. Kannski er það borin vona að við íslendingar getum lifað í sátt hver við annan.Rannsóknarskýrslan hlýtur þó að hreyfa við fólki. Ekki öllum að sjálfsögðu. Spillingin er yfirþyrmandi í pólitíkinni, öllu stjórnkerfinu og því miður er dómskerfið ekki undanskilið heldur.Sýslumenn, dómarar og embættismenn hafa eingöngu verið valdir eftir flokksskírteinum um langan aldur. Það kann ekki góðri lukku að stýra.Núverandi stjórnvöld eru í sama farinu. Á stuttum tíma hafa þau ráðið 52 einkavini sína á ríkisjötuna. Vini, vandamenn og jábræður. Það er skrautleg hjörð á beit á stjórnarráðstúninu. Stjórnskipunarlögin þverbrotin eftir þörfum. Mér finnst þetta afar sárt. Það var að vísu ekki annars að vænta úr ranni samfylkingarinnar. Sem, nóta bene, ber mikla ábyrgð á efnahagshruninu þó fólki á þeim bæ sé tamt að tala um hrunflokkana 2. Vg er ungur flokkur sem enga ábyrgð ber á því sem gerðist 2008. Flokkurinn sem ég hafði stutt frá stofnun hans 1999. Þar er enn mikið af góðu fólki sem ég treysti. En það er alþekkt að völd spilla. Ég vona að þeir sem þar hafa farið út af sporinu nái áttum. Þegar heiðarleikinn víkur er voðinn vís. Það eru gömul sannindi og ný.

Þetta er notalegur dagur og rólegheit framundan. Ég fer í nýja sneiðmyndatöku 30. apríl.Mér líður vel nú og er jafnbjartsýnn og jafnan áður. Hlakka til útiverunnar við veiðiskap og aðra yndislega iðju í sumar. Bráðum kemur betri tíð með blóm í haga. Bestu kveðjur frá okkur kisa mínum. Ykkar Hösmagi.

Ljúfur laugardagur.

2010-03-27T04:01:00.000-07:00

Vika liðin frá vorjafndægrum.Birtan ræður ríkjum. Hitinn er reyndar nýskriðinn uppfyrir frostmarkið svo það er eiginlega gluggaveður. Snemma morguns var hér 3ja stiga frost og norðangjóla. Það var bara hressandi að viðra sig. Raikonen tolldi þó ekki úti nema stutta stund. Betra að hlýja sér í nálægð fóstra síns. Nú safna ég veiðidögum eftir bestu getu. Það sem nú er í húsi í laxinum í Ölfusá er 1 dagur í júní, 7 í júlí og 7 í ágúst. Tveir sólarhringar í Veiðivötnum með sonum, sonarsonum og dóttursyni 10. - 12. ágúst.Þá eru uppi áform um að sækja nokkra fiska inná Arnarvatnsheiði en þangað hef ég aldrei komið. Ég hef aldrei verið staðráðnari en einmitt núna, að njóta komandi sumars til fullnustu. Ég verð að treysta á veðurguðina eins og aðrir og hef á tilfinningunni að það verði gott veður á ísaköldu landi sumarið 2010. Einhver gæti ályktað út frá þessu að ég telji þetta sumar mitt síðasta og því enn meiri ástæða til að nýta það vel. Því fer þó víðsfjarri. Ég er sannfærður um að ég er að komast yfir veikindi mín. Næsti mánudagur er lokahnykkurinn á geislameðferðinni. Það verður 55. ferðin mín til Reykjavíkur frá því þetta ferli byrjaði. Ég hlakka til mánudagsins og heimkomunnar. Þetta hefur tekið á og er mikið álag á gamlan skrokk. En þetta hefur líka gengið frábærlega vel.Það er eitthvað gott í kringum mig. Læknirinn minn og allar konurnar sem hafa snúsit í kringum mig þennan tíma hafa reynst mér ákaflega vel. Ég hef líka hitt fullt af fólki í svipuðum sporum og það er líka ágætt. Nú bíð ég bara rólegur næstu vikurnar og fer svo í aðra sneiðmynd. Nýt hvíldar um páskana og hugleiði lífið og tilveruna. Ekkert hefur haggað ró minni síðan þetta kom upp í haust. Það er mikilvægt að gera sér hlutina ekki erfiðari en þeir þurfa að vera. Ég hef líka verið afar heppinn. Þolað lyfin og geislana betur en margir aðrir þó ég gangi bara á öðru nýranu og hafi ekkert milta. Lífið heldur áfram og það er dásamlegt.
Kimi er farinn að hrjóta á teppinu hér fyrir aftan stólinn minn. Ég hyggst bregða mér út í búð í gjólunni.Það verður reykt nautatunga á borðum hjá mér í kvöld. Ódýr og ljúffengur matur. Á þriðjudag verður svo sameignleg máltíð hjá okkur Kimi. Humar á 5 ára afmæli þessa ljúfa vinar. Við sendum ykkur okkar bestu kveðjur, ykkar Hösmagi.

Þungameðferð.

2010-03-12T23:45:00.000-08:00

Þeir strjálast nú pistlar mínir hér. Svo sem nokkrar ástæður fyrir því. M.a. fer mikill tími í þungameðferðina á Landspítalanum.Ég hef nú lokið lyfjameðferðinni sem hófst 29. desember. Búinn að fara 24 sinnum í geislamaskínuna og þá eru 11 skipti eftir. Þetta er mikið álag á skrokkinn og svo keyri ég líka á milli Selfoss og Reykjavíkur. Daglega alla virka daga. Ég er þó ekki að kvarta. Þetta gengur með ólíkindum vel. Hef heyrt sögur af fólki í sömu stöðu sem er fárveikt á meðan á þessu stendur. Ég er bara svolítið dasaður stundum og tek nú bara eina og eina verkjatöflu annað slagið. Horfur mínar eru taldar mjög góðar. Ég lýk við geislameðferðina í marslok. Þá fæ ég 6 vikna frí frá þessum hernaði og að því loknu verður tekin ný sneiðmynd. Ég hef, allt frá því þetta kom upp, haldið ró minni og bjartsýni. Það fleytir mér langt og léttir þessa baráttu mikið. En barátta er það. Barátta fyrir lífinu sjálfu og mér finnst enn gaman að lifa þó árin telji.Það er örugglega rétt sem einn kunningi minn sagði við mig um daginn: Það er seigt í þér. Útlitið hefur áður verið dökkt en alltaf hef ég sloppið fyrir horn. Hið góða aldrei langt undan og ég er viss um að það er svo enn. Ég horfi fram á veginn þó óhjákvæmilegt sé að líta stundum um öxl. Nú er klukkan bara rúmlega 8 á laugardagsmorgni og orðið albjart fyrir nokkru. Rúm vika í jafndægur á vori og verðrið er dásamlegt. Öll veiðileyfi í Veiðivötnum í höfn og Ölfusárleyfin verða afhent í næstu viku. Sannarlega ætla ég að stunda þessa iðju stíft í sumar og vonandi fæ ég líka mörg sumur í viðbót. Jafnlyndið og rólyndið skipta sköpum. Ég þakka mínum sæla fyrir að hafa þrek til að höndla það. Ég þakka líka krabbameinslækninum mínum, Hlyni Níels Grímssyni, fyrir frábæra þjónustu við mig. Rólegur, yfirvegaður og fær læknir. Þegar nýja sneiðmyndin hefur verið tekin um miðjan maí verður tekin ákvörðun um framhaldið. Æxlið er á hröðu undanhaldi og kannski tekst að drepa það alveg með aðferðunum sem beitt hefur verið. Það er líka hugsanlegt að leifarnar verði skornar burtu. Það verður þó ekki gert nema talin verði ástæða til þess. Það liggur í augum uppi að það hlýtur að vera fólki áfall að greinast með krabbamein. En það vinnur enginn sigur með því að leggja árar í bát og gefast upp. Hösmagi er bara glaður og hress á þessum fallega morgni. Sannfærður um sigur í þessari orustu. Viði Kimi sendum öllum vinum okkar albestu kveðjur, ykkar Hösmagi.

Nepja.

2010-02-21T01:07:00.000-08:00

Svolítið kalt í morgunsárið á þessum fallega sunnudegi. Frostið um 5 gráður og gjóla af norðan. Bleik slikja á fjallinu góða og löngu orðið albjart. Kimi sefur í gamla tágastólnum og dreymir um mýsnar í haganum. Þær eru óhultar rétt á meðan.Nú hef ég lokið u.þ.b. einum fjórða hluta af geislameðferðinni á Lsp. Þetta gengur mjög vel og aukaverkanir í lágmarki. Ekkert mál fyrir mig að keyra á milli. Spáin út mánuðinn sýnir enga úrkomu svo þetta verður leikur einn. Þegar vikunni lýkur verð ég búinn með 14 skipti og svo verða ferðirnar í mars 21. Ég fer líka í lyfjagjöf einu sinni í viku og það má segja að þetta sé eiginlega fullt starf hjá mér. Ég er svo heppinn að hafa aldrei haft ofnæmi fyrir neinu. Nema náttúrlega Davíð, Halldóri og nokkrum öðrum. Sumir sem ganga í gegnum þetta verða fárveikir. Ég hef góða matarlyst og nota svo verkjatöflurnar suma daga en aðra ekki. Skal þó viðurkenna að ég verð feginn þegar þessu lýkur. Meinið verður myndað að nýju einhverntíma í mars. Kannski verður það fjarlægt með skurðaðgerð eftir allar árásirnar á það. Ekkert nema fullur bati kemur til greina. Lífsviljinn og baráttuandinn fyrir honum eru alveg óskertir. Ég er jafnbjartsýnn eins og ég hef alltaf verið. Hugarfarið skiptir miklu máli. Það hefur ætið fleytt mér langt. Þekki ekki hugtakið uppgjöf. Þrátt fyrir erfiðleika nýt ég lífsins eins og áður. Nú höfum við þraukað Þorrann og Góan byrjar ágætlega. Mánuður í vorjafndægur og bráðum byrjar hann að vaka á vötnunum. Sannarlega er ég ákveðinn í að njóta vorsins og sumarsins við útiveru, veiði og aðrar dásemdir. Gleyma pólitík og öðrum leiðindum sem mest ég get. Það er afar friðsælt hér í Ástjörn hjá okkur kisa mínum. Notalegt að hafa þetta dýr í grennd við sig. Ekkert þref né þras og við bætum hvorn annan upp. Sendum ykkur okkar albestu kveðjur með norðangolunni, ykkar Hösmagi.

Vor á miðjum vetri.

2010-02-10T03:00:00.000-08:00

Ég fór í fyrsta geislatímann á Lsp. í gær. Veðrið er ótrúlegt þessa febrúardaga 2010Við litli lansi vorum 50 mínútur í bæinn. Hann á sumardekkjunum að venju enda Hellisheiði eins og á sumardegi. Gott að geta sparað grænu þrumuna í góðu veðri og svo gripið til hennar ef veður verða válynd. Ég þarf á spítalann alla virka daga til 30. mars og mér reiknast til að það séu u.þ.b. 4.400 km. Bensínið að nálgast 200 kall svo það munar um hverja ferð. Það birtir með degi hverjum og meðan veðrið helst svona styttir það veturinn mjög. Áður en við verður litið kemur vorið á ný með öllum dásemdum sínum. Veiðileyfin fyrir sumarið bráðum klár og ég hef góða tilfinningu fyrir sumrinu.
Ég skrapp í héraðsdóm suðurlands í morgun. Mætti þar í nokkrum gjaldþrotaskiptamálum fyrir aðra lögmenn. Létt verk og löðurmannlegt. Á leiðinni þangað hlustaði ég á frétt um 2 norðmenn, karl og konu, sem voru handtekin í Leifsstöð. Þau voru klædd eins og geitaostsalar. Eins og lauksalarnir í sjóvarpsþáttunum Allo Allo.Það fylgdi reyndar ekki fréttinni hvernig slíkur klæðnaður lítur út. En árvökulir tollverðir sáu í gegn um þetta lið sem reyndust vera 2 englar helvítis. Svo kom heilmikil útlistun á hvað þetta hefði verið mikilvægt. Þessir andskotar hefðu getað spillt siðferðinu á Íslandi. Skilja mátti af fréttinni að hér mætti enginn vamm sitt vita. Silfurtært eðli og athafnir landans eru öllum ljós. Hér þrífast ekki glæpir eða spilling. Mér varð eiginlega hálfóglatt við að hlusta á þetta. Sérstaklega þegar ég hugsa til þess sem er að gerast hér einmitt þessa daga. Milljarðaþjófarnir eru að endurheimta fyrirtæki sín hverjir af öðrum. Þeir eru svo mikilvægir, gáfaðir og siðferðisstigið svo hátt að þeir eru bókstaflega ómissandi. Það virðist lítið gagna að hafa skipt hér um ríkisstjórn í fyrra. Sama svínaríið grasserar. Jafnvel sem aldrei fyrr. Stjórnin gerir minna en ekkert í að taka til. Hleður bara gæðingum sínum á garðann, sker niður heilbrigðiskerfið, lækkar laun og skattleggur almenning út yfir öll þolmörk. Þúsundir íbúða í uppboðsferli meðan skuldir glæpamannanna eru afskrifaðar sem aldrei fyrr. Það er svo illa komið fyrir þessari þjóð að væri ég ungur maður myndi ég sennilega stinga af héðan ekki seinna en strax í dag. Þetta er stjórnsnilld Jóhönnu og Steingríms. Velferðarþjóðfélag þeirra i hnotskurn. Nú hef ég aðeins traust á einum manni í íslenskum stjórnmálum. Ögmundur Jónasson hefur ekkert breyst. Sami raunsæi lýðræðissinninn og alltaf áður. Slíkur maður á aldeilis ekki uppá pallborðið hjá núverandi valdhöfum á þessu volaða útskeri.

Ég hlakka bara til að renna aftur í bæinn eftir hádegið. Ég þyrfti helst að hafa vængi og geta flogið þennan spöl í góðviðrinu. Líklega verð ég samt að halda mig við jörðina. Hef reyndar lengi verið jarðbundinn maður þó gott sé að vera örlítið dreyminn líka. Við vinirnir sendum kveðjur til alls góðs fólks, ykkar Hösmagi.

Skin og skúrir.

2010-01-25T22:35:00.000-08:00

Það er stundum ýmislegt skylt með veðrinu og mannlífinu. Skin og skúrir á báðum stöðum. Það var þannig hjá mér í gær. Rigningarhvolfur annað slagið utandyra og beinverkir innandyra. Komst þó vel fram úr deginum með verkjatöflunum, fór snemma í háttinn og svaf eins steinn. Mjög hress í morgunsárið og hlakka til dagsins. Veðrið kyrrt og sæmilega hlýtt og enn er hugurinn á reiki í kringum veiðiskap. Þrátt fyrir ærið verkefni í baráttunni fyrir betri heilsu gengur lífið sinn gang. Það er mikilvægt að láta ekki slá sig út af laginu og halda sínu striki. Nú fer aðalfundur stangveiðifélagsins að bresta á og þá þarf að velja sér veiðidaga. Sannarlega ætla ég að rótonum upp í sumar, bæði hér í Ölfusá, Veiðivötnum og vonandi víðar. Það er tilhlökkunarefni að væntanlega verðum við 6 saman gaurarnir í Vötnunum í sumar. Gamli Hösmagi, 2 synir, 2 sonarsynir og dóttursonurinn. Svo koma Ingunn Anna, Gústi og Hrafnhildur Kristín síðar.Fiskarnir verða sannarlega að vara sig. Ég ætla með nýtt leynivopn í Vötnin í sumar. Hef trú á að það geti hreinlega ekki brugðist. Það er algjört leyndó enn og ég ætla að fara með það alveg eins og mannsmorð á næstunni. Kannski fá innvígðir pata af því bráðum ef þeir biðja nógu fallega. Ég er eiginlega undrandi á sjálfum mér að hafa ekki reynt þetta áður.
Þó aðalstarf mitt um þessar mundir sé að hamast við að endurheimta mína góðu heilsu þá þarf líka að sinna hinum praktísku hlutum. Lífsbaráttan heldur áfram og skuldirnar gufa ekki upp. Eftir hrunið hefur verðtryggingin séð til þess að ég er aftur orðinn öreigi. Verðmæti íbúðarinnar minnkað og skuldirnar hækkað. Margir eru þó verr settir, því miður. Mér sýnist að þetta muni allt saman fljóta áfram hjá mér. Gamli Lancerinn, 19 ára, rann í gegnum skoðun í gær og græna þruman þarf ekki skoðun fyrr en á næsta ári. Í fyrradag hafði þessi eðalvagn verið í eigu Hösmaga ehf í nákvæmlega 4 ár. Ótrúlegt en satt. Enn sem ný og aðeins ekin rúmlega 8.000 km. pr. ár.
Það er ró og friður yfir okkur Kimi á þessum ljúfa vetrarmorgni.Eftir útiveru og æfingar á handriði svalagangsins hefur Kimi misst meðvitund á ullarteppinu góða. Teppinu, sem þau Helga og Sölvi gáfu mér í hinni eftirminnilegu Edinborgarheimsókn um jólin 2004. Við, þessir vinstrirauðhausar, sem ekki þolum óréttlæti, sendum öllum okkar vinum bestu kveðjur, ykkar Hösmagi.

Vellíðan.

2010-01-17T08:50:00.000-08:00

Veðrið er gott á þessum 17. degi janúarmánaðar. Kimi þrífur klær sínar eftir útiveru í blíðunni. Enn vel sauðljóst þó klukkan sé að verða 5. Mikil rólegheit yfir tilverunni hér í Ástjörn 7. Nú hafa verkjatöflurnar fengið frið í glösum sínum í 4 daga. Það er að sjálfsögðu frábært og bendir til að allt sé á réttri leið. Ég fer í næstu lyfjagjöf á spítalanum á miðvikudaginn kemur. Kvíði því ekkert og er viss um að ég fer létt með það. Lyfin gera að vísu árásir á fleira en æxlið utan á vinstra lunganu. Nú er bara dagaspursmál þangað til ég fer að líkjast sköllóttu steratrölli.Hárið er sem sagt komið á flótta frá höfðinu. Líklega hverfur skeggið líka. Ég ætla þó ekki að láta sauma á mig hauspoka. Þetta verður bara tímabundin fórn. Svo fæ ég kannski aftur mitt dimmrauða skegg. Aðalmálið er að ég ætla með góðri hjálp að ganga að þessu meini dauðu. Ég á svo mikið ógert enn. M.a. verulegt fiskidráp á næstu sumrum. Svo á ég eftir að skammast heilmikið í pólitíkinni. Bæjarstjórnarkosningar í vor og margt bendir til að það verði miklar breytingar hér í Árborg. Ég hef lengi verið þeirra skoðunar að flokkapólitíkin skipti miklu minna máli í sveitarstjórnarkosningum en kosningum til Alþingis. Ég er svo sem óráðinn enn hvað ég muni gera. Nema það er alveg ljóst að ég kýs ekki núverandi meirihlutaflokka.Ég er viss um að nú væri jarðvegur fyrir nýtt skemmtilegt sprengiframboð. Ég bíð. Den tid, den sorg. Kannski verður af þjóðaratkvæðagreislunni. Þessu vonda máli verður að ljúka einhverntíma. Ég vil ekki samþykkja þessar drápsklyfjar sem að mestu munu lenda á barnabörnum okkar. Ég er þó á báðum áttum. Mig langar eiginlega ekki að segja nei heldur. Það mun populistinn á Bessastöðum telja stuðning við sig. Hann getur þó enganveginn falið slóð síðustu ára í blindri þjónkun við glæpamennina sem eiga alla sök á icesave málinu. Við þurfum nýjar leiðir. Nýja stjórnarskrá sem tekur þetta vald af þessu puntembætti. Vald, sem þjóðin fær án atbeina eins manns. Þetta er vel hægt þó það hafi ekki tekist áður. Þetta þarf að gera strax því núverandi húsbóndi á Bessastöðum mun verma þar stóla í 30 mánuði í viðbót. Það sem hann er að gera núna er fyrst og fremst í eigin þágu. Við skulum ekki láta hann komast upp með mikið meira. Íhald og framsókn hampa forsetanum nú. Við vitum nákvæmlega af hverju. Þeir vilja komast aftur að kötlunum. Látum það heldur ekki verða.

Á eftir skipti ég afganginum af harðfiskinum milli okkar heimilislimanna. Í gær las ég bók Hrafns Jökulssonar, Þar sem vegurinn endar. Ákaflega ljúf aflestrar, lýrísk á köflum og hreyfir við hjartanu. Er svo byrjaður á Hótel Californíu eftir Stefán Mána. Lofar góðu. Við rauðliðar sendum ykkur okkar bestu kveðjur úr blíðunni, ykkar Hösmagi.

Einn er upp til fjalla,....

2010-01-06T23:21:00.000-08:00

öllu viti fjær. Skrýtinn karl með skalla, skerpir gular klær. Nei, þetta á ekki við Steingrím J. þó upphaflega hafi ég verið að snúa út úr kvæði þjóðskáldsins um rjúpuna sem gæðakonan góða greip svo fegin við. Steingrímur var í viðtali við Sigmar í gærkvöldi. Það var engin bilbugur á karlinum og mér virtist hann mjög jarðtengdur í þeirri nýju stöðu sem upp kom þegar ÓRG neitaði að undirrita lögin um ríkisábyrgðina.Það er lán þessarar stjórnar að fjármálaráðherrann er andlit hennar miklu fremur en forsætisráðherrann. Ég er reyndar ekki alveg hlutlaus sem fyrrum flokksmaður og samherji Steingríms.Ég hef gagnrýnt hann mjög harðlega síðustu mánuði og að sjálfsögðu alls ekki sáttur við mjög margt af því sem hann hefur staðið fyrir að undanförnu. Samt sem áður erum við heppin að hafa þennan kjaftfora sveitamann í broddi fylkingar nú á efiðum tímum í sögu okkar. Ég vil ekki níða skóinn af Jóhönnu en það sjá það margir, líka fólk í SF, að það er miklu heppilegra að beita Steingrími fyrir vagninn í baráttunni sem framundan er. Mikilvægast af öllu er að íhald og framsókn nái ekki að skjóta sér til áhrifa. Við vitum nákvæmlega hvað það þýðir. Það versta úr hægri stefnu beggja flokka mun ríða húsum á ný. Fólk hefur vonandi ekki alveg gleymt draugnum og yfirnagaranum sem henti 300 milljörðum út um gluggann rétt fyrir hið endanlega hrun sem þeir félagar voru aðalhöfundar að.Þó þessi ríkisstjórn sem í upphafi vildi kenna sig við norræna velferð hafi valdið mér vonbrigðum á mörgum sviðum þá er alveg ljóst að nú er ekkert skárra í stöðunni en að hún sitji áfram. Ég vona að Steingrímur breyti um taktík. Reyni að ná sáttum við Ögmund og slaki á þumalskrúfunum sem hann festi á Guðfríði Lilju og Ásmund Einar Daðason. Það kemur líka sem betur fer að því að við losnum við populistann sem nú er húsráðandi á Bessastöðum. Manninn, sem árið 2005 sagði útlendingum að þeir hefðu nú lítið séð enn af snilld vina sinna. Mannanna, sem í krafti verka formanna íhalds og framsóknar hafa rústað þjóðarhag og í raun gert alla íslendinga gjaldþrota. Ég ætla að fylgjst grannt með næstu daga og vikur. Þó ég hafi verið orðinn leiður á pólitíkinni eins og svo margir aðrir þá má alls ekki leggja árar í bát. Andvaraleysi gagnvart íhaldi og framsókn má ekki rugla dómgreindina sem þó er eftir.

Það er lognblíða og við Kimi báðir hressir með það. Jólum formlega lokið og nú fer að birta smátt og smátt. Verkurinn út í vinstri handlegginn er horfinn. Það er góðs viti. Aukaverkanir af lyfjagjöfinni eru smámunir einir miðað við marga í sömu stöðu og ég er í. Hið góða er nálægt mér. Ég finn það og það styrkir mig mjög í baráttunni við þetta vonda mein. Næstu mánuðir verða baráttutími. Ég er tilbúinn og ákveðinn í að vinna sigur. Uppgjöf kemur ekki til greina. Ég hlakka til vorsins og sumarsins eins og áður. Kannski aldrei meira en einmitt nú. Bestu kveðjur frá okkur Dýra, ykkar Hösmagi.

Blikur á lofti.

2010-01-03T00:10:00.000-08:00

Enn er nýtt ár gengið í garð. Einhvernveginn komumst við í gegnum árið 2009 þó margt hafi verið okkur mótdrægt.Margir eru þó enn í algjörri afneitun. Megnið af sjálfstæðis- og framsóknarmönnum eru í þeim hópi. Þrátt fyrir lítið dálæti mitt á núverandi stjórnvöldum væri það allraversta að þessir flokkar kæmust aftur til áhrifa í bráð. Þá fyrst gætum við farið að biðja fyrir okkur. Andi Davíðs svífur enn yfir sjálfstæðisflokknum. Gömlu íhaldsmennirnir munu aldrei læra neitt. Aldrei viðurkenna óumdeilanlegar staðreyndir. Og margt af unga fólkinu í flokknum er á sama rólinu. Framsókn er ekki trúverðug heldur. Arfur Halldórs markar flokkinn enn. Það er ekkert eftir af hinum gömlu gildum þessa flokks. Það má segja að erindið sé þrotið og ekki myndu margir sakna flokksins þó hann liði undir lok. Það er margt sem bendir til þess að átakatímar séu framundan í pólitíkinni og vandséð hvað verður á bráðanæstunni. Kannski er ekki rétt að afskrifa þessa stjórn strax. Stjórnina, sem vill kenna sig við norræna velferð þó lítil merki sjáist um það. Ef stjórnin hefur sig í að snúa sér að aðstoð við heimilin í landinu á þann veg sem fólk vænti eftir síðustu kosningar á hún sjens. Þetta er vel hægt og augljóst að verði það ekki gert mun fara afar illa fyrir mörgum. Steingrímur sagði fyrir kosningar að hann vildi afnema verðtrygginguna. Hann hefur reyndar gert það að einu leyti. Það er búið að afnema vísitölutrygginguna á persónuafslættinum. Stórbrotnar efndir á kosningaloforði eða hitt þó heldur. Það versta við þessi stjórnvöld er valdahrokinn.Deilum og drottnum hvað sem skömm eða heiðri líður. Það hefur hvergi gefist vel að stjórna með þessum hætti. Það vantar líka viljann til að gera upp við fortíðina. Spillingin grasserar enn. Einkum hefur Samfylkingin raðað gæðingum sínum á jötuna. Stjórnsýslulögin þverbrotin daglega. Flokksskírteinið gerir þig hæfan. Hreingerningar er ærin þörf og það strax. Líklega getur maður bara vonað og það er þó jákvætt að geta leyft sér það.

Fyrir mig persónulega verður nýja árið ár baráttu og vonar á fleiri sviðum. Ég er byrjaður í lyfjameðferðinni við meininu efst í vinstra lunganu. Síðan tekur 7 vikna geislameðferð við. Ég held ró minni og bjartsýni. Treysti á hið góða og að lukkan verði mér hliðholl áfram. Ég mun aldrei gefast upp enda engin ástæða til þess. Við eigum frábæra lækna hér á landi og sem betur fer fá margir bata nú sem litla möguleika áttu fyrir nokkrum árum. Það er líka gott að finna samkenndina frá börnum mínum, systkinum og fjölda af öðru góðu fólki. Ég hlakka til dvalar á bökkum Ölfusár og fleiri veiðilendna á næsta sumri. Ástin á lífinu er söm og áður og því fær ekkert breytt. Þrátt fyrir blikur á lofti held ég vonglaður og bjartsýnn inní nýja árið. Það mun örugglega fleyta mér langt. Bestu kveðjur frá okkur Kimi, ykkar Hösmagi.

Fimm ár og fimm dagar.

2009-12-26T00:28:00.000-08:00

Ég átti 5 ára bloggafmæli á mánudaginn var. Sólstöðudaginn sjálfan.Skáldið mitt kynnti mig fyrir þessari veröld útí Edinborg í hinni ágætu íbúð við Lögmannastræti.
Þessi pistill er númer 667. Nokkuð dregið úr skrifunum hér eftir að ég fór að skrifa á Moggabloggið og svo bættist facebook við í október s.l. Mér finnst þó enn vænt um þessa síðu. Ekki síst vegna upphafsins. Það var rétt áður en heimsvaldaflensan lagðist yfir mig. Þetta var árið 2004. Árið sem Þorláksmessa hvarf og ég reis upp frá dauðum um hádegi á aðfangadag og átti yndisleg jól með Helgu og Sölva. Skáldið tók til sinna ráða og lífgaði mig við með Day Nurse. Kraftaverkalyfi, sem er bannað á Íslandi. Ég mun örugglega bæta við pistlum hér annað slagið. Skrifa um það sem mér dettur í hug, heimsins gagn og nauðsynjar. Pólitíkin á ekki beinlínis uppá pallborðið hjá mér nú um stundir. Lífsskoðanir mínar hafa þó ekkert breyst.Vonbrigðin með núverandi ríkisstjórn eru reyndar nokkur en þó ekki eins mikil og tilefnið gefur til. Ég bjóst ekki við miklu vegna þess hvað flokkarnir eru ólíkir.Og ekki breyttu kosningaúrslitin neinu um álit mitt á íhaldi og framsókn. Afar raunalegt að fylgjast með þessum flokkum á þinginu um þessar mundir.Þó skipt hafi verið um forustu breytir það engu um gerðir þessara flokka. Sporin hræða og málflutningur Sigmundar, Höskuldar og Bjarna Ben er brjóstumkennanlegur. Jóhanna orðin þreytt og ætti alls ekki að standa í þessu lengur. Það versta er meinloka Steingríms í icesave málinu. Málflutningur hans mér óskiljanlegur. Hann virðist vera í herkví og reynir að halda samflokksmönnum sínum sem eru honum ósammála í skefjum með öllum tiltækum ráðum. Það er arfaslæmt og vitlaust. Lengi skal manninn reyna og álit mitt á Steingrími, mínum fyrrum uppáhaldsstjórnmálamanni er í lágmarki.Sérstaklega er athyglisvert hvernig hann hefur komið fram við fyrrum vopnabróður sinn, Ögmund Jónasson. Tók m.a. undir lygarnar um að Ögmundur hefði flúið vandamálin í heilbrigðisráðuneytinu. Allt heiðarlegt fólk veit þó betur. Jóhanna rak Ögmund úr þessari " norrænu velferðastjórn" af því hann undi ekki tvíræði hennar og Steingríms. Skoðanakúgun og andlegt ofbeldi eru ekki góð tæki í pólitíkinni. Þau Steingrímur og Jóhanna vilja kúga aðra til að samþykkja ríkisábyrgðina á icesaveþrælaböndunum. Fjötrum, sem mjög miklar líkur eru á að geri þessa þjóð gjaldþrota. Hræðsluáróðurinn notaður til að kúga þingmenn til að samþykkja að greiða einkaskuldir sjálfstæðisflokksins svo við " komust áfram". Áfram hvert? Inní ESB? Eða fram af bjargbrúninni? Eða hvoru tveggja? Það er vitað að mikill meirihluti þjóðarinnar er á móti þessari nýju ríkisábyrgð. Steingrímur og Jóhanna vita það líka. Valdafíknin, forræðishyggjan,draumórarnir og misráðin vissa um eigið ágæti knýja þetta par áfram. Vonandi tekst á síðustu stundu að fella þetta frumvarp. Er ekki nær að við herðum sultarólina nú en að börnin okkar og barnabörn, fædd og ófædd, geri það? Þetta er bara hundfúlt allt saman.

Kimi sefur á bakinu með kviðinn upp á gamla tágastólnum. Mikil kyrrð, hitinn rétt undir frostmarkinu úti en hlýtt og notalegt hér inni hjá okkur.Ég er íklæddur flotta náttserknum sem Hrafnhildur Kristín, Helga og Sölvi gáfu mér í jólagjöf. Buxur í stíl fylgdu. Ég gæti sem best farið á ball í þessu dressi. Virkilega töff og smart. Afar rólegur jóladagur hjá okkur kisa. Saltlæri með baunum og kartöflum. Rúgbrauð og jólasíld og svo humar fyrir Kimi. Loftið hér miklu betra eftir að reykurinn var gerður útlægur. Það verður væntanlega sama letilífið á okkur í dag. Við eigum svo von á Helgu, Sölva og litlunni, HKR, í dag eða á morgun. Þá verður etinn reyktur sauður úr Selvoginum. Við sendum öllum vinum okkar albestu kveður, ykkar Hösmagi.

Kastljós.

2009-12-19T03:28:00.000-08:00

Það var gaman að fylgjast með hluta af kastljósi gærkvöldsins. Flott viðtalið við Sölva og Yrsu. En það var heldur verra að fylgjast með sumu öðru.Það er eins og engin takmörk séu stundum í lágkúruskapnum. Féttin um ölvun Ögmundar Jónassonar var hreinlega fyrir neðan allar hellur. Það bendir ekkert, nákvæmlega ekkert, til þess að minn ágæti þingmaður og skoðanabróðir, Ögmundur, hafi verið fullur á Alþingi í gær. Fullur eða ölvaður. Hann vildi einfaldlega ekki veita sjónvarpinu viðtal eftir að hafa drukkið hvítvín með matnum. Og hvað með það? Það var mikið gert úr því að hann hefði greitt atkvæði í þinginu eftir að hafa fengið sér í glas með matnum. Ekkert má nú. Mér finnst nú ekki tiltökumál þó fólk bragði aðeins á veigum í öllum leiðindunum og flatneskjunni á þinginu um þessar mundir. Ögmundur kom líka heiðarlega fram og sagði Sigmari eins og var. Og Sigmar var svo heiðarlegur að hlaupa með þetta hreinskilna svar í kastljósið til að gera lítið úr Ögmundi.Ég hugsa að þetta hafi verið gert í fljótræði og algjörlega vanhugsað. Ég gef Sigmari annan séns enda oftast ágætur sjónvarpsmaður. Sölvi var auðvitað langflottastur þarna í gærkvöldi. Svo er hann líka verðandi múltimilli svo það er nú aldeilis ekki alveg ónýtt að þekkja hann. Bróðir hans strax farinn að hefja hann upp til skýjanna. Ég er viss um að danirnir verða hrifnir og þá er brautin rudd til fleiri landa.
Nú hefur hann fryst en lognið er enn til staðar. Gaman að viðra sig í lognkælunni í morgun og nú er ég sjálfur hættur að menga með tóbaksreyknum. Ef ég hefði keypt mér meira tóbak eftir að ég kom heim af spítalanum þann 5. des væri upphæðin komin í um 20.000 kr. Ég er bara andskoti ánægður með að hafa kvatt reykinn. Bravó fyrir sjálfum mér.

Lærið er nú komið í pækilinn. Fæ svo sauðinn í dag eða á morgun svo ég fer að verða brynjaður matvælum til jólanna. Fer minn venjulega rúnt á aðfangadag og svo heim aftur á jólanótt og leggst í bækur og leti. Við Kimi ætlum að hafa það svakalega rólegt um jólin. Fáum okkur samt smágöngutúr, étum, sofum og étum svo meira. Biðjum að heilsa, ykkar Hösmagi.

Yndisauki.

2009-12-14T00:10:00.000-08:00

Það var sannkallaður unaður að bregða sér út í morgun. Hitinn 9 gráður og ekki bærðist hár á höfði.Svaladyrnar standa opnar og stór fiskifluga er á sveimi í stofunni. Eins gott fyrir hana að Kimi er utandyra að hnusa af góðviðrinu. Nú nýtur maður blíðunnar enn betur en áður. Enginn reykur og nú eru 10 sólarhringar liðnir í betra lofti. Sem betur fer reynist mér þetta fremur auðvelt. Ég gríp þó í tyggjóið annað slagið en það ætla ég ekki að gera til langframa. Þetta er búin að vera afar róleg helgi hjá okkur Kimi. Ég tók svefnherbergið og baðherbergið í gegn í gær og er andskoti ánægður með mig. Ég er jafnvel að hugsa um að bregða mér í Tangavatn einhvern næstu daga. Herconinn verður örugglega til í það. Tæp 12 ár frá stórveiði minni þar þann 20. desember 1997. Fiskurinn í vatninu er af stofni Veiðivatnaurriðans og er alveg prýðisgóður. Ég er búinn að kaupa nokkrar jólagjafir, byrjaður á jólakortunum og svo þarf fljótlega að huga að saltlærinu. Hinu eina og sanna jólalæri. Búið að reykja sauðinn úr Selvoginum svo það verður eitthvað hér á borðum um jólin. Kimi er reyndar ekkert fyrir hangikjöt en hann fær humar í jólamat.Hann er aldeilis búinn að njóta undanfarinna daga. Talsvert útivið og liggur svo gjarnan í glugganum með trýnið út í blíðuna. Ég held mínum áralanga vana sömuleiðis með útiveru á morgnana.
Síðustu dagar móður minnar eru nú loks fáanlegir á Selfossi. Það hefur sannarlega glatt mig einlæglega hvað þessi bók fær frábæra dóma. Gott að svo margt fólk skuli nota jafn mörg sterk orð til að lýsa ágæti þessarar sögu. Með allri virðingu fyrir öðrum nýútkomnum bókum. Skáldið mitt getur sannarlega verið stolt af þessu verki og vonandi verður umfjöllunin til þess að sem allra flestir lesi það. Sjálfur ætla ég að lesa það aftur bráðlega.

Þó myrkrið sé svart þessa dagana er tilveran ágæt í svo dásamlegu veðri. Engin merki enn um byl né hríð. Aðeins 18 dagar eftir af árinu og vonandi ber nýja árið hið góða í skauti sér. Við félagar og stórvinir sendum ykkur okkar bestu kveðjur, ykkar Hösmagi.

Eitur.

2009-12-08T01:16:00.000-08:00

Ég er búinn að reykja í 45 ár. Síðustu 38 árin hef ég reykt Bagatello. Danska vindla sem eru nú andskoti góðir. Þegar vinir mínir hafa talað um að ég ætti að hætta að reykja hef ég stundum sagt að lífsnautnamaður sem er hættur að nota áfengi og nennir varla að eltast við pils lengur verði nú að hafa eitthvað eftir til að hugga sig við.Nú er ég þó einfaldlega hættur að reykja. Það er bara ný staðreynd og ég er glaður með að hafa tekið þessa ákvörðun. Ég geri hlutina stundum svona. Dríf í þeim og punktum og basta. Ég sakna að vísu vindlanna minna ennþá. Það er eðlilegur hlutur og ég er að tyggja nikótín mér til hugarhægðar þessa dagana. Ég er samt strax farinn að græða á þessari ákvörðun. Hver vindill kostar 67 krónur og fimmtíuaura og oft reykti ég 20 stykki á sólarhring. 1.350 krónur x 365 gera 498.225 krónur. Þó krónan sé ekki burðug má þó gera ýmislegt fyrir hálfamilljón. Ávinningurinn er þó miklu meiri en þessi hálfa milljón. Loftið verður betra, svefninn, matarlystin og líkaminn verður örugglega feginn líka. Þetta er sem sagt hið besta mál. Ég ætla þó ekki að gerast predikari gegn tóbakinu. Ég tek ákvörðun fyrir mig og ætla að láta aðra ráða fyrir sig. Steingrímur garmurinn missir einn tóbaksþrælinn frá sér og nú ulla ég bara á nýjar álögur á vindlana mína. Ég ætla að vera andskoti ánægður með sjálfan mig yfir þessum nýja lífsstíl. Kannski ég gerist bara skjortejæger á ný? Aldrei að vita hvað framtíðin ber í skauti sér.

Við Kimi erum slakir og rólegir heimavið. Nokkrar mislitar perur farnar að loga hér innanhúss. Rólyndisveður þó myrkrið grúfi yfir. Það er mjög góð veðurspá svo langt sem hún nær. Það léttir lund og gleður sál. Nú bíð ég eftir að heyra frá spítalanum. Ég er í startholunum en slakur og rólegur áfram. Allt hefur sinn gang. Rólyndið og jafnlyndið sem mér hefur svo oft verið tamt að tala um hér ríkir og þá ganga hlutirnir vel. Við rauðliðarnir sendum ykkur öllum bestu kveðjur, ykkar Hösmagi.

Stund milli stríða.

2009-12-06T05:11:00.000-08:00

Við Kimi erum hér heima í rólegheitunum.Tæplega bloggfært vegna náinnar nærveru þess rauðbröndótta. Ég kom heim af LS seinnipartinn í gær. Allt gekk nokkuð vel og ég verð allavega heima þessa viku. Kisi varð harla hress þegar undirritaður birtist í gær og við höfðum það gott hér fram eftir kvöldi. Veðrið er dásamlegt og mikið af snjónum hefur tekið upp. Rétt rúmur hálfur mánuður í vetrarsólstöðurnar og þá fer aftur að birta. Það var svolítið skrítin tilfinning að yfirgefa spítalann í gær. Vindlarnir voru í vasa mínum og að sjálfsögðu langaði mig í vindil. Ég ákvað að bíða uns heim kæmi. Einhvernveginn tókst mér að þrauka gærkvöldið af vindlalaus. Ég var búinn að ákveða að hætta að reykja þann 31. janúar á næsta ári. Ef ég tel í klukkutímum þá eru nú 54 tímar síðan ég drap í á lóð spítalans. Það er að koma upp í mér þrákelkni. Ég get hætt. Ég finn það og veit það.Ég ætla að reyna þó ég viti að ég geti fallið. Það vinnst margt við að leggja vindlana til hliðar. Betra loft hér,betri heilsa til frambúðar og svo kosta vindlarnir sitt. Allavega er tilraun hafin og ég vona að þetta takist. Pistlar mínir hér hafa strjálast að undanförnu. Kannski er nú líka fullmikið að vera á fésinu og með 2 bloggsíður. Nú eru að verða 5 ár síðan ég byrjaði úti í Edinborg og oft haft gaman af þessu. Ég hef oft bloggað um pólitíkina. Nú um stundir er ég svo yfirmáta leiður á íslenskum stjórnmálum að það hálfa væri nóg. Örugglega langbest að setja þau á frost í bili og sjá bara til hverju fram vindur. Ég hef líka ævinlega rekist illa í flokkspólitík og farið mínar eigin leiðir. Sólin skín og góða loftið írist inn um gluggann. Við Kimi sendum bestu kveðjur, ykkar Hösmagi.

Myrkurkyrrð.

2009-11-22T22:49:00.000-08:00

Kimi hamast við að þrífa sig. Situr í glugganum og lítur annað slagið út í vetrarmyrkrið. Jólaljósin eru reyndar komin upp nokkuð víða.Ég ætla líka að vera fyrr á ferðinni en venjulega með nokkrar perur. Maður birtunnar sem jafnan fyrr. Helgin hefur verið róleg. Ég vona að mér fyrirgefist að hafa sofið af mér útgáfuteiti skáldsins míns á laugardagskvöldið. Vaknaði þegar það var að byrja.Brjóstverkurinn hrjáir mig enn og ég reikna með að fara 5tu ferðina á Borgarspítalann í vikunni.Ég ætla mér að ná góðri heilsu á ný.Enginn bilbugur á mér hvað það varðar. Þrátt fyrir kreppu og misvitra stjórnmálamenn er lífið enn skemmtilegt. Margir óveiddir fiskar. Nýjasta viðurnefni mitt, tengt fiskum, er Lúðuhrellir. Mér áskotnaðist það í áritun skáldsins á Síðustu daga móður minnar. Ég held líka að ég hafi hrellt stóra lúðu úti á Faxaflóa síðastliðið sumar. Hún hefur stækkað síðan og verður enn stærri þegar ég næ henni næsta sumar.Þá verður hægt að blása til lúðuveislu á svölunum í Ástjörn 7. Grilluð lúða og nokkrir dropar af Stroh með.Það er aldrei of seint að halda innflutningspartý. Kimi verður heiðursgestur á eigin heimili og fær humar en ekkert Stroh. Er þetta ekki bara myljandi góð hugmynd?

Það er smágjóla af norðan. Engin merki um snjókomu á næstunni og því varla hægt að kvarta neitt.Við Kimi höldum okkur inní hlýjunni og bíðum birtu dögunar.Viðgerð á grænu þrumunni loksins áformuð eftir óhappið um daginn. Afturljósið komið frá USA. Þessi eðalvagn verður ánægður eftir meðhöndlun Helga Sigurðssonar sem er afar flínkur bílameistari. Við vinirnir, þessir rauðu, sendum bestu kveðjur, ykkar Hösmagi.

Síðustu dagar.......

2009-11-16T00:53:00.000-08:00

móður minnar er góð bók. Ég er reyndar ekki alveg hlutlaus dómari.Skáldið mitt gaf mér bókina á mánudaginn var. Áritunin ákaflega falleg og gladdi gamlan föður. Ég hef hugsað margt við lestur bókarinnar. Þó ég hugsi orðið að mestu framávið núorðið er líka óhjákvæmilegt að horfa stundum til baka. Þegar mér var tilkynnt fyrir rúmum tveimur árum að ég væri með krabbamein var fyrsti þankinn sá að ég yrði að skipuleggja það sem ég þyrfti að gera áður en ég myndi deyja.Svo fór ég í ríkið og náði mér í öl og snafs. Samt langaði mig eiginlega ekkert í áfengi. Það fór líka svo að þetta varð ekki stórdrykkja. Ég einbeitti mér að batanum. Og þegar ég kom heim af spítalanum keypti ég mér nýjan flatskjá fyrir jarðarfararpeningana. Ég hef líka farið miklu lengra til baka. Til mánaðanna desember 1985 til maí 1986. Þá lá ég tíðum á dauðadeildinni 11 G á landsspítala. Kynntist þar mörgum sem voru að deyja. Ég undraðist æðruleysi þessa fólks og það kenndi mér margt.Það besta við þessa nýju skáldsögu hans Sölva míns er að hún er ljúfsár. Ljúf og í senn sár. Tregafull og líka full af húmor. Sannarlega get ég tekið undir með Steinari Braga og Auði sem tala um mergjaða sögu og ofboðslega sérstaka. Þau Dáti og Eva voru indælir förunautar í síðustu viku. Ég hef sjálfur margreynt að það er hægt að láta sér líða afskaplega vel í eigin kvöl. Furðulegt en satt. Ég er viss um að ég hefði notið mín vel innanum allt kartöflubrennivínið og á hasssafninu.Bestu þakkir Sölvi minn.

Lífið gengur sinn vanagang hjá okkur Kimi. Pólitíkin jafn andstyggileg og svo oft áður. Fæ mig varla til að minnast á hana.Nú bíð ég eftir símtali frá Borgarspítalanum. Ég er þó ekkert stressaður. Ég bíð bara eftir að losna við þennan leiðindaverk.Síðustu ferðir mínar á spítalann færðu mér heim sanninn um að enn eigum við frábært starfsfólk í heilbrigðisgeiranum. Einkum blessað kvenkynið.Samt er maður alltaf jafn feginn að komast heim aftur. Bestu kveðjur frá okkur vinunum, ykkar Hösmagi.

Morðæði.

2009-11-01T02:34:00.000-08:00

Alveg er yfirgengilega sorglegt að fylgjast með fréttum af stríði nokkura manna gegn fáeinum rolluskjátum í fjallinu Tálkna fyrir vestan.Þetta ku vera erfitt land til smölunar og allt frá 1950 hefur verið þarna hópur af kindum allt árið. Ekki verður annað séð en að dýrin hafi lifað léttilega af öll vetrarveður og haft nóg í sig að éta.Fyrir 4 árum var gerð ásás á þessar skepnur. Þyrlur voru notaðar til að skjóta dýrin úr lofti og hræin látin liggja þar sem þau voru komin. Kannski voru sum þeirra marga klukkutíma að berjast við dauða sinn. Það kom ekkert við góðmennin sem stóðu fyrir þessum líknarverkum. Rökin voru að mannúðarsjónarmið knýðu menn til að haga sér með þessum ótrúlega hætti. Blessuð dýrin gætu liðið skort þarna. Umkomulaus og án hirðis. Þetta eru þó bara yfirgengileg níðingsverk, auk þess að vera gróf brot á lögum um dýravernd. Það eru sérkennileg vinnubrögð að þverbrjóta lög og réttlæta það með því að þykjast vera að framfylgja sömu lögum. Það hefur komið í ljós að þessi dýr sem fönguð voru nú eru í mjög góðum holdum. Þeir sem best til þekkja á þessum slóðum telja þar nóg til að bíta og brenna. Af hverju mega ekki nokkrar kindur ganga um villtar og njóta frelsis síns? Hvað með hreindýrin, minkinn og refinn? Gætu þessi dýr ekki soltið líka? Þurfa dýravinir að safna liði til að koma þessum skepnum til varnar og hjálpar? Ég er bálvondur yfir þessum hryðjuverkum og lýsi mikilli andstyggð á fólkinu sem fyrir þeim stendur. Það eru nokkur dýr lifandi ennþá. Stöndum vörð um þau og lofum þeim að lifa í friði.

Nóvember heilsar með svölu og fallegu veðri. Sólin skín, hitinn 2 stig og trén bærast varla. Það er ró og friður hér í Ástjörn 7. Allavega yfir íbúunum í íbúð 205. Í síðustu viku varð ég að vera fjarverandi í rúman sólarhring. Kimi einn næturlangt. Hann beið með hausinn út um gluggann þegar ég renndi í hlað undir kvöld á fimmtudag.Hann gerði enga tilraun til að leyna fögnuði sínum yfir endurheimtunum á fóstra sínum. Við gengum svo snemma til náða og allt komst á sama stig og venjulega.Í gær áskotnaðist mér kjöt úr Selvoginum. Þar eru beitarlönd góð og andi Eríks Vogsósaprests hvergi horfinn enn. Stórt sauðalæri verður heimareykt hér í nágrenninu og ég fæ strax vatn í munninn við tilhugsunina um jólamatinn. Það verða engin kreppujól hjá mér hvað mat varðar og Kimi fær bæði humar og harðfisk. Hann lúrir nú í einkafleti sínu í svefnherberginu. Gamall veiðimaður og köttur hans senda öllum vinum bestu kveðjur, ykkar Hösmagi.

Stórglæponinn Siggi Sveins.

2009-10-22T06:37:00.000-07:00

Ég varð hugsi í gærkvöldi þegar ég sá nýja kröfu í einkabankanum. Sekt uppá 10.000 krónur. Mér er gefinn kostur á 25% afslætti greiði ég kröfuna fyrir 4. nóvember n.k.Engin skýring fylgdi og ég taldi mig alsaklausan af öllum glæpum.Ég fór í bæinn í morgun að hitta lungnadoktor. Þegar ég kom austur aftur renndi ég við á lögreglustöðinni ef húsráðendur kynnu að geta upplýst mig nánar um þetta dularfulla mál. Þetta lá alveg ljóst fyrir. Á mánudaginn var, þann 19. kl. 7.50, hafði myndavél náð að festa grænu þrumuna á filmu. Mældur ökuhraði 99 km á klukkustund. Vikmörk 3 km. Það var sem sé sannað að þessari bifreið hafði verið ekið á 96 km hraða við Kirkjuferju í Ölfusi á tilgreindum tíma. En ökumaðurinn hafði ekki náðst á filmuna. Ef ég gæti bent á annan sökudólg en sjálfan mig þá skyldi ég samkvæmt 58. gr. umferðarlaga upplýsa viðkomandi yfirvöld um hver það væri. Eins og þið vitið er ég ekkert nema heiðarleikinn. Alltaf eins og Þórbergur þegar hann gerði sig heiðarlegan í andlitinu. Samt datt mér í hug að segja löggunni að Steingrímur J. hefði verið hér á ferð á gömlu Volvodruslunni. Hún hefði bilað og sem fyrrum meðlimur í flokknum hefði ég aumkvast yfir hann og skotið þrumunni undir hann. En samviska mín mótmælti. Ég var akkúrat þarna á þessum tíma á leið í réttarhaldið í Hafnarfirði.Glæpur minn var reyndar ekki framinn af ásetningi. Það er auðséð að lítið er í ríkiskassanum. Dóms- og mannréttindaráðherra alltaf í fjárþröng. Að ég tali nú ekki um hinn skattglaða fjármálaráðherra. Það þarf að beita öllum hugsanlegum ráðum til að ná í aura í kassann. Mér finnst þetta umferðalagabrot voðalega lítilsiglt.Bókstaflega smámunir einir. Alveg yfirgengilega ómerkilegt.Finn varla snefil af iðrun í sál minni. Maður má ekki orðið keyra á rúmlega 90 við bestu skilyrði. Nánast engin umferð þarna svo snemma dags. En náð stjórnvalda bjargar heilmiklu. Hvorki meira né minna en 25% afsláttur. Ég ætla að greiða sekt mína innan tilskilins frests. Steingrímur getur notað aurana til að greiða einum skilanefndarmanni laun í korter. Sannarlega mun ég líka fagna því þegar fjármálaráðherrann kemur með tillögu að sami afsláttur verði einnig á íbúðarláninu mínu. Hann lýsti því líka yfir fyrir kosningar að hann vildi afnema verðtrygginguna á lánunum.Menn eiga að standa við orð sín eða hvað? Þá verður nú aldeilis kátt á hjalla hjá okkur Rækjunen. Og framvegis mun ég fara enn gætilegar fram hjá Kirkjuferju.Og enn heiðarlegri í andlitinu en nokkru sinni fyrr.

Það er rosaflott veður hér. Sólarglenna og Kári hefur afar hægt um sig. Glæpur minn truflar mig ekki að ráði og ég verð örugglega fljótur að sofna í kvöld. Kannski verð ég bara pínulítið stoltur yfir að geta lagt ríkissjóði lið í kreppunni. Lítið lóð á vogarskál réttlætisins. Kærar kveðjur frá brotamanni og ketti hans, ykkar Hösmagi.

Hræsni íhalds og framsóknar.

2009-10-20T01:57:00.000-07:00

Nú er líklegt að icesave málið sé að taka enda. Í bili a.m.k. Kannski ekki alveg útséð um afstöðu allra í VG. Þetta eru að sjálfsögðu bölvuð þrælabönd fyrir íslendinga. Ömurlegt fyrir Steingrím að standa í þessu. Hann er þó saklaus af rót þessa vanda. Þar er sök íhaldsins nær algjör. Davíð afhenti vinum sínum, flokksbundnum sjálfstæðismönnum, Landsbankann. Icesave skuldin er skilgetið afkvæmi þeirra snillinga. Þetta mál var lagað nokkuð til í sumar og og að lokum var ríkisábyrgðin samþykkt með ákveðnum fyrirvörum. Nú segir íhaldið titrandi röddu að þessi lög séu heilög og það séu þjóðarsvik að hreyfa við þeim. Ekki einn einasti íhaldsmaður samþykkti þessi lög í haust. Enginn hinna sjórnarandstæðinganna heldur.Samt ætlar allt af göflunum að ganga. Hin raunverulega ástæða djöfulgangsins er að sjálfsögðu ekki hagsmunir þjóðarinnar. Nú rennur bara ljósið upp fyrir íhaldi og framsókn. Kjötkatlarnir eru fjær en þeir þóttust vissir um. Nú er ég svo sem ekki mjög ánægður með þessa ríkisstjórn. Því fer víðs fjarri. En ég syrgi heldur ekki að von íhaldsins um að hún væri að springa í frumeindir sínar rætist ekki. Sporin hræða.Það voru Geir, Árni Matt og fleiri íhaldsmenn sem lofuðu greiðslu á þessari skuld í fyrrahaust og ISG spilaði undir á fiðlu. Þeir eru fljótir að gleyma íhaldsdrengirnir eins og jafnan áður. Eðlið óbreytt. Eiginhagsmunagæsla, svik og prettir. Strax komnir aftur í skotgrafir sínar og sýndarmennskan í algleymingi. Þegar allt fer úrskeiðis af þeirra völdum er andstæðingunum kennt um og þeir tala um þjóðníðinga og skemmdarstarfsemi. Skyldi mín kynslóð eiga eftir að upplifa einhverja siðbót í pólitíkinni? Ég efast um það. Það er líka varla von til þess þar sem svo mörg okkar eru í násauðarhirð íhalds og framsóknar. Talsvert af þeim í SF líka.

Ágæt ferð í Hafnarfjörð í gær. Hösmagi langflottastur í réttarsalnum. Talfærin svínvirkuðu eins og svo oft áður ef tala þarf fyrir réttlætinu. Kimi varð yfirsig glaður við heimkomu mína. Fjarvistir okkar urðu líka einir 6-8 tímar. Flott veður og græna þruman þrælviljug að venju. Enn snjólaust og það gleður sálina.Fyrsti vetrardagur á laugardaginn. Hann mun líða eins og hinir þó langur verði og mörgum erfiður. En Hösmagi gamli heldur bjartsýninni enn. Rólyndið á sínum stað. Hvorttveggja mikils virði. Við vinirnir sendum bestu kveðjur, ykkar Hösmagi.

Góðviðri.

2009-10-13T04:57:00.000-07:00

Það voru 11 gráður hér um miðnætti í gærkvöldi. Mér finnst þetta ofurljúft. Tveir litlir skaflar eftir í fjallinu mínu góða. Raikonen kann sér ekki læti yfir að vorið sé komið aftur.Heldur sig utandyra og nærist á blíðunni. Er á meðan er og spáin er ágæt fyrir næstu daga. Sennilega þarf ég ekki norður á föstudaginn því héraðsdómarinn býðst til að rétta í Reykjavík á mánudaginn. Það sparar bæði tíma og bensín en það hefði líka verið skemmtilegt að skreppa norður. Nú nálgast lokafresturinn vegna icesave reikninganna. Eins og ég hef áður sagt hér á blogginu finnst mér vænt um minn gamla læriföður, Sigurð Líndal. Ég varð þessvegna mjög ánægður með að heyra álit hans á þessu máli á visir.is í morgun. Ég er hreinlega alveg hættur að botna í Jóhönnu og Steingrími. Einkum Steingrími. Þó hann hafi samþykkt umsóknina að ESB geri ég nú ekki ráð fyrir að það hafi verið honum auðvelt. Jóhanna er að sjálfsögðu reiðubúinn að fórna miklu fyrir aðgöngumiða að ESB. Það hefur lengst af verið önnur af tveimur hugsjónum SF að koma okkur íslendingum inní þann félagsskap. Og ráðherrastóll fjármálaráðherrans er mjúkur. Hann langar alls ekki að standa uppúr honum. Það má eiginlega skipta VG í 2 hluta. Annarsvegar er Steingrímur með hirð tryggra sauða sinna, þær Álfheiði, Svandísi og Katrínu og svo þá Árna Þór og Björn Val. Tryggilega í tjóðri formannsins.Þuríður Bachman, Jón Bjarnason og Bjarkey virðast lausbeisluð. Restin stendur í lappirnar, þau Atli, Liljurnar báðar, Ögmundur og Ásmundur Dalabóndi. Mitt fólk í VG. Það er auðvitað mikilvægt að fólk sé samstíga í ríkisstjórn. En göngulagið má ekki stjórnast af ofbeldi og skoðanakúgun. Það er í rauninni kraftaverk að stjórnin dragi enn andann undir einræðistilburðum forsætisráðherrans. Jafnvel Össur virðist sjá þetta þó hann, aldrei þessu vant, segi frekar fátt. Þó ég elski nú framsóknarmenn svona heldur lítið finnst mér ágætt hjá Sigmundi að tala við norðmenn. Ég elska þá ekki heldur mjög heitt. Það er algjör óþarfi að hlýða gömlu nýlendukúgurunum, bretum og hollendingum möglunarlaust. Þeir kippa líka í réttu spottana hjá AGS. Þessa handrukkunarstofnun í icesave málinu. Ég bíð eins og aðrir eftir framvindunni næstu daga. Ég held nú að það verði enginn dómsdagur á næstunni. Þetta er samt vont og það getur versnað.
Kimi mættur og búinn að kroppa svolítið í sig. Liggur nú og lygnir glyrnum sínum aftur með framlöpp undir kinn. Lífið heldur áfram. Er það ekki bara ljúft og gott þrátt fyrir allt? Bestu kveðjur frá okkur, ykkar Hösmagi.

Afreksdraumar.

2009-10-07T04:16:00.000-07:00

Í fyrsta lagi hamingjuóskir til skáldsins í Edinborg. Man einkar vel eftir 7. október 1978 þegar Ingvar setti allar innihurðirnar í Hagann. Vonandi á litla fjölskyldan góðan dag.
Aðfaranótt mánudagsins síðasta dreymdi mig afar skemmtilegan draum. Ég hafði tekið uppá því á gamals aldri að rifja upp kynni mín af frjálsum íþróttum. Ég reyndi mig í þrístökki án atrennu og í 100m hlaupi. Ég var í skýjunum yfir góðum árangri. Ég hljóp hundrað metrana á 11,3 sekúndum. Mig minnir að persónulega metið mitt frá unglingsárunum sé 11,4. Ég var sem sé búinn að bæta mig aðeins. Á þeim árum var nú bara gamla góða skeiðklukkan notuð og mælingin var uppá 1/10 úr sekúndu. Svo var ég líka frábær í þrístökkinu. Ég dúndraði sjálfum mér 9,32 metra. Það þykir nú bara nokkuð gott hjá ungum mönnum enn í dag. Í apríl 1962 setti ég íslenkt drengjamet í þessari grein, 9,46 metra. Mér hefur því farið örlítið aftur. Í draumnum var ég svo yfir mig glaður og montinn af afrekum mínum að ég var strax kominn hálfa leið í heimsmetabókina. Fyrir á að giska 10 árum reyndi ég mig í langstökki án atrennu inní Veiðivötnum. Það var alveg ferlegt. Lappirnar virtust vera úr blýi. Held ég hafi varla náð heilum metra. Hræðilegt áfall eftir að hafa margoft stokkið yfir 3 metra þegar ég var ungur og efnilegur. En svona leikur tíminn góða drengi. Draumurinn yljar mér samt og ég á fjölda góðra minninga frá því ég keppti í frjálsum fyrir tæpri hálfri öld.
Það er gjóla og hitinn við eina gráðu.Sætti mig vel við það meðan ég er laus við snjó. Ég er nýkominn úr héraðsdómi og þarf þangað aftur klukkan tvö. Ég neyddist til að fara úr gallabuxunum og rúllukragapeysunni. Virðing dómsins hefði beðið hnekki ef bindið hefði ekki verið á skyrtunni. Svona er þetta bara. Lögmennskan er svona voðalega vandmeðfarin og merkileg.
Kimi var aðeins að bregða sér útí gjósturinn. Sólskinið bætir hann aðeins upp. Svo er bara að koma sér inn aftur, nasla smávegis í sig og dorma áfram. Ósköp áhyggjulítð líf. Ég hlakka til að fara á hlerann í kvöld. Kannski set ég heimsmet í stangarstökki í nótt. Hver veit? Bestu kveðjur frá okkur, ykkar Hösmagi.

Stefnuræða Jóku.

2009-10-06T01:43:00.000-07:00

Ég fylgdist með sjónvarpinu frá Alþingi í gærkvöldi. Eins og væntanlega margir aðrir.Kerlingarálftin í stóli forsætisráðherra er auðvitað í vanda stödd. Komst frá ræðunni svona nokkurnveginn skammlaust miðað við aðstæður.Katrín var svona la la en Svandís hrokafull og leiðinleg. Bjarni Ben einna skástur af íhaldsliðinu en svona almennt séð voru ræðumenn þess alveg vonlausir. Þorkúlugerður langt fjarri raunveruleikanum og Ragnheiður Elín með sama skætinginn og vant er. Svo einkennilegt sem það kann að virðast fannst mér formaður framsóknarflokksins flytja langbestu ræðu kvöldsins. Siv var ágæt á milli okkar Magga á sjóstönginni í sumar en hún hefur lítið skánað í pólitíkinni. Það virðist fátt um fína drætti fyrir okkur íslendinga í þessari afleitu stöðu. Það sjá flestir nema Steingrímur og Jóhanna að þessi ríkisstjórn er í raun fallin nú þegar. Það er auðvitað slæmt útaf fyrir sig og fátt til ráða. Það tíðkast mjög hjá samfylkingarbloggurum á Moggablogginu að tala um hrunflokkana, íhald og framsókn. En þeir gleyma allir þætti SF í hruninu. Formaður þeirra, ISG, bakaði pönnukökur hjá SÞ meðan allt var á leiðinni til andskotans hér heima. Mér kemur Neró og fiðluleikur hans í hug. Viðskiptaráðherrann var þó miklu verri. Gjörsamlega úti á þekju og gerði nákvæmlega ekkert af því sem honum bar að gera. Þetta er þó aðeins hluti fortíðar sem enginn fær breytt. Ábyrgð SF er þó mikil og ekki trúverðugt þegar Jóka og félagar tala um hrunflokkana 2. Steingrímur er væntanlega á heimleið. Það verður allt reynt til að halda stjórninni saman. Sumum finnst vænna um ráðherrastóla en öðrum. Ég ber virðingu fyrir fólki sem ekki vill selja sannfæringu sína fyrir völd og vegtyllur. Og mér finnst ósanngjarnt að halda því fram að slíkt fólk haldi núverandi ríkisstjórn í gíslingu. Þó ég hafi fagnað óförum íhaldsins í síðustu kosningum var í mér beygur vegna samstarfs SF og VG. Þessir flokkar hafa verið á öndverðum meiði í veigamiklum málum. Hluti af VG hefur beygt sig í duftið fyrir SF og virðist tilbúinn að fórna miklu fyrir þetta samstarf. Aðrir andæfa og eru ekki litnir réttu auga af formanninum fyrir vikið. Málamiðlun felst ekki í því að annar hópurinn fái öllu sínu framgengt. Þessi mál munu skýrast á næstu dögum. Mín spá er sú að ef Steingrímur og Jóhanna eru óbifanleg í icesave málinu þá verði þau knúin frá völdum. Það virðast nokkrar leiðir í stöðunni enn sennilega allar ófærar. Það er hið versta mál eins og Ragnar Reykás hefði orðað það.

Það er kyrrt og fallegt veður. Snjólínan í miðju Ingólfsfjalli. Snjókoman kom ekki við á Selfossi í nótt en vegir hálfófærir neðarlega í Ölfusinu. Þetta er Ísland. Landið, sem nú er því miður í erfiðum málum. Ég ætla að hugsa uppá gamla mátann. Þetta reddast einhvernveginn. Við Kimi höldum okkur inní hlýjunni. Höfum líka enn í okkur að éta. Það er nú meira en ýmsir aðrir. Ég þakka kærlega fyrir sendinguna frá Edinborg. Afrek Hrafnhildar Kristínar koma Hösmaga afa ekki á óvart. Snöfurleg snót og státin stelpa. Bestu kveðjur frá okkur fósturfeðgum, ykkar Hösmagi.

Hvellur.

2009-09-30T11:21:00.000-07:00

Ögmundur hefur sagt af sér. Mig undrar það ekki. Frekjan í Samfylkingunni er yfirgengileg. Ég hef alla tíð treyst Ögmundi. Sannur lýðræðissinni sem vill þjóð sinni gott eitt. Hann vildi ekki verða viðskila við samvisku sína fyrir hina heilögu frú. Ég hafði líka lengi mikið traust á Steingrími. Það er nú horfið með öllu. Fyrir kosningar vildi hann skila láninu frá AGS.Hann vildi heldur ekki sækja um aðild að ESB.Hann sagðist vilja afnema verðtrygginguna. Og ýmislegt fleira sagði þessi kjaftfori sveitamaður. Nú er sveitamaðurinn gufaður upp með öllu. Stundum mætti halda að silfurskottan í forsætisráðuneytinu hefði beisli á Steingrími. Ekki um hálsinn heldur punginn. Kippir bara aðeins í eftir þörfum. Langbesti ráðherrann í þessari ríkisstjórn er nú horfinn á braut. Það er slæmt fyrir lítilmagnann í þessu þjóðfélagi. Næstu dagar munu skera úr um framhaldið. Ég hafði miklar áhyggjur af þessu stjórnarsamstarfi strax í upphafi. Sjálfhverfan í í SF er algjör. Einstefnuþvermóðskan ríður ekki við einteyming á þeim bænum. Hugsjónaleysið algjört. Markaðsvæðing heilbrigðiskerfisins og ESB einu stefnumálin. Nýjasta útspil félagsmálaráðherrans til bjargar heimilunum eru sjónhverfingar einar. Ég kom í bankann minn í dag. Þar fékk ég upplýst að skuldurum stæðu þessi úrræði til boða nú þegar. Lengja bara svolítið í ólinni. Ég held að þessi ríkisstjórn sé að hrynja. Við skulum ekki gleyma því að Jóhanna og Steingrímur ætluðu að keyra Icesave samninginn í gegn óbreyttan. Samninginn sem smáborgarinn Svavar Gestsson undirritaði af því hann nennti ekki að hafa málið hangandi yfir sér lengur. Sem betur fer eru enn nokkrir þingmenn VG með óbrenglaða dómgreind. Ég treysti enn á þetta fólk. Atla, Ásmund Dalabónda, Ögmund og Liljurnar báðar. Ég er jafnvel að hugsa um að kaupa mér hatt svo ég geti tekið ofan fyrir Ögmundi. Það er gott að hann skuli ekki fara sömu leiðina og vopnabróðir hans í langan tíma, Steingrímur J. Sigfússon.

Það var frost hér í gærmorgun en heldur hlýrra í dag. Við Kimi látum hverjum degi nægja sína þjáningu. Að venju. Hann veit heldur ekkert um Icesave eða AGS. Treystir bara á fóstra sinn og sýnir honum þakklæti fyrir atlætið. Og aldrei þessu vant kúrir hann hér á gamla tágastólnum á móti mér. Við sendum bestu kveðjur, ykkar Hösmagi.

Svallbróðirinn afi.

2009-09-27T10:34:00.000-07:00

Mér fannst það skondið þegar ég hlustaði á nafna minn A. Magnússon í Kilju Egils nú í vikunni að þar kom afi minn við sögu. Sigurður var að rekja æsku sína. Fátækt og basl. Bók hans, Undir kalstjörnu, er nú nýkomin út í aftur í safni úrvalsbókmennta.Faðir hans var kallaður Merar-Mangi. Hestamaður, drykkju- og kvennamaður mikill. Sigurður sagði frá því að oft hefði Benedikt Sveinsson verið í slagtogi með föður sínum. Benedikt var faðir Bjarna Ben, afi Björns Bjarna og langafi Bjarna,núverandi formanns sjálfstæðisflokksins. Ennfremur upplýsti nafni minn að afi minn, Karl Lárusson, Lúðvíkssonar skókaupmanns hefði oft verið með þeim í slarkinu. Ættfeðrum mínum í móðurætt þótti víst brennivín nokkuð gott. Merarmangi var iðinn við kolann í kvennamálum. Hann átti 23 börn með 7 eða 8 konum. Afi virðist hafa átt þetta til líka. Á efri árum komst móðir mín að því að hún átti systur sem var 2 mánuðum eldri en hún. Mér er sagt að móðir mín hafi einu sitt föður sinn. Hann mun hafa gefið henni skó úr verslun gamla Lárusar G. Það voru hennar einu kynni af honum og skórnir það eina sem hann lét þessari dóttur sinni í té um ævina. Klara Karlsdóttir átti heldur engan þátt í að drekka út allan auðinn sem þessi skóverlsun skóp. Ég hef svosem aldrei haft mikinn áhuga á ættfræði en mér fannst skemmtilegt að Sigurður skyldi minnast á þennan afa minn.
Það haustar hratt að þessa dagana og september að kveðja. Það er þó snjólaust enn hér sunnanlands þó aðeins hafi gránað til fjalla. Herconinn rólegur í bílskúrnum og línur mínar munu líklega ekki strengjast oftar á þessu ári. Ég fer til höfuðborgarinnar í fyrramálið. Sneiðmyndataka á landspítala og vonandi hitti ég svo eitthvað af afkomendum mínum á eftir. Þá á ég erindi við Nínu systur mína. Hún á afmæli í dag og fær bestu kveðjur frá litla bóa. Það voru nokkuð stríð veisluhöld hjá okkur Kimi í síðustu viku. Harðfiskur, humar og ýsa og í þessari röð. Við erum því nokkuð brattir í dag og sendum bestu kveðjur, ykkar Hösmagi.

Toccata og fúga í d moll.

2009-09-16T10:52:00.000-07:00

Hösmagi laumaðist aftur til kirkju í gærkvöldi. Það var að vísu lítið um guðsorð en þeim mun meira af öflugum tónum. Þetta voru sem sagt tónleikar. Hinir 3ju í septembermánuði og 2 eru eftir enn. Þetta hófst einhverntíma í kringum síðustu aldamót og ég fór þá á allmarga tónleika. Svo lenti þetta í útdeyfu þar til í ár. Ég lá reyndar fyrstu tónleikana af mér í móki og þreytu eftir flensuskrattann. Það var organistinn í Akureyrarkirkju sem spilaði í gærkvöldi. Ung kona, Sigrún Magna að nafni. Það mátti heyra að hún hefði einhverntíma tekið í pípuorgel áður. Byrjaði á Bach, síðan Arvo Pärt, Jesper Madsen, Felix Mendelsohn og lauk svo spilverkinu með þekktasta verki kirkjutónlistarinnar, tokkötu og fúgu í d moll sem er líklega samin fyrir hátt í 300 árum. Bach var fæddur 1685. Þetta er magnað tónverk og ég held að sá sem ekki hrífst af því sé sálarlaus, tilfinningalaus og kannski heilalaus líka. Pípuorgelið er líka eiginlega mörg hljóðfæri í einni og sömu græjunni. Ég óttaðist á tímabili að þakið lyftist af þessu guðshúsi og svifi út á Ölfusá. Þegar tónleikunum lauk klöppuðu áheyrendur þessum ágæta listamanni lof í lófa. Þetta er kærkomin tilbreyting þegar haustmyrkrið er að færast yfir. Spjall,kaffi og nammi á eftir. Þá er ekki verra að þetta er ókeypis sem kemur sér vel í kreppunni. Ég hyggst koma mér upp diski með þessu fræga verki. Það mun örugglega hljóma vel í græjum grænu þrumunnar á bökkum Ónefndavatns. Þar hef ég stundum gefið Freddy Mercury lausan tauminn. Ég er líka hrifinn af Albinoni. Hann var sannur listamaður eins og Bach en er nú flestum gleymdur því miður.
Það er haustlegt og búið að rigna heilmikið í dag. Ég er nú að verða allhress og verð að fara að taka til hendi. Bókhald og undirbúningur undir málflutning norður í landi um miðjan næsta mánuð. Það er orðið æði langt síðan ég hef komið norður fyrir Holtavörðuheiði og það er bara tilhlökkunarefni að eiga það í vændum. Kimi heldur sig innandyra og virðist geta sofið endalaust.Bestu kveðjur frá okkur, ykkar Hösmagi.

Septembergrámi.

2009-09-14T03:14:00.000-07:00

Lauf trjánna eru farin að flyksast um loftið.Haustmerkin augljós enda stutt í jafndægri á hausti. Það rétt mótar fyrir fjallinu góða í þokumistrinu.Það er þó sæmilega hlýtt og vonandi verður lítill snjór í kortunum í vetur.
Nú stefnir í að Íslandsbanki verði afhentur kröfuhöfum sínum. Ríkið ætlar að eiga 5% hlut áfram og leggja bankanum til 25 milljarða í " víkjandi" lán. Víkjandi lán er annað nafn á gjafapeningum. Hinn 1. nóvember n.k. ætla svo sýslumenn landsins að hefja uppboðin að nýju. Við sýslumannsembættið hér á að selja 400 eignir. Engin víkjandi lán á þeim eignum. Ríkisstjórn lítilmagnans ætlar að láta kné fylgja kviði. Það er svo dýrt að hjálpa almenningi þó nægir peningar séu til til að moka í gjaldþrota fyrirtæki glæpahyskisins.Forsætisráðherrann er í felum. Heldur sig til hlés eins og einn sykurdrengja hennar orðar það. Kannski er Jóhanna svona upptekin við að svara hinum 2.500 spurningum evrópusambandsins? Mikið óskaplega er ég orðinn leiður á formönnum ríkisstjórnarflokkanna.Fólkinu sem lofaði að slá skjaldborg um heimilin sem nú á að fara að splundra með nauðungaruppboðum. Þessu fólki dettur ekkert skynsamlegt í hug. Sömu gömlu íhaldsúrræðin og við þekkjum svo alltof vel. Hækka neysluskatta daglega. Skatta, sem bitna harðast á þeim sem minnst hafa.Handrukkarar AGS ráða stýrivöxtunum. Laun lækka og verðbólgan æðir áfram. Fólkið sem fyrir nokkrum árum átti dágóðan hlut í eignum sínum stendur á núlli og margir reyndar komnir í stóran mínus. Steingrímur hefur lýst því yfir að hann sé píslarvottur. Hans verði þó minnst síðar fyrir afrek sín. Hann sitji nú ystur til borðs, smáður og hrakinn. Skúrkurinn í kúrekamyndinni. Fólk kann ekki gott að meta og rífur bara kjaft. Menn eins og undirritaður sem ekki kann að meta svikin loforð eru ekki hátt skrifaðir hjá þessum fjármálaráðherra. Það er illt í efni hjá okkur íslendingum. Yfir 90% alþingismanna algjörlega óhæfir. Hina er hægt að telja á fingrum annarar handar.
Þessi pistill er skrifaður á nánast nýja tölvu. Mér áskotnaðist þessi græja í síðustu viku. Hewlett Pacard með 19 tommu flatskjá. Það kemur sér stundum vel að þekkja menn sem muna eftir manni þegar eitthvað gott rekur á fjörur. Gamla Dell tölvan mín var reyndar í ágætu lagi. Hún fær þó að hvíla sig í bili.
Kimi liggur frammi á gangi. Ég held að hann sé í andlegri íhugun. Vonandi er hann ekki að hugsa um landsfeður og mæður. Við snjóum þetta saman eins og áður.Biðjum að heilsa vinum okkar, ykkar Hösmagi.

Gikkur í guðshúsi.

2009-09-07T00:58:00.000-07:00

Ég fór í kvöldmessu í Selfosskirkju í gærkvöldi. Með vinkonu minni og fyrrum sambýliskonu, Grétu. Það verður nú ekki sagt um mig með réttu að ég sé beinlínis þrunginn trúarhita. Og hvað er utanþjóðkirkjumaður að strekkja til kirkju að kvöldlagi? Ástæðan var gamli popparinn Þorvaldur Halldórsson. Hann hefur hin síðari ár gengið á guðsvegum. Fólk man örugglega eftir lögunum Á sjó og Þú ert svo sæt. Ég skemmti mér líka oft í Sjallanum á yngri árum. Þegar ég var hjá Orkustofnun í gamla daga og haldið skyldi norður í land voru brennivínsfötin ávallt meðferðis.Ég var bara í venjulegum buxum, rúllukragapeysu og jakka í gærkvöldi. Þorvaldur getur svo sannarlega sungið enn og lunkinn mjög með skemmtarann. Ég hafði mikla ánægju af söng hans. Og konu hans, Margrétar, einnig. Presturinn og djákninn voru þarna líka og fengu að skjóta inn einu og einu guðsorði. Þegar Þorvaldur söng, drottni sínum til dýrðar og vegsauka, hugsaði ég mitt. Gikkurinn í mér setti allt í einu Steingrím J. í stað Jésúsar.
Steini, við lofum þig og þér lútum
og við lyftum höndum okkar
og við upphefjum þitt nafn.
Þú mikill ert
máttarverk þín stórkostleg
enginn jafnast á við þig.
enginn jafnast á við þig.

Ég sá þetta fyrir mér á einkafundi klíkunnar í kringum Steina. Andaktugt liðið, Kötu, Svandísi, Árna Þór og Álfheiði. Mænandi á aðalritarann mikla. Sjálfan formanninn. Sæluhrollurinn hríslandi um blessað fólkið yfir afrekum leiðtogans. Þetta er auðvitað voðalega ljótt af mér. Eins gott að ég staldraði stutt við í flokki vinstri grænna. Þetta var ágæt kvöldstund. Í lokin gengu allir í halarófu að prestinum og djáknanum. Með útbreidda lófana. Ég fékk krossmark með ferðablessun í báða lófa. Lét mér það vel líka og svo var þessi fína lykt af smyrslinu sem fylgdi blessuninni. Ég var bara betri maður þegar heim kom eftir kvöldkaffi með Grétu minni.

Heilsa mín er að batna. Á miðvikudaginn kemur hitti ég minn ágæta lækni, Eirík Jónsson. Ég hitti líka Sturlu Johnsen á miðvikudaginn var. Góður læknir og ákaflega viðræðugóður maður. Honum fannst líklegt að ég hefði fengið svínaflensuna alræmdu. Hann sagði mér eftir að að hafa skoðað mig að ég væri alveg að klára þessa pest. Það er auðvitað hundfúlt að hafa eytt heilum mánuði af þessu yndislega sumri í að berjast við þessa vondu sendingu. Aðalatriðið er þó að endurheimta heilsu sína á ný. Kannski kemst ég einn dag í Ölfusá núna í september. Laxarnir eru nú orðnir 408 sem er mjög gott, ásamt einstaklega góðri sjóbirtingsveiði. Það er að koma haust og veturinn kemur líka. Þrátt fyrir Steingrím og Jóhönnu ætla ég ekki að leggjast í sút. Það mun vora aftur. Gamli veiðimaðurinn ætlar að halda ró sinni og bjartsýni. Ég vonast til að hitta Hrafnhildi Krístínu í vikunni. Og foreldra hennar. Það verður indælt.
Kisi minn liggur á bakinu í gamla tágastólnum. Honum fannst notalegt að fá stroku eftir maganum frá fóstra sínum. Klukkan 4 í dag ætla ég að sjá þýsku stelpurnar rúlla þeim norsku upp. Svona fimm núll. Þó ég sé nú engin fótboltafrík hefur það stytt mér stundir að fylgjast með þessu evrópumóti. Selfoss hefur í fyrsta sinn tryggt sér sæti í úrvalsdeildinni og ég er líka bara montinn yfir því. Við Kimi sendum ykkur öllum okkar albestu kveðjur, ykkar Hösmagi.

Gamalt hross.

2009-08-29T04:11:00.000-07:00

Ég er enginn gæðingur lengur. Snerpan horfin. Þó vont sé að velta sér upp úr fortíðinni getur það stundum verið gagnlegt.Líf mitt hefur ekki verið samfelldur rósadans. En ég er ekki bitur maður og tel mig hafa verið ákaflega heppinn. Hef örugglega fengið meira af ómældri ánægju í lífinu en erfiðleikum. Til dæmis blessað barnalán. Þegar talað er um gömul hross dettur mér í hug kvæði Davíðs Stefánssonar og það hefur verið mér ofarlega í huga undanfarna daga.

Er ungir folar fitna inn við stall,
sem flestir verða aðeins markaðsvara,
má gamall jálkur líkt og freðið fjall
á fannabreiðum einn og gleymdur hjara.

Hann krafsar gadd, unz kelur hóf og legg,
og koldimm nóttin ógnar sínum gesti.
En stormakófið kæfir brostið hnegg
á klakabörðum útigönguhesti.

Hart er að verða að híma undir vegg
og hafa verið gæðingurinn besti.

Nú er tuttugasti dagur í pest. Það er verulega fúlt. Ég lýsti síðustu ferð minni á læknisfund hér á þriðjudaginn. Þegar ungi doktorinn sagði við mig: Vertu úti góði. Ekki vildi ég eiga líf mitt undir þessum bartskera. Ég er að leita mér ráða. Góður vinur minn var læknaður með sterum af álíka pest. Ég þekki lækninn sem það gerði og er að reyna að ná sambandi við hann. Rólyndi mitt og alkunn geðprýði eru í hættu ef ég fæ ekkert að gert. Það liggur við að hver dagur sé að verða að martröð. Dunda mér þó við minniháttar verk innanhúss. Það drepur tímann. Ég fór á bókasafnið í fyrradag.
Einar Ben., Sjón, Davíð Stefánsson, Agata Cristee og Jóhannes úr Kötlum. Heilt stórskotalið á náttborðinu.
Það er norðangjóla og hitinn rúmar 10 gráður. Ég dreif mig út í morgun til að brjóta upp ræfildóminn. Kimi beið mín við bílskúrinn þegar heim kom og heldur sig hér nálægt mér sem fyrr. Við sendum okkar bestu kveðjur, ykkar Hösmagi.

Með angur í hjarta...

2009-08-25T06:09:00.000-07:00

og dirfskunnar móð, ferð þína eigin, ótroðnu slóð. Ég hélt að ég væri orðinn albata í gærmorgun. Því miður reyndist það ekki rétt. Um hádegi var ég orðinn svangur. Nokkuð sem hafði ekki gerst í hálfan mánuð. Borðaði sviðakjamma og 2 bita af kjúklingi og það var ágætt. Þegar leið á daginn jókst slenið á ný. Ég hékk yfir fótboltanum í sjónvarpinu og fór svo nokkuð snemma að sofa. Slappur í morgunsárið og ég tók ekki áhættu með því að fara út. Hringdi á spítalann og sagði mínar farir ekki sléttar. Viðtal við doktor kl. 11. Hann var bergmálið af þeim sem ég talaði við þann 14. Sá hinn sami hefur meiri áhuga á býflugnarækt en lækningum. Hann úthlutaði mér sjálfum sér sem heimilislækni í vetur en ég mótmælti og valdi mér annan. Kannski hefur honum ekki líkað það. Það er hans mál en ekki mitt. Þessi ungi afleysingalæknir sem ég hitti í morgun sagði mér að hætta að reykja. Það væri heilsuspillandi og ég væri á síðustu metrunum. Hætta á lungnaþembu, lungnakrabbameini, kransæðastíflu og heilablóðfalli. Mér hefur lengi verið ljóst að reykingar eru ekki heilsusamlegar. Þessi náungi át upp eftir hinum að ég ætti langa reykingasögu. Ég þurfti bara alls ekki að hitta hann til að fá það upplýst. Ég spurði hvort hugsast gæti að ég væri með verri sýkingu vegna málmsins í vinstra lunganu. Hann starði á mig í forundran, sagði að aðrir biðu eftir sér og ég skyldi fara í apótekið að sækja þangað lyf sem myndu hjálpa mér að gleyma tóbakinu. Sagði mér líka að sumir væru veikir af þessari illkynjuðu pest í viku, hálfan mánuð og aðrir í 3 vikur. Skyldi koma mér heim og hafa hægt um mig. Ég er réttlaus meðan ég hætti ekki reykingunum með öllu. Ég reyki að vísu einn og einn vindil enn. Mér til hugarhægðar og yndisauka í öllum leiðindunum. Ég hef þó stórdregið úr þessu og auðvitað segir skynsemin mér að best væri að hætta alveg. Kannski geri ég það fljótlega. En ég yfirgaf spítalann í morgun með angur í hjarta. Ég fór bónleiður til búðar. Enda bara annars- eða 3ja flokks borgari. Ég vil reyndar óska báðum þessum læknum farsældar í starfi. Ég mun samt reyna að vera án starfskrafta þeirra framvegis. Þó allt sem þeir hafi sagt um tóbakið sé satt og rétt er það vond læknisfræði að afgreiða fólk með þessum hætti.
Ég á pantað viðtal við Eirík Jónsson, minn ágæta skurðlækni, í næsta mánuði. Ég reyni að fá því flýtt. Það er maður sem hægt er að tala við. Maður, sem tekur starf sitt alvarlega, gerir ekki lítið úr fólki, né afgreiðir það með þeim hætti að það gangi burt með angur í hjarta. Það er gott að slíkt fólk sé enn við störf í heilbrigðisgeiranum.
Kimi minn reynist mér betur en enginn í þessum hremmingum. Segir fátt en samvera við lítið dýr getur gefið heilmikið. Hann dormar nú á gamla tágastólnum. Við sendum ykkur okkar bestu kveðjur, ykkar Hösmagi.

Laugardagur til lukku?

2009-08-22T01:26:00.000-07:00

Í dag er síðasti laxveiðidagur Hösmaga í sumar.Hann situr þó heima og sötrar Kók. Lítil lyst á morgunkaffi þessa dagana, sem sýnir betur en allt annað að heilsufarið er bágborið. Ég vona að vendipunktur verði í dag. Að öðrum kosti verð ég að leita alvörulæknis á mánudaginn. Þetta er þrettándi dagur í pest. Miklu meira en nóg komið. Skáldið mitt nýtir sennilega hluta af seinniparti veiðidagsins.Undirritaður tekur enga sjensa í dag minnugur síðasta mánudags. Rúmlegur umfram brýna nauðsyn eru ákaflega hvimleiðar. Aukinheldur þegar maður hefur varla haus til að lesa með. Þegar bráð hefur af mér hef ég gripið í Skipið eftir Stefán Mána.Ég hef lokið við þriðjunginn. Margir vafasamir karakterar hafa komið við sögu. Kannski get ég tekið svolitla törn í dag. Matarlyst er nánast engin og ég lifi ekki lengi á varaforðanum en ég á þó enn bjartsýnina að vopni. Hún hefur lengst af reynst mér heilladrjúg og ég mun komast yfir þessa illkynjuðu pest. Á því er enginn vafi. Lítið um jákvæðar fréttir úr pólitíkinni. Þingið virðist fast í öngstræti og enn alveg óljóst um úrslit Icesave málsins. Nú getur maður aðeins vonað það besta þó traustið til þingmanna sé í lágmarki. Sá sem tapar voninni á ekkert eftir.
Þetta er nú hálfömurlegur morgunpistill. Líðan mín er þó með skásta móti utan leiðans sem sækir á mig í þessu vesældarástandi. Ég er orðinn svo staðfastur bindindismaður að ég get ekki einu sinni fengið mér snafs til að hressa mig við. Ég ætla að endurheimta heilsu mína á annan og öruggari hátt. Illskást í vondri stöðu.
Það virðist afar rólegt hér utandyra. Sólarglæta en samt nokkuð skýjað. Kimi sefur í sófa inní stofu. Áhyggjulaus að venju í draumalandinu. Nú velti ég teningunum nokkrum sinnum mér til hugarhægðar. Við félagarnir sendum ykkur bestu kveðjur okkar, ykkar Hösmagi.

Raunir Hösmaga.

2009-08-19T10:32:00.000-07:00

Stundum vilja verða hlé á bloggáráttunni. Sennilega ágætt. En Hösmagi er búinn að vera óttalegur aumingi í 10 daga.Mánudaginn 10 vaknaði ég ómögulegur snemma morguns. Fór þó á lappir og í mína dagvissu morgunreisu. Þegar heim kom lagðist ég til hvílu aftur og var hálfrænulaus allan daginn. Þann 11. voru góð ráð dýr. Veiðivötnin biðu og ég varð að sjálfsögðu að halda í hann. Ég hafði lambakónginn minn sem bílstjóra inneftir. Þar hittum við Magga fyrir og við héldum til veiða. Gerðum góða veiði um kvöldið og daginn eftir komu Sölvi,Eyþór og 2 frændur hans. Við slitum upp nokkra fiska og héldum svo heimleiðis þann 13. Við Siggi renndum í hlað í Ástjörn kl. 5 og ég tíndi það helsta úr grænu þrumunni og Siggi hélt áfram í bæinn. Ég svaf í 12 tíma. Staulaðist á fætur til að fara fljótlega í rúmið aftur. Föstudagurinn leið í eymd og volæði. Ég fór á læknavaktina og fékk sýklalyf. Þau hafa lítið virkað enn. Á sunnudaginn var litlu stúlkunni þeirra Helgu og Sölva gefið nafn. Hún heitir Hrafnhildur Krístín. Þessi litla snót mun bera bæði þessi rammíslensku og fallegu nöfn með sóma og sann. Ég tók enga áhættu og hélt mig heima. Hugur minn var hjá lítilli stúlku og foreldrum hennar. Það hefði verið lagleg uppákoma að dreifa smitbakeríum yfir alla viðstadda. Litla stúlkan á nafngjafirnar inni hjá Hösmaga afa sínum. Ég vona að þessi pestarskratti gangi ekki af mér dauðum. Ég stóðst ekki mátið og hélt til veiða á mánudagsmorgun. Náði fljótlega 4 punda sjóbirtingi. En refsingin lét ekki á sér standa. Ég fór heim um hálfellefu orðinn fárveikur aftur.Hríðskalf í 3 peysum undir dúnsænginni. Skárri í gær en aftur orðinn veikur eftir hádegi í dag. Ég er orðinn hundleiður á þessu. Bálvondur bara. Ég get varla sagt að ég hafi borðað neitt þessa erfiðu daga. Ég þrauka þetta af mér. Af gömlum vana. Sólarljósið á þessum bæ í dag er Sólblómið góða. Fræ sem ég setti í pott einhverntíma í vor. Ég hef nostrað við þessa jurt og í morgun var brosandi sólblóm í stofuglugganum hjá okkur Kimi. Hann ber virðingu fyrir þessu blómi og hefur algjörlega látið það í friði þó ég hafi staðið hann að verki við blómaát utandyra. Bróðir minn gætti hans meðan Veiðivatnatúrinn stóð yfir. Þeir þekkjast og er vel til vina. Sendiði mér nú góða strauma, krúttin mín kær. Mér finnst meira en nóg komið af hremmingum að sinni. Við rauðu sambýlingarnir sendum ykkur okkar bestu kveðjur, ykkar Hösmagi.

Litla sæta ljúfan góða.

2009-08-05T03:25:00.000-07:00

Á laugardaginn var skrapp ég í bæinn til að líta á litlu stúlkuna þeirra Helgu og Sölva. Hún er lítil og sæt með greindarlegt andlit. Ég varð eiginlega aftur jafnundrandi og þegar Ingunn Anna fæddist fyrir 7 árum. Undrandi á, hvað nýfædd börn eru smá. Algjörlega háð foreldrum sínum í einu og öllu. Þau eru fljót að braggast og dafna. Áður en varir verður þessi frumburður þeirra Helgu og Sölva orðin að státinni stelpu. Foreldrarnir geta sannarlega verið stoltir yfir stelpunni sinni. Saga lífsins heldur sífellt áfram og fæðing þessa litla barns er Hösmaga gamla ákaflega kær.

Það er rífandi gangur í laxveiðinni í Ölfusá.Í gærkvöldi voru komnir 330 laxar á land og 62 sjóbirtingar að auki. Megnið af birtingnum er á bilinu 2-7 pund svo það er ekki litil ábót á laxinn.Áin tær og falleg og það stefnir í besta laxveiðisumar í Ölfusá í áratugi. Veðurblíðan varir enn og fyrripart síðasta mánudags þegar undirritaður dvaldi á bakkanum var neðri hluti líkamans hálfsoðinn í vöðlunum. Á seinni vaktinni í Víkinni réð hafgolan ríkjum. Ég krækti í 2 góða laxa og sjóbirting að auki. Fiskarnir mínir úr ánni eru því orðnir 13 í sumar. Það er nú sérdeilis góð tala þó ég sé að sjálfsögðu ekki aldeilis hættur.Hélt heimleiðis glaður í sinni eftir indælan dag á bökkum Ölfusár í ágætum félagsskap. Yfirleitt er ég ánægður með veiðifélaga mína þó þar séu undantekningar eins og í flestu öðru. Ég gerði hálfpartinn ráð fyrir að fara inná Arnarvatnsheiði í dag en af ýmsum ástæðum varð ekki af því. Kannski frestast sú för til næsta sumars en mig langar mjög að koma þarna. Njóta nýrra dásemda við útiveru og veiði. Ánægjan af veiðiskapnum minnkar ekki með áunum og ég vona að ég fái notið hennar í mörg sumur til viðbótar. Ég reyni enn fyrir mér í ánni minni á sunnudaginn og svo taka Veiðivötnin við þann 11. Afkomendur móður minnar, Gunnþórunnar Klöru, ætla að hittast austur í Fljótshlíð á laugardaginn kemur. Þann 12. ágúst næstkomandi eru 100 ár liðin frá fæðingu hennar. Mér verður tíðum hugsað til hennar. Dillandi hlátursins og allra hennar gegnumheilu gæða. Þakklæti er mér alltaf efst í huga. Þakklæti fyrir allt sem ég henni að gjalda. Rólyndið, glaðlyndið og eðlisgreindina.

Eftir rigningu í morgun hefur glaðnað til. Kimi hnusar af blíðunni utandyra og ég er að dunda mér við ýmislegt sem gera þarf. Kannski skvettir hann úr sér seinnipartinn og þá gæti ég laumast út og kíkt eftir nokkrum ormum í viðbót. Lífið gengur sinn gang og ég hef ekki misst trúna á því þó ýmislegt sé mótdrægt eins og stundum áður.
Við kisi minn sendum ykkur öllum okkar bestu kveðjur, ykkar Hösmagi.

Lítið krútt og þolinmæði.

2009-07-29T02:02:00.000-07:00

Lítil afastelpa bættist í hóp afabarna Hösmaga gamla á sunnudaginn var. Sölvi og Helga eru nú orðnir ábyrgir foreldrar. Það er mér að sjálfsögðu mikið fagnaðarefni og ég sendi þeim og barninu mínar allra bestu árnaðaróskir. Gangur lífsins heldur áfram. Það er að vísu ekki gott ástand í þjóðmálum hér núna. Villuráfandi sauðir við stjórnvölinn og stjórnarandstaðan engu skárri.Og nú ætlar Björgúlfur Thor að "leita réttar síns" af því það eru allir að ljúga uppá hann. Hvernig væri nú fyrir stjórnvöld að taka á sig rögg og handtaka eitthvað af þessum samviskulausu bófum? Heimildirnar eru fyrir hendi en siðferðiskenndina virðist vanta alveg.
Ég átti veiðidag í gær. Það var þokkalegasta veður og þurrt framan af degi. Vatnið gott en má þó varla minna vera eftir nokkrar kaldar nætur í röð. Þetta varð viðburðaríkur og skemmtilegur dagur. Ég landaði fyrsta laxinum í Víkinni 1o mínútum fyrir 8. Milli klukkan 9 og 10 setti ég í 4 laxa en með einhverjum dularfullum hætti tókst þeim öllum að snúa sig af önglinum. Ég var þó arfaslakur yfir þessu. Miklu skemmtilegra að setja í laxinn þó hann sleppi heldur en að ekkert gerist. Ég náði svo þeim 6. uppúr 10 og fór heim með 2 laxa eftir fyrri vaktina, glaður í hjarta. Þessir laxar voru líka afar fallegir, þykkir og frekar stuttir. Klukkan 4 settist ég að í Klettsvíkinni. Viss um að hann biði eftir mér þar. Svo bara gerðist ekkert þrátt fyrir mína alkunnu snilld með prikið þarna. Ég yfirgaf þennan magnaða veiðistað og hélt uppá Miðsvæði. Þar var allt líflaust líka og Hrefnutangi vildi heldur ekkert gefa. Bak mitt er ekki nógu gott þessa dagana svo ég hélt aftur á dorg á mínum uppáhaldsveiðistað í Ölfusá. Ég var orðinn dasaðaur því mér tókst ekki að sofna í hléinu. Langaði mest heim en eitthvað hélt mér við ána. Ég lagði mig í klukkutíma í grænu þrumunni. Mókti smávegis. Þá var farið að rigna töluvert. Um áttaleitið settist ég aftur á árbakkann. Sömu rólegheitin. Ég nánast píndi mig til að sitja þarna áfram. Korter fyrir 10 var kippt tvisvar í línuna. Og aftur í næsta kasti. Mínúturnar liðu. Tveim mínútum fyrir kom eitt snöggt högg og ég sá sporð. Ég var nánast orðinn trylltur. Ég kastaði síðasta kastinu nokkrum sekúndum fyrir tíu. Færið stoppaði skyndilega en ég fann ekki fyrir neinu.Ofurvarlega reisti ég Herconinn og þá var togað á móti " Hann" var á. Það varð heilmikill darraðardans. Laxinn vildi niður ána en ég vildi hann uppá bakkann. Þetta var óvenjukraftmikill fiskur. Hann varð þó að láta í minni pokann því hann hafði rennt ánamaðkinum niður í maga. Tæplega 6pundari og jafnfallegur og morgunfiskarnir. Hösmagi hélt heimleiðis. Þolinmæðin hafði enn og aftur gefið honum fallegan fisk. Svona dagar gera lífið dásamlegt. Skyldi heilög Jóhanna nokkurntíma hafa kastað fyrir fisk? Það getur varla verið. Kimi fagnaði fóstra sínum að vanda. Ég kastaði teningunum nokkrum sinnum og lagðist í flet mitt rétt fyrir miðnættið. Nú er fremur þungbúið þó hann lafi þurr. Það mætti gjarnan rigna í dag. Fyrir bændur og maðkatínslumenn. Ég held mig að sjálfsögðu heima þessa komandi ferðahelgi. Uni mér næst á bökkum árinnar minnar á mánudaginn kemur. Bestu kveðjur til vina og vandamanna, ykkar Hösmagi.

Kjellingar.

2009-07-23T23:17:00.000-07:00

Mér finnst skrítið mannkyn, kvenkynið. Konur eru flestar grimmar. Mér finnst voða gott að búa einn með kettinum mínum. Engin að nöldra neitt í mér. Enginn að skipta sér af kaupstaðalykt, svitalykt eða skítalykt. Eða ilminum af vindlunum mínum. Friðurinn á heimili mínu er mér ákaflega mikils virði.Kvinnemennesker eru snillingar í að kveikja ófrið.Búa til vandamál úr engu. Ég er hér um bil viss um að ef hér hefði verið kvenmaður innandyra í morgun hefði hann kennt mér um norðanbálið utandyra. Hitinn lafir í 5 gráðum klukkan hálfsjö að morgni þess 24. júlí 2009. Ég er frjáls maður ennþá. Enginn skipar mér fyrir. Nema kannski Kimi sem vill mat sinn og eina og eina stroku eftir bakinu.Varla hægt að kalla það skipanir heldur einlægar bænir. Í gær lágum við í fleti okkar. Ég undir sænginni og Kimi ofan á mér. Hann lygndi aftur augunum á meðan ég lauk við Harðskafa Arnaldar. Hnoð, mal og vinátta. Ekkert nagg né jaggedíjagg. Þegar ég lokaði bókinni lét ég hugann reika. Leið alveg einstaklega vel. Mér komu ekki einu sinni aumingjarnir í landsstjórninni í hug. Steingrímur og sópriðillinn með silfurhærurnar.Vondar voru síðustu ríkisstjórnir. Núverandi stjórn er þó að mörgu leyti miklu verri.Meirihluti þingmanna VG hefur gengið í björg.Eða fram af þeim. Steingleymt öllu sem þeir sögðu fyrir kosningar.Ég þoli ekki óheiðarlegt fólk nú frekar en áður. Fólk skal þó ekki halda að skoðun mín á yfirnagaranum og draugnum hafi breyst. Verstu glæpamenn sem setið hafa að völdum á þessu kalda skeri. Í afmæli dótturdóttur minnar fyrir viku deildi ég við syni mína. Þeir eru báðir með ESB veiruna.Sem er náskyld verstu veiru sem hefur heltekið allt of marga hér á landi, Samfylkingarveirunni. Þetta var nú samt allt í góðu. Synir mínir komust að þeirri niðurstöðu að ég væri bara íslenskur sveitamaður. Það er líkast til rétt hjá þeim. Eða íslenkur heimilisköttur sem fer sínar eigin leiðir. Ég ætla að halda áfram að láta stjórnast af sannfæringu minni. Mér finnst vænt um börnin mín þó ég deili ekki skoðunum með þeim varðandi Evrópusambandið. Ég hef heldur aldrei valið mér vini eftir pólitískum skoðunum þeirra. Ég mun líka verða gagnrýndur harðlega eftir næstu bæjarstjórnarkosningar. Ég mun stuðla að falli núverandi meirihluta bæjarstjórnarinnar. Hann er óhæfur með öllu. Enda með Jón Hjartarson hægri gráan innanborðs. Ég hef aldrei gert meiri mistök á minni ævi en þegar ég kaus þann mann í bæjarstjórn. Ég er bláeygur. Mér hefur stundum orðið hált á að treysta fólki sem villir á sér heimildir. En til þess eru vítin að varast þau. Ég læta aðra um að kjósa VG í næstu bæjarstjórnarkosningum.

Enn svona í trúnaði ætla ég að segja ykkur soldið. Mér finnst nú vænt um sumar stelpurnar. Þær eru ekki allar svona eins og ég var að tala um. Ég er stoltur af dóttlu, Boggu og Helgu Soffíu. Bara montinn af að eiga svolítið í þeim. Mér er líka hlýtt til fyrrverandi ástkvenna minna. Það var ekki tómt jaggedíjagg. Líklega hef ég týnt hæfileikanum til að verða ástfanginn. Það er auðvitað leitt. En mér finnst enn ákaflega vænt um að fá að vera til. Fjórir dagar í laxveiði. Svo meiri laxveiði, urriðadans og enn meiri lax og aftur lax. Hún er flott rófan sem dinglar hér fram og aftur á borðinu. Eigandi hennar malar. Það sækir værð á okkur báða. Við sendum vinum okkar af báðum kynjum bestu kveðjur, ykkar Hösmagi.

Leti.

2009-07-20T22:58:00.000-07:00

Ég sé að það er hálfur mánuður síðan ég hef bloggað.Það hefur heldur varla verið veður til þess. Hitinn í gær var yfir 20 gráður í marga klukkutíma. Ég lauk við að mála vindskeiðarnar á bílskúrunum og það nægði til þess að ég fengi sting í mjóhrygginn aftur. Ég varð að laumast út í bæ og stela mér stiga til að geta lokið verkinu.Þetta var nytjastuldur sem er mun vægari glæpur en annar þjónaður.Ég slepp fyrir horn eins og svo oft áður. Veiðin í Ölfusá gengur bærilega. Nokkur dagaskipti eru þó þar eins og gengur. Í fyrradag komu 22 laxar á land en aðeins 8 í gær og heildartalan orðin 199 laxar. Að auki eru komnir hátt í 40 góðir sjóbirtingar, flestir á bilinu 2-7 pund. Undirritaður hefur veitt 3 slíka og búinn að éta yfir sig af þessum frábæra mat. Við feðgar áttum góða samveru við ána á fimmtudaginn var. Veiddum 5 laxa og 2 sjóbirtinga. Gátum vel við unað þó þetta væri minni afli en í fyrra.Ég á ekki veiði fyrr en eftir viku en er strax farinn að hlakka til dagsins.Við Sölvi skruppum í Veiðivötnin um næstsíðustu helgi. Veiddum lítið en nutum staðarins að venju. Þegar við yfirgáfum þessa paradís sunnudaginn 12. júlí var hitastigið um 24 gráður. Hin hefðbundna Veiðivatnareisa verður 11.- 13. ágúst og Sölvi verður fjarri góðu gamni. Hann þarf að sinna öðru mikilvægara á þessum tíma. Ég hef lambakónginn minn, Sigga Þráinn, mér til halds og trausts. Það er gott hlutskipti því það er vandfundinn skapbetri og ljúfari piltur. Hugur minn er sem sagt aðallega við Herconinn góða þessa unaðslegu sumardaga. Ég er orðinn góður af lurðunni frá því um daginn. Kimi hnusar nú af morgungolunni og ég sötra síðustu dropana af kaffinu. Ég er búinn með Bettý og les nú Harðskafa og þá er Arnaldi lokið að sinni. Ég sendi honum góðar kveðjur með þökk fyrir skemmtunina. Ég og Dýri sendum okkar bestu kveðjur til allra vina, ykkar Hösmagi.

Sópriðlar.

2009-07-07T02:50:00.000-07:00

Margir kannast við það sem danskir kalla hekseskud. Ég kalla það nornaskot.Ein þessara kústríðandi kvenmanna fretaði á mig á laugardaginn. Ég dróst við illan leik til veiða á sunnudaginn. Ég var á að líta eins og níræður öldungur, boginn eftir strit ævi minnar. Eftir hádegið fór ég upp í Haukadal á fjölskyldufund í Gunnarslundi. Það var indælt að venju nema hvað mjóbakið var að kvelja mig. Það sótti líka á mig syfja og slappleiki.Ég fór í fletið klukkan átta og sveif inní draumalandið. Svaf í 8 tíma sem er óvenjulegt, einkum á þessum árstíma. Illu heilli dreif ég mig á fætur og fór út í mína daglegu morgunreisu. Þegar heim kom tók rúmið við mér á ný. Ég var að mestu rænulaus í gær. Mókti og var með daufri rænu annað slagið.Eiginlega tilverulaus eins og þegar skáldið mitt annaðist mig í Lögmannsundi á Þorláksmessu 2004. Matarlystin er horfin. Sem ég má síst við. Lítil löngun í reykinn frá Bagatelló sem gerir ekkert til. Mér finnst það eiginlega svindl að verða veikur á þessum árstíma. Bara hreint ómark. En allt lagast. Ég ætla að halda mig nálægt rúmi mínu í dag. Kíkja öðru hvoru í Konungsbók Arnaldar sem er tíunda bókin sem ég hef lesið eftir hann á stuttum tíma. Þá á ég bara Betty og Harðskafa eftir. Mikilvægast er að ég nái minni góðu heilsu á ný. Hinn rómaði 3jastangadagur er ekki fyrr en þann sextánda og þá vil ég vera eiturhress. Það gæti sem best orðið löndunarbið þann dag eins og í fyrra. Hugsanlega fer ég í Veiðivötn með skáldinu mínu í millitíðinni en það er þó óráðið enn.Þetta er minn tími. Tími brauðs og leikja og afarvont að trufla hann með nornapest. Þó ég sé enn slappur er ég þó að lagast og tel mér trú um að ef ég held mig nælægt fleti mínu verði ég orðinn sæmilegur á morgun. Kimi hefur verið á göltri út og inn í nótt og hvílir nú lúna fætur í gamla tágastólnum. Það hefur skeð áður. Ég skora á sópriðlana að sjá til þess að ég endurheimti heilbrigði mitt í dag. Nær að stinga landsfeður okkar en blásaklausan heiðurmann eins og Hösmaga gamla. Ég vil kraft minn aftur og volæðið burt. Við rauðskinnarnir sendum okkar bestu kveðjur til allra vina. Ykkar Hösmagi.

Endurtekið efni.

2009-07-03T03:57:00.000-07:00

Á þriðjudaginn var sat ég í sófanum í bílskúrnum, hnýtti tauma og skipti um línu á veiðihjólinu. Kimi kom í gáttina og fylgdist með. Ég held að hann hafi vitað hvað til stóð hjá mér daginn eftir. Fóstri hyggði á veiðar. Um kvöldið kom hann með bráð sína inní íbúðina við lítinn fögnuð minn. Ég á erfitt með að skamma dýrið mitt en ítrekaði að ég vildi ekki að hann dræpi fugla. Lét þar við sitja. Kannski á ég engan rétt á að skamma hann fyrir það sama og ég geri. Veiðieðlið í okkur báðum. Ég hélt svo að bakka Ölfusár þann 1. júlí. Áin hafði litast verulega vegna hitastigsins. Það virtist lítið um fisk og ég varð ekki var fyrir hádegið. Eftir miðdegisblundinn hélt ég svo á efra svæðið og laxinn tók á slaginu 4. Ekta 5pundari sem er sannarlega ekkert slor. Ég náði svo öðrum um sjöleytið og var orðinn alsæll með feng dagsins. Þegar heim kom hnusaði kötturinn af pokunum. Fóstri með 2 og hann bara einn. Um ellefuleitið um kvöldið hvarf Kimi út í sumarnóttina. Um morguninn var komið annað lík inní húsið. Hann hafði jafnað metin. Hann hlustaði á föðurlegar átölur en ég efast um að hann láti sér segjast. Ég verð líklega að leyna áformum mínum varðandi næsta sunnudag. Fara með áætluð laxadráp eins og mannsmorð. Það var svo laxaveisla hjá mér í gærkvöldi. Ég er enn pakksaddur eftir kvöldmatinn í gær. Held svo áfram að borða lax þegar líður á daginn. Það var rólegt yfir veiðinni í gær en menn settu þó í nokkra laxa en þeim tókst öllum að sleppa. Hitinn er nú alveg við 20 gráður og mér sýndist veiðimenn vera fremur rólegir við fljótið í morgun.Þessi fallegi dagur er kærkominn eins og allir hinir. Nóttlaus veröld enn og ég nýt hennar sannarlega. Hyggst ljúka við að bera á vindskeiðarnar á bílskúrnum ef mér tekst að stela mér stiga eins og gerði forðum þegar ég læsti mig úti og komst að lokum inn um svaladyrnar. Ég talaði við báða syni mína í gær og þar kom veiði við sögu. Við feðgar ætlum allir að ná okkur í fisk um helgina. Mér líður vel yfir að hafa átt þátt í að þeir stunda báðir þessa indælu sumariðju eins og faðirinn. Ég er í pólitísku bloggfríi og reyni að ýta þessari sóðatík til hliðar úr hugskoti mínu. Ég hlutaði þó á frábæra ræðu Ögmundar í þinginu í gær. Hún var svo góð að Steingrímur þoldi ekki við og yfirgaf hinn bólstraða ráðherrastól sinn.

Hér er skrúfað fyrir alla ofna og svalara innandyra en utan. Kimi lúrir í gamla tágastólnum. Sennilega dreymandi um bráð hér í grenndinni. Kannski legg ég mig líka á eftir og læt mig dreyma um laxfiska og annað ljúft og skemmtilegt. Kveðjur frá okkur veiðiverum, ykkar Hösmagi.

Fiskinn minn...

2009-06-28T02:08:00.000-07:00

nammi nammi namm. Í gær voru 36 ár liðin frá því ég veiddi fyrsta laxinn minn. Og 22 ár frá stórveiðinni á halta hanann. Þessi afmælisdagur föður míns sæla hefur löngum reynst mér drjúgur við veiðiskapinn. Það hefur verið ljúft að koma að ánni undanfarna góðviðrisdaga. Hitinn hér er nú kominn í 18 gráður og þetta gæti orðið heitasti dagur ársins til þessa hér á Selfossi. Að kvöldi gærdagsins voru komnir 14 laxar á land úr fljótinu mínu góða. Ekkert mok en vel ásættanlegt í júnímánuði.Ég hygg gott til glóðarinnar næstkomandi miðvikudag. Ákveðinn í að gefa túpunni góðan tíma. Fyrst verður það æskrím étur hann, síðan rauða hættan, Kolskeggur og Collie dog. Það voru stórveiðimenn sem hófu veiði í morgun. Fremstir í fylkingu Viktor Óskarsson og Sveinn Þórarinsson. Veðrið frábært og vatnið eins og það best getur orðið. Það er svo spáð rigningu seinnipartinn og kannski get ég önglað upp nokkrum ánamöðkum eftir miðnættið. Þrátt fyrir kreppu, stjórnvöld sem ég hef orðið fyrir vonbrigðum með og óskemmtilegar spár um framtíðina ætla ég að njóta þessa sumars. Ekki hleypa neinu volæði að.Veiða sem mest í byggð og til fjalla. Mér fannst um daginn eins og áhuginn væri að dofna. En Tangavatnsförin sannaði annað. Það var ljúft að renna í Veiðivötnin á mánudaginn var. Hitti Bryndísi vinkonu mína. Veiðivörðinn sem alltaf virðist vera í góðu skapi. Einnig nokkra veiðimenn sem voru alsælir með tilveruna í paradís hálendisins. Afli ágætur og veðrið sömuleiðis. Og græna þruman naut sín vel í þessum ágæta túr. Ég held að þessi ólmi gæðingur hafi glaðst yfir að koma mér inní draumalandið í Veiðivötnum þó Herconinn hafi verið skilinn eftir heima. Hans tími kemur á miðvikudaginn. Kimi nýtur tilverunnar til fullnustu þessa yndislegu sumardaga. Hnusar af grösum og er ekkert mannlegt eða dýrslegt óviðkomandi.Hann var nálægt fóstra sínum á föstudaginn þegar við tókum aðra yfirferð á bílskúrnum. Nú er guli liturinn horfinn og engin eftirsjá að honum. Ég mála svo vindskeiðarnar í vikunni.Það er semsé allt hið besta að frétta úr Ástjörn 7. Annað kvöld koma svo Sölvi og hin þungaða heitmey hans til landsins. Brauð og leikir sumarsins í algleymingi á næstunni og bágindi og kreppa send út í hafsauga. Ég og Dýri sendum nóttlausar sumarkveðjur til allra vina, ykkar Hösmagi.

Mjór er.....

2009-06-22T02:50:00.000-07:00

mikils vísir. Fyrsti laxinn úr Ölfusá þetta sumarið kom á land í gær. Veiddist í Víkinni á seinni vaktinni. Hann var 3 kg. og 72 centimetrar og því fremur mjósleginn. Fallegur fiskur samt sem áður. Ég held að mokið byrji ekki fyrr en 1. júlí. Þá ætlar undirritaður að planta sér á bakkann og róta upp laxfiskum. Stórum aðallega, en smærri í bland. Fátt er meira lostæti en nýveiddur fimmpundari úr Ölfusá. Áin er tær og fremur lítið í henni. Þetta er þó sama stórfljótið og áður og lítil hætta þó þurrkatíð verði. Nú er bara vika í skáldið og heitkonuna og aldrei meiri spenningur en nú að hitta þau.Litlan fylgir með. Ljúfir dagar framundan og jónsmessunóttin að bresta á. Það skyggir aðeins svona í hálftíma eftir miðnættið og þá er albjart aftur. Ég mun seint þreytast á að dásama þennan árstíma. Hina nóttlausu voraldar veröld. Það er þess virði að þrauka af vetur og vond stjórnvöld til að upplifa enn eitt sumar á ísaköldu landi. Ef spáin gengur upp fer ég í maðkinn þarnæstu nótt. Það er veiðiskapur út af fyrir sig. Skæð beita, maðkurinn. Það er líka óhemjuskemmtilegt að veiða á túpuna og spúninn.Það er bara óskaplega gaman að veiða. Ég er einkar stoltur yfir að hafa smitað syni og sonarsyni af þessari bakteríu. Hefði örugglega getað gert þeim eitthvað verra. Nú er Kimi mættur inn aftur og varla friður við tölvuna. Malar og vill endilega þrífa skegg mitt. Gott að eiga svona góðan félaga þó ekki sé hann margmáll. Skilur þó margt sem ég segi við hann. Að mestu þægur og hlýðinn. Og svona allt í einu. Eftir símtal er Veiðivatnaför afráðin í dag. Það verður yndislegt að koma inneftir í þessa margrómuðu paradís. Sem sagt gott og bestu kveðjur, ykkar Hösmagi.

Líf.

2009-06-15T07:44:00.000-07:00

Ég var eiginlega búinn að afskrifa Tangavatn. Tómar hrakfarir þangað síðustu árin. Á föstudaginn hringdi ég í frúna og hún sagði mér að þokkalega hefði veiðst á miðvikudaginn. Ég væri velkominn án endurgjalds. Þegar ég fór út í bílskúr víbraði Herconinn og græna þruman brosti með öllu heila grillinu. Þegar ég kom í hlaðið á Galtalæk var farið að rigna þónokkuð. Fremur hlýtt svo það skipti ekki öllu. Tveir veiðimenn úr Sandgerði nýfarnir með 8 fiska sem höfðu tekið spún. Ég hélt glaðbeittur að vatninu og setti undir bus spesial. Sígildur spónn bæði á lax og silung. Fljótlega tók fiskur. Rétt náði spæninum upp við landið. Tveggjapundari sem hefur ekki ætlað að missa af þessu hnossgæti því ég var lengi að losa hann af. Fljótlega setti ég í annan en hann spýtti spæninum út úr sér. Það var kviknað í mér. Loksins, loksins eitthvert líf. Hálftími leið. Setti rækju undir en ekkert gerðist. Ég reyndi aðra spúna með engum árangri. Eftir 2ja tíma barning færði ég mig í austurenda vatnsins. Kastaði spinner og sá fiskinn elta. Bus spesial, salamander og fiskurinn kom bara í humátt á eftir. Þá var bara eftir að kasta rauða hammernum. Stundum reynst ómótstæðilegur. Brátt hafði 3ja pundari bætst við. Og svo kom sá þriðji, líka nokkuð vænn. Það var fjör næsta hálftímann. Margir tóku grannt og burgu lífinu. Ég hélt heim síðla dags með fallega veiði. Þetta var góður dagur og vatnið eins og ég þekkti það í gamla daga. Hér hefur verið silungsveisla frá því á laugardagskvöld. Svo styttist ört í laxinn. Gamli veiðimaðurinn er glaður í hjarta. Vertíðin rétt að byrja og Tangavatnsferðin var bara fyrirboði um það sem kemur.
Ég nenni ekki að blogga um pólitíkina. Sennilega best að gefa henni frí út vertíðina.Í fyrsta sinn í langan tíma steig ég á baðvigtina í gær. Mér er öfugt farið við marga aðra um að vera í sífelldri baráttu við að halda holdum. Ég varð alveg gólandi glaður þegar ég sá að ég er orðinn yfir 70 kíló. Það hefur ekki gerst í nokkur ár. Þetta er bara andskoti efnilegt. Kannski er það bandaríski kornmaturinn, kanilsnúðar og kleinur sem gera þetta að verkum. Þó hef ég líklega létst um nokkur grömm í morgun. Ég fór á spítalann og lét skera smáflyksu úr vinstri löppinni. Kunni ekki við að hafa hana þarna. Saumarnir verða svo teknir í næstu viku.Ungi doktorinn gerði þetta af stökustu vandvirkni og ég hélt glaður á brott og fékk mér kaffi hjá Grétu. Sá rauðbröndótti liggur hér á gamla tágastólnum og sefur fast. Ég ætla að bregða mér bæjarleið í góða veðrinu. Sækja mér meira lestrarefni á bókasafnið góða sem nú heldur uppá 100 ára afmælið. Með bestu kveðju frá mér og ketti mínum, ykkar Hösmagi.

Stilla.

2009-06-08T22:26:00.000-07:00

Gúrkublogg.Klukkan er nú hálfsex að morgni þess 9. júní anno 2009.Það bærist vart hár á höfði. Fremur þungbúið og hitastigið enn undir 10 gráðum. Við Kimi vöknuðum of snemma í morgun. Eða nótt öllu heldur. Ég hleypti dýrinu út í blíðuna og hélt síðan sjálfur sömu leið eftir kaffi og Bagatelló. Ölfusá er ákaflega falleg í dag og veiðileg mjög. Tæpar 2 vikur í að aðallinn í félaginu, ásamt bæjarstjóranum, renni færum sínum í fljótið góða. Undirritaður byrjar svo 1. júlí og mér segir svo hugur að mín alkunna snilld með Herconinn muni bera góðan árangur í sumar. Þá er ég þess fullviss að línur okkar feðga muni stengjast verulega á hinum rómaða 3ja stangadegi þann 16. Það er tilhlökkun í huga gamals veiðimanns. Veiðivötnin eru strax farin að toga og mér finnst líklegt að ég skjótist inneftir fljótlega. Nú er ég ekki bundin af starfi og get valið mér fallegan dag. Græna þruman er alltaf reiðubúin. Svo stendur til að mála bílskúrana hér við blokkina. Í runinni einungis til að breyta litnum svo þeir verði í stíl við blokkina sjálfa. Mig klægjar í puttana eftir að hefjast handa. Okkur Kimi líður einstaklega vel hér og því betur sem lengra líður.
Það gengur heilmikið á í pólitíkinni. Ég ætla þó að verða nokkurnveginn stikkfrí með hana í bili. Mér verður þó hugsað til eins víkinganna sem ég sá nýlega í sjónvarpinu. Brosandi út að eyrum með spúsu sinni um borð í einhverri snekkjunni. Þetta er eigandi Novators sem fékk stórt lán frá Landsbankanum í London. Icesave lán sem við eigum svo að borga. Rannsókn á glæpaverkum þessa hyskis er með hraða snigilsins. Enginn hefur verið settur í járn ennþá þó lagaheimildir séu til staðar.Engar eignir hafa verið frystar þó sömu lagaheimildir heimili það. Ég hef ekki enn afskrifað þessa ríkisstjórn endanlega. Samt ósáttur við mjög margt sem hún er að gera og lætur ógert.
Ég sagði ykkur um daginn frá hinni dularfullu hljómkviðu sem reyndist vera eitt laganna í júróvisjón söngvakeppninni. Fyrir nokkrum dögum gerðist svipað nema að það er varla hægt að segja frá því kinnroðalaust. Ég sat í makindum í stól mínum í stofunni. Gott veður og svaladyrnar galopnar. Þá heyri ég alltíeinu hljóð. Stundum kallað svefnherbergishljóð. Þetta var einhverntímann um kvöldmatarleytið og mér fannst þetta dularfullt.Voru þetta grannar mínir að drekka eitthvað annað en malt? En fljótlega komst ég að raun um að þetta var inní íbúðinni. Einhver skötuhjú að fremja dodo einhversstaðar og hljóðvörpuðu athöfninni í tölvuna mína. Þessi verknaður hefur verið vellukkaður því miklar voru stunurnar. Ég slökkti áður en leiknum lauk og hef það nú sem reglu ef ég vil ekki hafa hljóðið á tölvunni.
Kimi dormar nú með hausinn út um gluggann. Nú verður notalegt að skríða uppí aftur, lesa nokkrar blaðsíður og dorma svo í klukkutíma. Pappírsvinna framundan. Við vinirnir sendum ykkur öllum bestu kveðjur úr morgunkyrrðinni, ykkar Hösmagi.

Fúll á móti.

2009-05-31T01:56:00.000-07:00

Ég er hundfúll. Ég er á móti íhaldinu. Og framsókn. Svo er ég enn meira fúll út í samfylkinguna. Og andskoti fúll út í vinstri græna. Ég er rosalega fúll út í Evrópusambandið. Ég þoli ekki Össur, Árna Pál, Jóhönnu, Dag né restina af þingmannaliði SF. Ég þoli ekki Jón Bjarnason, Árna Þór Sigurðsson né ýmsa aðra í VG.Þetta er nú meiri fýlan svona á Hvítasunnudegi. Mér finnst enn vænt um Guðfríði Lilju, Ásmund, Atla og Ögmund. Þetta er alveg voðalegt ástand.Það breytist ekkert við nýja ríkisstjórn. Tími Jóhönnu og Steingríms er liðinn. Þau munu samt stritast við að sitja eins og Njáll forðum. Á fundi í Háskólabíó rétt fyrir kosningar var Steingrímur spurður út í verðtrygginguna. Hann sagðist vilja afnema hana og fékk lófaklapp fyrir. Nú er hann fjármálaráðherra og var að hækka vindlana mína, blessað brennivínið og bensínið á bílana mína. Lánin hækkuðu um 8 milljarða í leiðinni af þessum sökum. Verðtryggingarþjófnaðurinn blómstrar sem aldrei fyrr.Það er engin ný hugsun hjá þessari voluðu ríkisstjórn. Aðgerðirnar eru bara til að hleypa illu blóði á þá sum kusu stjórnarflokkana. Nema auðvitað sauðina sem allt láta bjóða sér. Svo er mér líka meinilla við bæjarstjórnina hér í Árborg. Það er alveg hroðalegur söfnuður. Sumir jafnvel vitlausari en Jón forseti. Varla hægt að komast mikið neðar. Meirihlutinn reynir að bera sólskinið í fötum inní Ráðhúsið. Svo botnar hann ekkert í öllu myrkrinu innandyra. Þegar andstæðingar þessa alræmda meirihluta reyna að koma vitinu fyrir hann þá er forsetinn mikli látinn skrifa grein í blöðin.Góð og gild rök andstæðinganna heita skætingur á máli forsetans. Skólarnir á Árborgarsvæðinu tóku ekki þátt í Skólahreysti í vetur. Það var ekki til aur til að borga rútu undir krakkana í bæinn. Á sama tíma styrkti meirihluti bæjarstjórnarinnar merarkóngana hér um margar milljónir. Svo veltast þeir um og brosa breitt í sjálfumgleðinni. Kannski er ég óhæfur til dvalar í mannlegu samfélagi vegna réttlætiskenndar sem sífellt er að flækjast fyrir mér.
Það er mikið grasveður hér. Miklar regnhvolfur annað slagið og svo skín sólin inná milli. Hún fer ekki í manngreinarálit og dembir sér yfir rangláta og réttláta í senn. Síðasti dagur maí í dag og unaðslegasti árstíminn framundan. Mörg tilhlökkunarefni þrátt fyrir voluð og vond stjórnvöld. Silungur og lax í sjónmáli með tilheyrandi útiveru. Mest hugsa ég þó um komu nýs barnabarns í heiminn. Það verður indælt þó heimurinn sé eins og hann er. Ég ætla að halda fýlunni í skefjum það sem eftir lifir dagsins. Kimi tollir ekki inni þó hann helli svolítið úr sér. Við höfum það ljúft saman. Ég ætla að leggja mig aftur og láta mig dreyma. Eitthvað fallegt í ógleymi rænuleysisins. Við rauðstakkar sendum vinum okkar bestu kveðjur, ykkar Hösmagi.

Þorskur.

2009-05-22T01:15:00.000-07:00

Við Maggi fórum á sjó á þriðjudaginn var. Það var sól og blíða og frekar fámennt en góðmennt um borð. Við drógum bæði þorsk og ufsa úr hafdjúpunum. Ég held að við höfum fengið 13 fiska. Hvað annað? Þetta var indælis túr og nú er ég kominn á bragðið. Það var bara gerfibeita á færinu. Rauðar, grænar og gular plastlufsur við krókana.Næst þegar ég fer á sjó ætla ég með niðurskorinn makríl eða síld með mér. Ég át þverskorinn þorsk í gær. Kartöflur og smjér með og varð ákaflega gott af. Við Maggi höfðum fyrrverandi ráðherra á milli okkar við dráttinn. Framsóknarkonuna Siv Friðleifsdóttur. Hún er greinilega þaulvön skakinu og var hin ljúfasta í viðmóti og tali. Eftir nokkurn tíma sá hún að fiskarnir tóku gulu lufsuna fram yfir þá rauðu. Hún var með rauða og græna lufsu og það var því eðlilegt að skipta um. Ég sagði að hún veiddi ekkert á vinstrigræna gerfibeitu. Hún svaraði fáu og ég áttaði mig fljótlega á að fammararnir eru hrifnir af græna litnum. Þetta var semsagt skemmtileg tilbreyting en auðvitað tapaði ég þeim stóra. Ég vissi aldrei hvað var á króknum því ferlíkið losnaði af áður en ég næði að sjá það. Næst kræki ég í steinbít og stórlúðu. Ekki nokkur spurning. Það hefur verið dásemdarveður hér undanfarna daga. Bjart yfir og vel hlýtt. Spáir rigningu um helgina og ég drattast þá kannski við að ljúka ýmsum verkum hér heimafyrir. Nú er rúmur mánuðir í laxinn og þeir eru farnir að sjá hann í Laxá í Kjós. Ölfusá tær og falleg þessa dagana og ég hygg gott til glóðarinnar. Það er ró og friður hér og Kimi lúrir í gamla tágastólnum. Það er vorhugur í okkur báðum. Hann hefur nú látið af fuglaveiðum, a.m.k. í bili. Ég las honum pistilinn í hittafyrra og þetta er skynsamur og tillitssamur köttur. Skilur ýmislegt og finnst vænt um fóstra sinn. Það er gagnkvæmt. Bestu kveðjur frá báðum, ykkar Hösmagi.

Ömurð.

2009-05-18T23:31:00.000-07:00

Ég fylgdist með stefnuræðu Jóhönnu og umræðum um hana í gærkvöldi. Ég óttast að þessi ríkisstjórn sé feig. Ég varð fyrir vonbrigðum með Jóhönnu. Kannski var ekki við neinu að búast. Ekki orð um neinar raunhæfar lausnir á vanda þjóðarinnar. Og reyndar engin stefna í efnahagsmálum. Ef fram fer sem horfir eigum við að borga allar skuldir útrásarvíkinganna með vöxtum og vaxtavöxtum. Það mun taka okkur, börnin okkar og barnabörn marga áratugi. Mestur hluti ræðunnar fór í að mæra Evrópusambandið. Þar er allt umvafið rósrauðum skýjum. Með umsókninni einni erum við búin að leysa hálfan vandann og þegar við verðum komin inn er allt í blóma hér. Við munum stjórna fiskveiðistefnu ESB, vextir við núllið og verðbólga engin.Það er eins og Jóhönnu sé algjörlega hulið að þjóðin er þverklofin í málinu. Bloggvinkona mín á Moggablogginu, Guðfríður Lilja Grétarsdóttir, varð að benda forsætisráðherranum á að það eru 2 flokkar í ríkisstjórninni. Yngsti þingmaðurinn, Dalabóndinn Ásmundur Daðason, líka bloggvinur minn, tók í sama streng. Það er skelfilegt að hugsa til þess að meirihlutastjórn vinstriflokkanna skuli fara af stað með þessum hætti. Allt bendir nú til þess að þingsályktunartillagan um aðildarumsókn verði felld í þinginu. Það væri miklu nær að leggja málið í dóm þjóðarinnar strax. Ef þingsályktunartillagan yrði samþykkt, sem litlar líkur eru á, myndi allur krafturinn fara í þær. Kraftur, sem við verðum að nota í allt aðra hluti. Einstefna og hroki samfylkingarinnar geta reynst okkur dýr ef ekkert breytist frá því í gærkvöldi. Ég er alls ekki að halda því fram að allt sé glatað þó við sækjum um. En það er fáránlegt að ætla sér að reyna að telja fólki trú um að allt leysist ef við göngum í ESB. Matur á spottprís og efnahagsmálin leyst til framtíðar. Hið sögulega tækifæri er að renna okkur úr greipum. Ég óttaðist það reyndar löngu fyrir kosningar. Það var alveg ljóst í mínum augum að flokkarnir gátu ekki náð saman í ESB málinu. Til þess hefði annarhvor flokkurinn þurft að byrja á að svíkja kosningaloforð sín. Það er ekki gæfulegt upphaf ríkisstjórnar að taka fyrstu skref sín þverklofin í jafn stóru máli og ESB málið er. Láta það velta á afstöðu annara flokka hvert framhaldið verður.Því miður verður líkleg niðurstaða af ESB trúboði SF að þessi stjórn andist langt fyrir aldur fram. ESB málið var bara eitt af mörgum kosningamálum síðustu kosninga og engin afgerandi niðurstaða kom fram.Flokkarnir 2 sem höfðu sérstaklega gert ályktanir um að við værum betur sett utan ESB fengu 30 þingmenn og eini flokkurinn sem lagði mikla áherslu á aðild fékk 20 þingmenn. Framsókn opin í báða enda að venju.Eina raunhæfa lausnin eins og nú er komið er að gefa þjóðinni kost á að ákveða í þjóðaratkvæðagreiðslu hvort sækja skuli um aðild eða ekki. Í þeirri kosningu er ekkert annað undir. Ekkert uppgjör í flokkapólitíkinni. Þá verður friður til að ráðast af fullum krafti í uppbyggingu að nýju. Það mun takast ef þjóðin stendur saman og nýtir sameiginlega krafta sína til þess.
Ég ætla á sjó seinnipartinn í dag og hlakka til. Sólin komin hátt á loft. Það er þó talsverð gjóla og ég vona svo sannarlega að það lægi. Ég hef ekki oft komið á sjó en nógu oft til að verða bullandi sjóveikur. Það er hrein andstyggð og það bara má ekki skemma fyrir mér þessa skemmtilegu tilbreytingu. Ég fór á bókasafnið í gær og rakst þar á stóru brandarabókina. Las fyrsta brandarann og fannst hann góður. Nú er ég búinn með 50 síður og enn er bara þessi fyrsti þess virði að lesa hann. Hann er um hárskerann sem var að klippa prest. Þegar hann var búinn vildi hann ekki taka greiðslu fyrir klippinguna. " Nei, séra minn. Þú þjónar guði og ég tek ekki við greiðlsu frá honum." Daginn eftir voru 12 biblíur á tröppunum hjá honum. Nokkrum dögum síðar kom lögreglumaður í klippingu. Rakarinn vildi heldur ekki greiðslu frá honum." Nei, herra lögregluþjónn. Þú verndar mig og fjölskyldu mína." Daginn eftir voru 12 kókosbollur á tröppunum. Þarnæsta dag kom lögfræðingur í klippingu. Enn og aftur vildi hárskerinn enga greiðslu. " Nei vinur. Þú þjónar réttarkerfinu. Næsta dag mættu 12 lögfræðingar í klippingu. Kannski verður klippari með okkur lögmönnum á sjó í dag?
Viði Kimi, rauðir innst sem innst, sendum vinum okkar bestu kveðjur, ykkar Hösmagi.

Hlýja.

2009-05-17T02:16:00.000-07:00

Í pistlinum um hina dularfullu hljómkviðu var ég að óska eftir 15° til viðbótar hitastiginu. Nú hefur draumurinn rætst og hitinn er nú nákvæmlega 18,2 gráður. Laufin hellast á trén og allt grænkar. Þessi dularfulla hljómkviða reyndist vera júróvísjón lag eins og mér datt í hug. Þetta var lagið sem keppti um annað sætið við lagið hennar Jóhönnu. Lag Azerbaijan, always in my mind. Það hljómar annað slagið í hausnum á mér. Það hverfur út í eterinn bráðum eins og flest lögin. Eitt og eitt lifir og verður klassík eins og Bítlarnir. Þegar ég var að strjúka grænu þrumunni framan við bílskúrinn áðan renndi til mín veiðimaður sem ég þekki. Ég minntist á stórurriðann sem veiddist í Þingvallavatni um daginn. Hann sagði mérað stórurriðinn væri orðinn eitraður af kvikasilfri. Kvikasilfri frá virkjunum á Hellisheiði. Illt ef satt reynist. Sýnir enn og aftur hvað við þurfum að fara varlega í náttúrunni. Við eigum auðvitað að nýta okkar auðlindir. En það er viturlegra að hugsa áður en framkvæmt er. Það er ömurlegt til þess að hugsa að fyrir 50 árum tókst hérumbil að útrýma þessum urriða með eitri. Eitrið var notað á mývarginn sem var uppistaðan í fæðu urriðans. Nú er eitrunin af öðrum toga en samt af mannavöldum. Eftir nokkur ár, sennilega bara örfá, verður óbeislaða orkan í vatnsföllum okkar orðin margfalt verðmætari en nú. Olían gengur til þurrðar að lokum. Þessvegna eigum við alls ekki að byggja fleiri álver. Álver í eigu útlendra auðhringa sem fá rafmagnið okkar á gjafverði og flytja mestallan arðinn úr landi. Auk þess skilja þeir eftir sviðna jörð í löndunum sem afla þeim súrálsins.Það er eðli auðhringa að hámarka gróða sinn og þeim er nákvæmlega sama um allt annað. Nú heimtar bæjarstjórinn í Reykjanesbæ nýtt álver þar. Þessi náfrændi þjófsins sem nú situr á þingi fyrir okkur sunnlendinga er maður einkaframtaksins. Framtaksins, sem nú hefur gert þennan bæ að skuldsettasta sveitarfélagi landsins. Hann hefur selt nánast allt sem hægt er að selja. Vinum sínum húsnæði bæjarins og leigir svo þetta sama húsnæði af þeim. Atvinnuleysi er helmingi meira þar en annarsstaðar. Þetta er nú aldeilis vitnisburður um góða stjórn. Enda var þessi bæjarstjóri lengi aðalsprautan hjá Stjórnunarfélagi Íslands. Nóg um þennan bæjarstjóra að sinni.
Kimi sefur. Glugginn var opinn í nótt og kauði var á næturgöltri meðan fóstri svaf svefni hins réttláta. Ég vona það a.m.k. Nú eru 2 dagar í þann gula og sex vikur í laxinn. Silungurinn kemur svo í millitíðinni og inná milli í sumar. Brauð og leikir þrátt fyrir kreppu. Stundum verð ég hugsi yfir duttlungum tilverunnar. Tilviljunum að því er virðist en þó býr alltaf eitthvað undir. Lífið heldur áfram og mér finnst enn afar vænt um það. Bjartsýnismaður verður seint kveðinn í kútinn. Bestu kveðjur frá okkur Dýra, ykkar Hösmagi.

Sumarþankar.

2009-05-14T02:31:00.000-07:00

Það er sólskin og blíða. Þrettán gráður og rokið á undanhaldi. Græna þruman aldrei flottari en nú eftir sápuþvott í morgunsárið. Litbrigðin í sanseruðu lakki verða margbreytileg í sólskininu. Þegar ég lagðist í flet mitt klukkan hálftólf í gærkvöldi var enn allbjart og albjart þegar ég vaknaði aftur um klukkan 5. Dýri kann sér ekki læti yfir dásemdum tilverunnar hér fyrir utan blokkina. Ég lét loks verða af að hringja í lögmannafélagið í morgun. Sá mjög góða spá fyrir þriðjudaginn og nú er bara að hlakka til. Vonandi verður sá guli við. Ufsinn þykir geysilega skemmtilegur á stöngina og hann getur orðið mikill að vöxtum. Svo er það auðvitað ýsan, soðningin sjálf. Ég bauð Magnúsi með mér og hann varð kátur. Tjáði mér að hann hefði fengið steinbít í fyrra og það hefði ekki verið mjög leiðinlegt. Þegar ég var smápolli veiddi ég oft kola á bryggjunni í Þorlákshöfn. Stöku marhnútur gæddi sér líka á beitunni. Bjarni Sæmundsson sagði að það væri góður matfiskur en ekki étinn.Það er semsagt kominn fiðringur í gamlan veiðimann. Nú er ég kominn með Garmin leiðsögutæki í þrumuna og verð ekki í vandræðum með að rata á nýjar veiðislóðir í sumar. Í tækinu er bæði Evrópukort og Íslandskort. Þetta er ótrúlega snjallt og jafnvel tækniauli eins og Hösmagi var fljótur að læra á það. Það er létt yfir okkur Kimi. Hann er nú lagstur hér á borðið og finnst ekkert eðlilegra. Mal og kumr yfir samveru með fóstra sínum. Tími Hösmaga er kominn. Hin nóttlausa voraldarveröld er að ganga í garð. Landið mitt eins og það er dásamlegast. Ég ætla að njóta þess út í ystu æsar á næstunni. Bestu kveðjur frá okkur fósturfeðgum, ykkar Hösmagi.

Hér er........

2009-05-11T06:30:00.000-07:00

súld og svínarí, en sól í Skagafirði, stendur í einni vísu Langa-Sveins. Það er hinn forni lokadagur vertíðar í dag. Skyldu sægreifarnir muna eftir deginum? Við Kimi höfum að mestu verið innandyra í dag. Svona drungi getur orsakað myglubletti á sálinni. En þeir verða ekki varanlegir því spá næstu daga er góð. Austanátt og sólskin með hlýindum. Kominn tími til eftir norðangarrann í síðustu viku.
Við fengum nýja ríkisstjórn í gær. Ég er hæfilega bjartsýnn á langlífi hennar. Það er líka afar sérstætt við stjórnarmyndun að flokkarnir séu nánast alveg á öndverðum meiði í stóru máli. Kannski var þetta eina lausnin sem til var til að ná samkomulagi.En SF er ólíkindaflokkur sem ég treysti svona mátulega. Vona samt að þessi stjórn nái árangri í endurreisnarstarfinu sem framundan er. Landið í rústum eftir óstjórn íhalds og framsóknar. Síðasta ríkisstjórn var nú ekki beysin heldur og þar ber SF mikla ábyrgð.
Á laugardaginn fór ég í bæinn að sjá Draumalandið. Þetta er merkileg og góð kvikmynd. Mér duttu margir pistlarnir mínir í hug. Pistlar, sem ég skrifaði þegar mest gekk á þarna fyrir austan.Þegar við verðum búin að virkja allt fyrir álfyrirtækin getum við framleitt 2.5 milljónir tonna af áli. Það er nákvæmlega magnið sem bandaríkjamenn kasta á haugana á hverju ári. Urða það án þess að endurvinna það. Þetta er nú ekki mjög falleg framtíðarsýn. En söngurinn heldur áfram. Það var ömurlegt að heyra í gömlu draugunum. DO á spalli við Bush. Valgerður og Dóri himinsæl. Aumast fannst mér að fylgjast með hátíðahöldum austfirðinga. Hinni blindu trú á Alcoa. Bjargvætt fólksins. Einn er með einkanúmerið ALCOA á bílnum sínum. Ætli dætur þessa fólks fái ekki nafnið líka? Hvert starf í þessu álveri kostaði yfir 200 milljónir króna. Landsvirkjun er nú á hvínandi kúpunni.Nokkur hundruð íbúðir auðar á svæðinu. Það skiptir auðhringinn auðvitað engu máli. Meðan arðurinn rennur úr landi fyrir smánarlegt rafmagnsverð er þessi góðgerðarstofnun ánægð. Þetta er allt saman óhugnanlegt og það verður að breyta um stefnu. Kannski mál til komið að SF rifji upp svik sín um Fagra Ísland og reyni að koma því á flot aftur.
Ég er að spá í sjóstangaveiði þann 19. Lögmannafélagið ætlar í róður á fengsæl mið á Faxaflóa. Maður lætur nú ekki mikið eftir sér í kreppunni. Þetta er þó gamall draumur. Kannski ætti ég bara að drífa mig? Kveðjur frá leitidraugunum í Ástjörn 7, ykkar Hösmagi.

Skítlegt eðli.

2009-05-06T03:56:00.000-07:00

Stundum rekst maður á stökur á Moggablogginu. Mikið af rusli en ein og ein góð. Þessi var á ferðinni núna.

Hólmsteins þanka þrotabú,
þagnað hefur loksins.
Jafnvel skepnan skynjar nú,
skítlegt eðli flokksins.

Þegar fram líða stundir verður ÓRG líklega helst minnst fyrir hin fleygu orð um skítlegt eðli. Bless aftur, ykkar Hösmagi.

Hljómkviða.

2009-05-06T00:30:00.000-07:00

Það er ljúft að leggjast í flet sitt á kvöldin. Sérstaklega er notalegt ástandið þegar undirvitundin marar í hálfu kafi og maður veit varla hvað er raunveruleiki og hvað er draumur. Milli svefnsins og vökunnar. Svona var þetta eitt kvöldið fyrir nokkrum dögum og þá heyrði ég lágan tón. Svo hækkaði tónninn og varð að mikilli hljómkviðu. Hvað var að gerast? Það var slökkt bæði á útvarpi og sjónvarpi. Augnablik duttu mér aliensarnir í hug. Höfðu þeir stofnað kór til höfuðs mér? Ég steig uppúr mókinu og Raikonen þaut fram til að forvitnast um þessa symfóníu. Hljóðin bárust frá tölvunni sem ég hafði skilið eftir í gangi. Þetta gæti hafa verið lag úr væntanlegri júróvísjón keppni. Ég slökkti og hvarf fljótlega aftur í land rænuleysis og drauma. Ég kann ekki skýringu á þessu en þetta hefur endurtekið sig tvisvar sinnum. Ég hlustaði á allt lagið í fyrradag og fannst það bara nokkuð gott. Líklega niður ársins 2009 en ekki aldanna eins og í Bergshúsi forðum.
Það er dásamlega fallegt veður. Sólin komin hátt á loft og lognið hefur öll völd. Hitastigið er komið rétt uppfyrir frostmarkið. Það vantar svona 15 gráður í viðbót.
Nú virðist margt benda til nýs stjórnarsáttmála um næstu helgi. Samfylkingin hefur tapað orustu. Það var nánast öllum ljóst að SF og VG gátu ekki náð samkomulagi í ESB málinu. Það er þó líklegt að það verði áfram á dagskrá og verði útkljáð með einhverjum skynsamlegum hætti á næstu misserum. Kapp er best með forsjá. SF og VG eru ekki öfundsverðir af þeim verkum sem framundan eru. Landið í rjúkandi rústum eftir sjálfstæðisflokkinn. Það sem ég óttast mest er að ríkisstjórnin sé í heljargreipum alþjóðagjaldeyrissjóðsins. Saga hans og verk hræða. Passar upp á hagsmuni sinna. Við eigum enn okkar auðlindir en það eru margir sem renna hýru auga til þeirra. Vonandi tekst okkur að verja þær og komast smátt og smátt út úr verstu hremmingunum. Við bíðum og vonum hið besta.
Ég hef verið með nokkrar í takinu undanfarna daga. Ekki alveg dauður úr öllum æðum. Eða þannig. Ég er að tala um bækur. Lauk við Kuðungakrabbana í gær. Anne K. Rogde er ágætur höfundur. Fyrr í vetur las ég Berlínaraspirnar. Þriðja bókin hlýtur að vera á leiðinni. Þetta er saga Neshov fjölskyldunnar sem er arfaklikkuð. Með smá undantekningum. Nú hefur ágrip af sögu traktorsins á úkraínsku tekið við og rökkurópera Þórbergs er á náttborðinu. Skelfing væri nú tilveran fátækari ef engar væru bækurnar. Ég hlakka til lesturs margra góðra bóka í elli minni. Þær gleðja við öll tækifæri. Reka burt kvíða og eru líka góðar þegar rólyndi hugans hefur völdin.Raikonen hefur lagt loppu yfir haus sér. Nú legg ég mig aftur og gríp í Þórberg. Bestu kveðjur krúttin mín kær, ykkar Hösmagi.

Gamalmenni.

2009-05-03T03:26:00.000-07:00

Á afmælinu mínu um daginn talaði ég um að telja niður í löggildinguna, 67 ára aldurinn. Nú er 671 dagur eftir. En ég er nú þegar byrjaður að njóta arðs af aldrinum. Þann 1. maí barst mér lífeyrir frá greiðslustofu lífeyrissjóða. Þetta eru svosem ekki miklir peningar en samt meira en ég bjóst við. Góðir með hinum aurunum.Við Kimi komumst af sem stendur. Afturhaldskommatittirnir sjálfir.Nóg að éta, birtan að aukast og bráðum eykst græni liturinn. Ekki hef ég nú enn séð hann vaka í Ölfusá. Ég ætla að kaupa mér veiðikortið á morgun. Reyna fyrir mér í Þingvallavatni einn fallegan morgunn í maí. Þá hugsa ég um eitthvað fallegt og gott og læt pólitíkina eiga sig. Ef ekkert breytist þar á næstunni mun ég aldrei kjósa aftur. Þessu þrátefli verður að linna. Ef vinstri flokkarnir geta ekki komið sér saman um hvað gera skuli verður að reyna einhverjar aðrar leiðir. Þessi sjálfhelda er öllum til tjóns. Stýrivextir eru enn 15.5%. Martröð venjulegra heimila heldur áfram. Atvinnuleysið alltof mikið. Margir stjórnmálamenn eru þó í algjörri afneitun.Þeir eru til í öllum flokkum. Heiðbláir íhaldsmenn, aturhaldskommar og allt þar á milli. Kannski verðum við að kjósa á ný. Þá gætum við sett upp ESB mæli í leiðinni. Ég segi bara eins og Steingrímur Hermannsson forðum: Ég hef áhyggjur af þessu, ég verð að segja það.
Gráminn sem var efst í Ingólfsfjalli í morgun er horfinn og hitinn kominn í 7 gráður.Nánast logn og sólin brýst gegnum skýin annað slagið. Það verður ágætt að bregða sér uppí Haukadal í dag. Kannski sé ég lækjarlontu í læknum sem rennur í gegnum skóginn. Herconinn verður þó ekki meðferðis í dag. Hans tími mun þó koma eins og hjá fleirum. Ég er bjartsýnn á strengdar línur. Enn hlakka ég til Veiðivatnanna eins og smástrákur. Hefðbundna túrsins í ágúst, skottúrs með skáldinu mínu og ef til vill 3ju ferðarinnar í öðrum góðum félagsskap. Við eigum landið okkar enn þó þjóðin sé á heljarþröm. Arkitektarnir, draugurinn og yfirnagarinn, hafa engar áhyggjur. Við skulum aldrei fyrirgefa þeim gerðir þeirra.
Ég vona að þið njótið þessa ágæta sunnudags. Kimi var að birtast úr rannsóknarleiðandri og er nú með trýnið í sjófrystu ýsunni sem ég eldaði í gærkvöldi.Við sendum bestu kveðjur, ykkar Hösmagi.

Fjallagrasakórinn.

2009-05-01T01:03:00.000-07:00

Það væru öfugmæli að segja að eldri sonur minn væri merktur pabbapólitíkinni. Það er gott í sjálfu sér. Fólk á að mynda sér skoðanir sjálft og þora að standa við þær. Honum er að sjálfsögðu heimilt að hafa sömu skoðanir á vinstri grænum og Hannes Hólmsteinn, Davíð Oddsson og Halldór Ásgrímsson. Ekki vildi ég ylja mér við að deila skoðunum með þessum herrum. Reyndar eru skoðanabræðurnir miklu fleiri. Útrásarvíkingarnir t.d. Glæpalýðurinn sem kom landinu á hausinn á meðan við vinstri græn tíndum fjallagrös eftir að hafa beðið sumarlangt eftir að þau yrðu þroskuð.Þau næmustu okkar hlustuðu líka á grasið gróa eins og Heimdallur forðum. Við erum baráttuglöð og sífellt fleiri styðja þennan "afturhaldsflokk dauðans". Ef einhverjir eru saklausir af því hvernig komið er fyrir þjóðinni nú erum það við. Flest okkar hafa heldur ekki tekið ESB veiruna sem nú hefur heltekið samfylkinguna svo mjög að ekkert annað kemst að. SF ætlar sér að koma okkur í ESB hvað sem tautar og raular.Með þetta markmið fékk hún minna fylgi nú en 2003 þrátt fyrir að hafa innlimað Íslandshreyfinguna í heilu lagi. Rúmlega 13.000 manns hafa skrifað undir á sammála.is Gegndarlaus áróður fyrir undirskriftum hefur skilað 7% kosningabærra manna á þennan undirskriftalista. Þetta mál er nú þjóðarböl og engin önnur lausn en að lofa þjóðinni að kjósa um það. Það liggur fyrir að við fáum engar undanþágur frá sjávarútvegsstefnunni. Spánverjar, Belgar, Þjóðverjar, Frakkar og Bretar bíða með öndina í hálsinum eftir að komast í landhelgi Íslands. Það er heldur ekkert skrýtið því þeir hafa nú þegar nær þurrausið öll fiskimið sem ESB hefur ráð yfir. Ég kæri mig ekki um þessar þjóðir inn í okkar landhelgi. SF og VG hafa báðir lagt drög að endurheimt kvótans. Því miður verður aldrei hægt að endurheimta alla milljarðana sem gjafþegar kvótans hafa dregið út úr þessari atvinnugrein. Peningar sem liggja m.a. í glæsilegustu sumarhúsunum í Grímsnesinu og lúxusvillum í BNA. Það er t.d. helvíti flott hjá einum sem stjórnar hitastiginu í sumarhöllinni í Grímnesinum með fjarstýringu úr villunni í Bandaríkjunum. Þetta getur hann af því að hann seldi hluta af kvótanum " sínum". Þetta er auðvitað ekkert annað en hið eina afturhald dauðans. Afturhald sem við vinstri græn viljum brjóta á bak aftur. Við viljum líka hætta við að gefa rafmagnið okkar. Koma í veg fyrir að Guðni bakari sjái sér hag í því að baka með orku frá olíuofnum. Virkja á skynsamlegri hátt en við höfum gert hin síðustu ár og fjölga körfunum fyrir eggin. Skjalfesta þjóðareign á öllum auðlindum í stjórnarskrá.Það var líka maklegt að umhverfisráðherrann féll af þingi í kosningunum. Það sýnir að bjálfasjónarmið um rannsóknir á Drekasvæðinu fengu ekki hljómgrunn. Kannski verð ég alltaf óalandi og óferjandi í pólitíkinni. Ég tel mig þó ávallt hafa verið sjálfum mér samkvæmur. M.a. baðst ég afsökunar á að hafa kosið VG í síðustu sveitarstjórnarkosningum. Ég vil ekki fólk sem villir á sér heimildir. Bókstafirnir eru orðnir nokkuð margir hjá mér. G, H, I, M,U, V og Z. Það er illt til þess að vita að SF og VG eru að klúðra úrslitum kosninganna. Það bendir a.m.k. allt til þess. Við eigum á brattann að sækja vegna fádæma óstjórnar landsins undanfarin ár. Og það gengur hægt að gera upp við þá sem alla ábyrgð bera á núverandi ástandi. Þetta er nú hin pólitíska sýn mín á verkalýðsdeginum 1. maí 2009. Gamli afturhaldsseggurinn er enn við sama heygarðshornið. Kannski bætist svo nýr bókstafur við í næstu sveitarstjórnarkosningum?
Það er afar friðsælt hér. Kimi lúrir í stofunni og hugsar ekki um pólitík. Ég er á síðustu tárunum af kaffi morgunsins. Sannarlega held ég ró minni yfir skoðunum barna minna í pólitíkinni. Ást mín á þeim væri söm þó þau kysu öll íhaldið. Ég hef heldur aldrei valið mér vini eftir pólitískum skoðunum þeirra. Það væri líka andstætt heilbrigðri skynsemi. Einu sinni var ég studiosus juris. Ég sá afar skondna lýsingu á fyrirbærinu laganemi á vefnum í gær: Laganemi er illmenni í þjálfun. Ég held nú samt að ég sé enn voða góður strákur. Kannski að ég sé bara illmenni inn við beinið?
Allra bestu kveðjur frá rauðgrænu vinunum í Ástjörn 7, ykkar Hösmagi.

Pattstaða.

2009-04-30T02:18:00.000-07:00

Það er sérstakt, að eftir að SF og VG náðu hreinum meirihluta í kosningunum, er komin upp pattstaða í stjórn þeirra. Það er sorglegt og slæmt. Ef flokkarnir leysa ekki ágreining sinn í dag verður hvor þeirra um sig að fara aðrar leiðir. Forystufólk beggja flokka segir reyndar að ekkert liggi á því flokkarnir hafi traustan meirihluta.Verkefnin sem bíða eru þó svo brýn að það má ekki eyða tíma í deilur sem virðist ekki vera hægt að leysa. Það er a.m.k. lágmarkskrafa að tekið verði til óspilltra málanna við lausn þeirra. Annars er ég að fá pólitískan leiða. Nenni varla að eyða orðum að þessu meira að sinni. Gleðin yfir falli íhaldsins er að verða blendin. Það yrði hroðalega slæm niðurstaða ef sigur stjórnarflokkanna kallaði á atbeina íhaldsins vegna innbyrðis deilna þeirra. Kannski kallar þetta ástand á nýjar kosningar. Kosningar sem kölluðu fram skýrari afstöðu fólks um hvort sækja eigi um ESB aðild eða ekki.
Kimi sefur. Með óvenjugljáandi feld. Þetta nýja íslenska fóður virðist gera honum gott. Mér finnst þetta frábært, einkum og sérílagi þegar við þurfum að spara gjaldeyri sem aldrei fyrr. Við íslendingar höfum áður staðið í erfiðum aðstæðum. Það er mikilvægt að nota frjóa hugsun til að vinna okkur út úr núverandi vanda. Það er vel hægt og vonandi næst samstaða um það.
Það er aukadagur í næstkomandi helgi. Veðurspáin ekkert sérstök og Ingólfsfjall með hvítan koll eftir nóttina. Það getur þó varla verið langt í alvöruvor og sumar. Ég ætla að hlakka til dásemda veiðiskapar og útiveru og gleyma pólitíkinni næstu daga.Á sunnudaginn ætla ég með Ingu systur minni og fleira góðu fólki uppí Haukadal. Gróðursetja þar nokkrar plöntur í lundi Gunnars frænda míns. Það er líka nóg að starfa heima fyrir. Nokkur framtöl eftir og alltaf þarf að halda í horfinu innandyra.Ég eignaðist 5 kíló af humri í gærkvöldi og ætla að gera okkur Dýra gott í munni á morgun. Svo er rakið að eiga humar til grillunar í Veiðivötnum og við önnur góð tækifæri í sumar. Kistan er nú sneisafull af mat. Nú kaupi ég bara mjólk, kaffi, brauð og viðbit. Og svo auðvitað lífdrykk minn nú um stundir, Coka Cola. Það er bara bjart yfir mér og dýrinu mínu. Við sendum bestu kveðjur með von um að friður ríki í hjörtum vina okkar, ykkar Hösmagi.

Eftirþankar.

2009-04-27T01:13:00.000-07:00

Kominn mánudagur og þjóðin hefur kosið. Íhaldið fékk ærlegan skell þó hann hefði mátt vera enn meiri. SF og VG hafa þokkalegan meirihluta á þingi. Saga til næsta bæjar. En strax í gær kom í ljós að það er mjög óvíst um samstarf þessara flokka. VG jók fylgi sitt um yfir 50%. Það gerði flokkurinn einnig 2007 og er nú kominn með 14 þingmenn í stað 5 fyrir 2 árum. SF hefur minna fylgi nú en 2003. Þetta eru blákaldar staðreyndir. Það er sorglegt hvernig úrslit þessara kosninga eru túlkuð af hörðustu fylgismönnum ESB. Af hverju má ekki fara lýðræðislega að þessu eldheita deilumáli?Það er alls ekki sjálfsagt að sækja um aðild og það er líka fráleitt að kanna ekki bestu leiðina til þess. Þingflokkar SF og VG þinga í dag. Spá mín er sú, þrátt fyrir afgerandi vinstri sigur, að það verði afar erfitt að mynda ríkisstjórn. Það varð ljóst eftir þáttinn með forustumönnum flokkanna í gærkvöldi. Jóhanna sagðist hafa marga kosti til stjórnarmyndunar. Hún hefur stillt VG upp að vegg þrátt fyrir að það er fyrst og fremst fylgisaukning þess flokks sem nú hefur orðið til þess að í fyrsta sinn í sögunni er möguleiki á 2ja flokka vinstristjórn. Nú eru mörg gífurlega brýn verkefni framundan. Samt kemst ekkert annað að hjá SF en að sækja strax um ESB aðild. Lettland hefur verið 5 ár í ESB og enn eru mörg ár í evruna hjá þeim. Á Spáni er nú 17% atvinnuleysi og spánverjar leita að leiðinni til baka. Það er mjög auðveld leið til að kanna kosti og galla við aðild án þess að sækja um hana strax. Það á að ná lýðræðislegri sátt um aðferðina en ekki að æða áfram í blindni.Klisjan um að við verðum að kanna hvað í boði er með umsókn er eins og útslitinn geisladiskur.Í fyrsta lagi vitum við það í stórum dráttum og í öðru laga er hægt að komast að raun um það án umsóknar. Þessi mál munu skýrast í dag og næstu daga. Það þarf að leggja ofstækið á báða bóga til hliðar. Það væri mikill óvinafagnaður ef þessi sögulegu úrslit kosninganna klúðruðust. Það er þó því miður veruleg hætta á því.

Það er geysilega fallegt veður. Frekar svalt en sólin skín. Við Kimi hressir að venju eftir letilíf helgarinnar. Afmælisdagur Gunnars frænda míns sæla og ég ætla að skreppa til systur minnar að áliðnum degi. Vonandi fer að styttast í arfablíðu. Reiðhjólið Faxi er klárt í bílskúrnum og Herconinn að verða ansi óþolinmóður.Bestu kveðjur frá rauðliðunum, ykkar Hösmagi.

Sumarkoma.

2009-04-23T01:08:00.000-07:00

Gleðilegt sumar, krúttin mín kær. Það var nú ekki sumarlegt að kíkja út í morgun. Mugga, og Ingólfsfjall alhvítt. En veturinn er að baki og nú er það beina brautin framundan. Tveir dagar í kosningar og málin að skýrast. Ég kom við hjá VG í gær. Það jaðraði við að ég hrykki öfugur út úr dyrunum. Það var sem sé meistarinn mikli sem blasti við fyrstur manna. Hann er sem betur fer ekki á framboðslistanum svo ég fer á kjörstað. En það er alveg öruggt að VG fær ekki mitt atkvæði í næstu sveitarstjórnarkosningum. Ætla ekki að verðlauna núverandi bæjarfulltrúa fyrir "vel unnin störf". Nóg um pólitíkina í dag.
Í síðustu viku brá ég mér í bíltúr uppí Gímsnes. Á Lancelot hinum bláa. Ekki í frásögur færandi og leiðangurinn gekk ágætlega. Ég lagði vagninum fyrir framan bílskúrinn. Daginn eftir neitaði þessi rennireið að vakna. Ég hringdi í Hörð eftir hádegið. Hvað annað? Hann kom svo eftir vinnu og komst að því að kveikjan sendi ekki neista niður í kertin svo það kviknaði ekki í bensínblöndunni. Daginn eftir fór ég sérstaka ferð í bæinn og fékk notaða kveikju í Vöku. Snillingarnir þar létu mig hafa kveikju sem passaði ekki. Daginn eftir fórum við Maggi í Tangavatn. Þangað hringdi Hörður bílameistari og var búinn að finna gamlan Lancer út á túni niðri í sveit. Hann fékk kveikjuna úr honum. En Lancelot var áfram andvana. Hörður svaf á þessu dularfulla máli um nóttina. Eftir vinnu á þriðjudag fórum við í sveitina og sóttum tölvuna úr vagninum sem lagt hafði verið. Í henni er heilinn sem stjórnar kveikjunni. Hörður var snöggur að skipta um og nú fór Lancelot að mala eins og Rakonen í dyngju sinni. Hann hafði semsagt orðið fyrir snögglegri heilabilun við bílskúrinn í Ástjörn 7. Eins gott að það henti ekki Hösmaga sjálfan. Gamli Lancerinn er með stóra sál eins og flestir mínar bílar um dagana. Nú á ég varakveikju og get örugglega fengið restina af þeim gamla í túnfætinum í Villingaholti. Ég mun líka þekkja galdramanninn góðkunna áfram. Það er nú ekki ónýtt þegar þarf að notast við gamla og lúna vagna.
Eiturbyrlarinn minn átti afmæli í fyrradag. Hann hafði fengið gott að borða hjá Boggu sinni en það var öllu verra með púlarana. Æ. æ. Og mér sem er svo nákvæmlega sama um ensku knattspyrnuna. Kannski bara einn af örfáum. Svo verð ég líka bráðum eini íslendingurinn sem ekki er á facebook.Fyrr um daginn var ég í málflutningi í héraðsdómi Suðurlands. Djöfull var ég nú myndarlegur í lögmannaskikkjunni.Held að mér hafi tekist nokkuð vel upp og ég fái góða niðustöðu í málið á morgun.
Ég er glaður í dag og mér sýnist Kimi vera það líka. Eigum hvorn annan að. En það er líka fleira sem gleður hjarta gamals veiðimanns. Ljúfar minningar rifjuðust upp fyrir skömmu. Fiturönd á lambalundum og heitt handklæði eftir baðið í dögginni á Jónsmessunótt. Það sem aldrei hefur komið fyrir áður skeður örugglega í sumar. Nú er fjallið aftur orðið autt upp í miðjar hlíðar. Sumarið er að koma. Ástarkveðjur frá okkur Dýra, ykkar Hösmagi.

Suðaustan 14 metrar.

2009-04-19T11:01:00.000-07:00

Það er hlaupinn vorgalsi í Kára. Það þýtur í laufi og öðru hvoru þeytist regn um loftið. Við Kimi höfum haldið okkur innandyra að mestu leyti. Letin ráðið ríkjum og ég hef verið í einskonar móki. Við Magnús brugðum okkur í Tangavatn í gær. Vissir um tengsl við urriða. Vatnið var alveg dautt. Við Herconinn grétum báðir. Þetta er í raun mjög dularfullt. Frúin sagðist nýlega hafa sleppt 150 fiskum í vatnið. Örfáir veiðst. Það vakna að sjálfsögðu illar grunsemdir. Mér finnst alls ekki fráleitt að alíensarnir hafi komist uppá bragðið. Varla hverfur fiskurinn bara rétt si sona. Hver sem skýringin er mun ég ekki ergja mig og mína góðu veiðistöng á Tangavatni á næstunni. Rækjunen naut góðs af afgangsbeitunni. Gæddi sér á nýkeyptri úrvalsrækju af stærstu gerð. Nú er Whiskas fóðrið liðin tíð. Nú er það Icelandpet. Ný íslensk framleiðsla sem er miklu ódýrari og virðist vera gæðavara. Hráefnið að mestu íslenskt og Kimi úðar þessu í sig. Gott í kreppunni og sparar gjaldeyri. Ófétið hætt að láta sjá sig. Ég er nokkuð viss á skýringunni. Þetta óféti er sjálfstæðisköttur. Það er hellingur af ófétum í þeim flokki. En kötturinn hefur það þó fram yfir mannskepnurnar að hann skammast sín og þorir ekki að láta sjá sig. Að minnsta kosti fram yfir kosningar. Hins vegar gengur Árni Johnsen hér ljósum logum. Fús til starfa fyrir okkur aumingjana. Ekki alldeilis amalegt. Allskonar spilverk að auki og náhirðin klappar. Árni ætlar eins og Þorgerður að "klára dæmið". Það er þó ekki ljóst hvað þessi klárun merkir. Nærtækast er þó að álykta að íhaldið hafi ekki alveg verið búið að ganga frá þjóðfélaginu en nú eigi að ljúka við það. Það vil ég ekki og sem betur fer bendir flest til þess að dæmdir og ódæmdir þjófar verði úti í kuldanum að kosningum loknum. Það kemur í ljós bráðlega. Krúttkveðjur frá okkur Rækó, ykkar Hösmagi.

Vorhugur.

2009-04-14T03:50:00.000-07:00

Páskunum er lokið og nú er að koma að vorinu. Samkvæmt spám verður tveggja stafa hitatala á mælunum frá fimmtudegi og fram yfir helgi.Það er ekki nokkur vafi á að Herconinn sleppur úr prísundinni í bílskúrnum einhvern næstu daga. Hann á líka mikið verk fyrir höndum við línustrengingar í sumar. Í höndunum á Hösmaga gamla sem lengi hefur elskað þessa veiðistöng. Því miður hefur framleiðslu á þessum stöngum verið hætt. Frábær íslensk framleiðsla sem mikil eftirsjá er að. Kannski væri lag nú að byrja aftur. Ég yrði nánast lens ef eitthvað kæmi fyrir þetta eftirlæti mitt. Prófa kannski smáauglýsingu í Mogganum. Hér er nú dumbungur og hitastigið í kringum 6 gráður. Við Kimi hófum morgunverkin nokkuð snemma. Hann lenti aðeins í ófétinu í gærmorgun. Flýði í skjól fóstra síns með skottið óvenjudigurt. Við höfum haft sæmilegan frið fyrir þessum óvelkomna gesti og ég var farinn að vona að hann væri fluttur útí Hveragerði. Skyldi hitastigið á kaffinu vera komið uppfyrir 32°þar? Ég efast um það. Þessi staður er aðallega byggður íhaldsmönnum svo það er ekki á góðu von. Aumingja blessað fólkið.

Nú eru bara 11 dagar til þingkosninga. Málþóf íhaldsins um stjórnarskrárbreytingar mun væntanlega halda áfram fram eftir vikunni.Það mun ekki gagnast því neitt. Ömurð FLokksins er átakanleg. Jafnvel harðir öfgamenn náhirðarinnar eru farnir að efast.Ekkert bendir til annars en pólitískrar einsemdar þessa fyrrum langstærsta flokks þjóðarinnar. Hann er gegnrotinn af spillingu sem ekki er hægt að fela lengur. Fnykurinn af hræinu svo yfirþyrmandi að það hálfa væri mikið meira en nóg.Nú bíðum við bara. Það þarf ekki að segja mikið meira. Íhaldið sér sjálft um urðun sína þann 25. Bestu kveðjur frá okkur rauðskotti, ykkar Hösmagi.

Rós í hnappagatið.

2009-04-11T02:43:00.000-07:00

Það er margt að skýrast vegna styrkja til stjórnmálaflokkanna.Ef árið 2006 er tekið eitt og sér og aðeins teknir styrkir sem eru hálf milljón og þar yfir fær íhaldið rúmar 80 milljónir. SF 45, framsókn 33 og VG 1 milljón. Styrkirnir til sjallanna, SF og framsóknar eru aðallega frá bönkunum og útrásarvikíngunum. Þaðan kemur ekki ein einasta króna til VG. Þetta gefur VG rós í hnappagatið frá mér. VG varð 10 ára um daginn. Frá stofnun hefur bókhaldið verið opið og enginn feluleikur í fjármálunum. Hvað skyldi íhaldið hafa fengið á þessum 10 árum? Örugglega mörg hundruð milljónir. Mörg hundruð milljónir af peningunum sem glæpalýðurinn stal frá okkur. Og SF og framsókn hafa fengið tugi milljóna úr sömu hendi. Þetta er engin smörklípa heldur óumdeilanleg staðreynd. Það er gott að vera ekki í neinum vafa hvernig ég kýs eftir hálfan mánuð. Flokkinn, sem hefur hreinan skjöld og ber enga ábyrgð á óstjórninni, spillingunni og sukkinu sem viðgengist hefur undanfarin ár. Farsælast væri að hann yrði stærstur flokkanna að kosningum loknum. Á þessu er ég eins og hrútur. Harður í horn að taka.
Það er yndislegt veður þó hitastigið sé innan við 3 gráður. Nokkuð bjart og nánast logn. Tangavatn kemur í hugann. Kannski bíður það uns við fáum 2ja stafa tölu á hitamælinn. Ég vaknaði klukkan 6 í morgun. Þó undarlega hljómi er það óvenjuseint. Kaffi að venju og samneyti við Dýra. Við erum báðir svolítið rauðir en þó grænir um leið. Ég held svo áfram að fylgjast með hinum dramatíska sjónleik sjáLfstæðisFLokksins. Þessi ömurð er að ná hámarki. Fyrrum framkvæmdastjóri segist vita hverjir sníktu 55 milljónir út úr FL group og Landsbankanum.Kannski ekki rétt að kalla það sníkjur þegar mútuþegar fara á stúfana. En það hentar ekki að segja frá því strax. Það þarf að plotta pínulítið fyrst. Hvítþvo sem flesta áhrifamenn FLokksins ef einhver leið er til þess. Kannski væri hægt að klína þessu á skúringakonuna í Valhöll. Því hefur allavega verið lýst yfir af mörgum foringjunum að þeir hafi ekkert komið að málinu. En keisarinn er allsber. Kviknakin ofurspilling skín af flestum forustumönnum FLokksins. FLokksins, sem þjóðin mun senda útí myrkrið þegar við hin tökum á móti vorinu. Bestu kveðjur frá okkur vinunum, ykkar Hösmagi.

Lambasteik.

2009-04-10T10:01:00.000-07:00

Mér áskotnaðist lambalæri um daginn. Lærið var ættað úr Selvoginum.Það er dulúðug sveit með sterka strauma. Gæti verið arfleið Eiríks í Vogsósum. Hann vissi lengra nefi sínu og er kunn sagan þegar hann festi ungan svein á hross sem hann hafði bannað pilti að ríða. Stráksi var ráðagóður og skar setuna úr buxunum og komst af hrossinu. Eiríkur sá að þetta var mannsefni og gerði gott úr öllu saman. Ingibjörg systir mín lánaði mér emilerað eldunarbox um daginn. Ég ákvað að gera tilraun í eldamennskunni. Fyrst kryddaði ég lærið að neðanverðu með salti og frönsku sveitakryddi. Snéri því svo, saltaði aðeins, og hellti olívuolíu yfir. Síðan kom meira sveitakrydd og að lokum reyksalt, Hicory. Lokið á, boxið inní ofninn og svo var kynnt á 200°. Eftir 70 mínútur kíkti ég í boxið. Þetta leit vel út. Kartöflurnar fóru í pott og ég lækkaði kyndinguna í 150°. Að tuttugu mínútum liðnum slökkti ég á ofninum. Lærið leit sérlega vel út. Hæfilega brúnt og ekki spillti ilmurinn. Ég er að springa úr monti yfir þessu verki. Lærið reyndist sérstaklega ljúffengt á bragðið og vel meyrt og safaríkt. Að sjálfsögðu réðist ég fyrst á hækilinn ásamt þrem þunnum sneiðum. Rauðar íslenskar og rabarbarasulta. Ég er enn pakksaddur af þessum dásamlega veislumat og hér eftir kvíði ég ekki fyrir að elda lambalæri. Harðfiskurinn bíður kvöldsins og ég ætla að lofa vini mínum að rífa vel í sig með mér.
Ég er nýkomin heim úr bíltúr. Þruman gljáandi græn eins og vinstra vorið sem er í nánd.Kíkti á bátana í höfninni í Þorlákshöfn og ók síðan upp Ölfus, í Hveragerði og heim á Selfoss. Drakk kaffi hjá Grétu og svo beint á netið þegar heim kom. Raikonen sofandi í húsbóndastólnum í stofunni. Það var vel við hæfi. Nú fylgist maður með hvað næst gerist í tagedíu íhaldsins. Þetta er sannarlega leikhús fáránleikans. Dostojevskí bliknar í samanburðinum. Það er ekki hægt að höndla þetta. Öll sund eru lokuð og engin leið fær til að ljúga sig frá skömm spillingarinnar. Og hin fræga kosningamaskína íhaldsins mun ekki duga í þetta skipti. Fnykurinn er hrikalegur og norðangolan nær ekki að koma honum burt. Þetta er bara bráðskemmtilegt.
Dýri var að skila sér inn. Hann er nú með fésið á kafi í harðfiskinum. Mikið mal bráðum. Bestu kveðjur frá okkur, ykkar Hösmagi.

Þorparastrik.

2009-04-09T11:18:00.000-07:00

Einhver bölvaður þorpari hefur kjaftað frá. Nóg var nú erfitt ástandið hjá Flokknum.30 millur frá Jóni Ásgeiri og Hannesi og svo 25 til viðbótar frá Björgólfi. Ég hef reyndar einn sterklega undir grun. Sumum kann að finnast það langsótt. Ég á við krossberann. Honum er auðvitað alveg sama nú.En haldiði að hann hafi gleymt skömmum Geirs um daginn? Það er auðvitað spaugilegt að þessi styrkur, sem er ekkert annað en mútur, skuli koma frá FL group. Baugsfyrirtækinu.Hvorugur af framkvæmdastjórum Flokksins kannast við neitt. Undarlegt að verða ekki var við 55 millur inná tékkheftinu. Hundurinn sagði ekki ég, kötturinn sagði ekki ég en svo hringdi Geir og sagði það var ég. Hér gildir lögmál Murpys. Ef eitthvað getur farið úrskeiðis þá gerir það það. Það þarf mann án skilningarvita til að trúa Geir. Hann er hættur í pólitík og greindin ekki meiri en svo að hann trúir að með því að segja það var ég séu allir hinir stikkfrí. Hirðfífl náhirðarinnar blogga nú hvert um þvert um málið. Óperusöngvarinn sem ætlaði sér að verða þingmaður sunnlendinga segir að þessar upplýsingar komi núverandi stjórnvöldum vel. Og spyr hvort það sé tilviljun. Ýjar að "leka" frá skattinum. Það góða við þessar féttir er að það er engin leið að ljúga sig frá þeim. Flokkurinn hefur verið staðinn að verki. Rétt fyrir kosningar. Flokkurinn sem kennt hefur öðrum um hvernig komið er. Hið rétta andlit hans blasir við öllum nema þeim hörðustu í náhirðinni. Spillingin berstrípuð. Spillingin, sem hirðin hefur talið vonda menn vera að klína á hann. Sumir hirðmannanna segja líka að allir hinir hafi þegið styrki. Nú séu reglur til um þessa hluti og það sé nóg. Best væri auðvitað að allir flokkarnir legðu spilin á borðið. Siv vafðist eitthvað tunga um tönn þegar minnst var á þetta í þættinum úr Hafnarfirði í gær. Við könnumst sum við spillinguna á þeim bænum.Og það er hálfundarlegt að styrkir til SF voru u.þ.b. 22 miljónir samtals fyrstu 5 ár aldarinnar en 45 milljónir árið 2006. Ef farið er inná vg.is má sjá ársreikninga vinstri grænna frá 2003 til 2008. Þar eru nú ekki háar tölur. Það nýjasta er að einn íhaldsmaðurinn heldur því fram að ESB fjármagni SF. Þessar dylgjur eru nú ekki svaraverðar enda settar fram til að reyna að dreifa athygli fólks. Það sem gera þarf er fá bókhald allra fokkanna uppá borðið strax og eins langt aftur í tímann og mögulegt er.
Í dag var birt ný könnun. Samkvæmt henni fá SF og VG 40 þingmenn. Þar munar mest um að VG tvöfaldar þingmannatölu sína. Þetta er könnun en ekki úrslit kosninga. En það er ljúft að hugsa til þess að könnunin var gerð áður en þorparinn kom upplýsingunum um millurnar á framfæri. Íhaldið er alveg á rassgatinu. Þar skulum við hafa það sem lengst.
Við Kimi hefum það fínt á þessum upphafsdegi páskahátíðar. Ætli við fáum okkur ekki harðfisk á föstudaginn langa. Mjög við hæfi á þeim degi. Hálfgerð kalsarigning og voða gott að halda sig í rólegheitum innan dyra. Ég hef nú lokið við allar bækurnar um Mmm Precious Ramotswe. Mjög skemmtileg lesning. Ég er hreinlega stundum staddur á verkstæðinu. Spíttmótora kann ég vel við. Við félagarnir sendum ykkur bestu óskir um gleðilega páska. Ykkar Hösmagi.

Tölurnar.

2009-04-07T01:10:00.000-07:00

Það er alkunna hvað Hösmagi unir sér við talnakúnstir. Áhugi minn á tölum er örugglega meðfæddur og ég man varla eftir mér nema teljandi alla skapaða hluti. Ég reiknaði út um daginn að þann 30. mars urðu Helga Soffía og Raikonen fertug.Það var bara einföld samlagning. En afmæli geta að sjálfsögðu orðið utan afmælisdaga. Þannig hef ég komist að því að þann 16. september n.k. verðum við Dýri 7tugir. Samanlagður líftími 70 ár. Mér finnst eiginlega við hæfi að stefna á veislu þennan dag. Einskonar karnival til heiðurs okkur fósturfeðgum. Uppskeruhátið fyrir veiðiskap og önnur afrek Hösmagaættarinnar á árinu 2009. Er þetta ekki alveg rakið? Það yrði ýmislegt góðgæti á borðum og eitthvað gott til að skola því niður. Ég ætla allavega að hugleiða þetta vel.
Hér er nú veður kyrrt og fremur milt. Kimi var að lauma sér út um gluggann í annað sinn í morgun. Hösmagi fór líka snemma út. Hið daglega sauðaeftirlit hefur sinn gang. Jörðin er alauð en nokkrir skaflar eru eftir í efstu hlíðum Ingólfsfjalls.Ég sé líka hluta af Búrfellinu þar sem óðalið liggur undir norðurhlíðinni. Mér finnst vænt um þessa spildu og vonandi get ég átt hana áfram. Þó áætlanir hafi breyst er draumurinn um kærleikskotið ekki horfinn. Glæpahyskið sem stal öllu sem hægt var að stela af þjóðinni er enn ósnert. Og dæmdur þjófur klæmist á texta Magnúsar Ásgeirssonar úr ræðustól Alþingis. Félegt, eða hitt þó heldur. Allt bendir þó til breytinga. Vonandi komum við sem flestum þjófunum fyrir í tugthúsinu. Upp á vatn og þrumara eins og í gamla daga. Það væri líka athugandi að taka upp ný vinnubrögð á ýmsum sviðum. Mér dettur VÍS í hug. Þetta gamla tyggingafélag merarfinns lánaði nafna mínum Einarssyni 75 milljónir milli jóla og nýárs. Þetta var miskunnarverk eins og fólk hlýtur að sjá. Vínkjallarinn í sumarhöllinni ókláraður og eitthvað vantaði víst uppá baðherbergin 5. En ég verð nú að segja eins og er að ég ætla ekki að breyta um tryggingafélag. Ég mun gráta það þurrum tárum þó þessi nafni minn verði að láta vatn og rúgbrauð duga um tíma. Hann er eins og flestir hinna víkinganna. Blindur, heyrnarlaus og samviskulaus. Það er gustukaverk að taka svoleiðis karaktera úr almennri umferð.

Kærar kveðjur frá okkur vinstri rauðgrænum, ykkar Hösmagi.

Veröld Hösmaga.

2009-04-06T04:32:00.000-07:00

Það er gott að vita til þess, að bloggi ég ekki í nokkra daga, skuli einhver taka eftir því. Veröld mín er söm og áður. Alsgáður og nokkuð hress. Barasta fjallhress svona ámóta og Dýri. Hann sækir nú fast að láta hleypa sér út á morgnana. Það er merki um að það er tekið að vora. Sem er ákaflega ljúft. Páskar að ganga í garð og og veiðifiðringurinn gerir vart við sig. Herconinn bókstaflega mændi á mig í bílskúrnum í morgun. Ég fullvissaði þessa veiðistöng um að hún skyldi vera við öllu búin. Þarf að hringja í Magga og huga að Tangavatnsför. Margir frídagar á næstunni Af spánni að dæma verður sæmilega hlýtt og þurrt næsta laugardag og alveg rakið að athuga málið.Nú er verið að massa framstuðarann á grænu þrumunni. Mér finnst voðalega ljótt að nudda sér utan í svona fínan vagn og stinga svo af frá glæpnum. Í rauninni eins og þjófnaður því ég verð að draga upp veskið og borga. Ég myndi lesa þeim seka pistilinn vissi ég hver hann væri.Og skæfi ekki utanaf því.
Formenn stjórnmálaflokkanna voru í kastljósi á föstudaginn.Ég var nokkuð hissa á hve hinn nýi formaður sjálfstæðisflokksins var slappur. Hugmyndafátæktin áberandi.Lausnin í atvinnumálum ný álver í Helguvík og á Bakka. Gjafarafmagn frá Landsvirkjun sem er nánast gjaldþrota eftir Kárahnjúka. Álverð í lágmarki. Væri ekki nær í bili að veiða meiri þorsk. Hundrað þúsund tonn af þorski gefa 40 milljarða. Þó vísindastofnanir séu ágætar verðum við líka að hlusta á sjómennina. Þó mikill ágreiningur sé milli VG og SF um evrópubandalagið er ég samt viss um að þessir flokkar munu starfa saman að kosningum loknum. Og SF mun alls ekki setja VG stólinn fyrir dyrnar út af þessu máli. Jóhanna lýsti því líka yfir að ekki yrði sótt um aðild strax eins og Dagur fullyrti. Það verður að hafa hemil á ofsatrúarfólkinu. Bæði þeim sem telja að allar okkar raunir gufi upp við aðildarumsókn og hinna sem berjast gegn málinu af einhverskonar þjóðrembingshætti.Það eru allir stjórnmálaflokkar klofnir í þessu efni og þjóðin þar með. Ég vona sannarlega að VG muni vinna þann sigur í kosningunum sem allt bendir til. Það eru allt of margir vafagemlingar í samfylkingunni. Verði sigur vinstri grænna nógu stór eru miklu meiri líkur á að réttlætið nái fram að ganga í samfélaginu. Unga fólkið sér þetta best. Það er ánægjuleg staðreynd í veröld Hösmaga.

Ég ætla í afmæli í dag. Fyrrum sambýliskona mín, Gréta, er fimmtug. Ég var einu sinni yfir mig ástfanginn af henni. Nú hefur góð vinátta orðið aðalatriðið. Það er gott. Við vinstri rauðir sendum öllum vinum góðar kveðjur. Og kjósið nú rétt, skinnin mín, ykkar Hösmagi.

Krossberi.

2009-03-29T03:54:00.000-07:00

Messías hefur verið krossfestur. Rekinn út úr musterinu og norskur fjallamaður með Alsheimer settur í hans stað. Messías grætur þungum tárum yfir örlögum trjánna sem notuð voru í pappírinn til að prenta skýrsluna um afrek hans fyrir þjóðina. Náhirðin heldur ekki vatni yfir þessu. Samkunda íhaldsins um helgina er skrautleg. Þar kemur hið rétta andlit flokksins í ljós. Tilgangurinn hefur snúist upp í andhverfu sína. Það hljóta miklu fleiri að flýja flokkinn en ætluðu sér það. Það eitt og sér er gleðiefni. Messías var reyndar ekki á dagskrá fundarins. Honum var þó ekki varnað máls sem betur fer. Það hefði líka verið illa gert við þennan krossbera. Riddara sannleikans, sem allir hafa verið vondir við. Sumir hafa jafnvel gengið svo langt að tala um hroka, skítlegt eðli, dónaskap og hitt og þetta þaðan af verra. Ég ætla ekki að tala meira um krossberann því mér er að verða óglatt.

Það er kyrrt veður en frostið er 4 gráður. Rólegheit hjá okkur Kimi. Sálarlífið í góðu jafnvægi.Nú er ég með sjöttu bókina um eiginkonu hr. J.L.B Matekonis.Presisous Ramotswe. Ég er pínulítið skotinn í henni.Það er allt í lagi á þessum aldri. Ég er ánægður með allan lesturinn í vetur. Ég ætla að lesa heilan helling meðan mér endist heilsa og aldur. Lesturinn er hluti hamingjunnar. Gamall veiðimaður hefur enn til margs að hlakka. Það styttist í páska og vorið er varla langt undan heldur. Það verður gott að taka létta æfingu í Tangavatni. Þar eigum við Maggi dag inni. Og græna þruman að verða óþolinmóð eftir fjallaferð. Brauð og leikir enn á dagskrá þrátt fyrir kreppu íhaldsins. Næst á dagskrá er kók og vindill, silfur Egils og aldrei að vita nema að harðfiskpoki verði opnaður. Nammidagurinn varð útundan í gær og það verður að bæta upp. Bestu kveðjur til allra krúttanna minna, ykkar Hösmagi.

Pólitíkin.

2009-03-26T01:19:00.000-07:00

Það er mánuður í þingkosningar.Nú bendir flest til að frjálslyndi flokkurinn hverfi og nýju framboðin fái lítið fylgi.Sumir tala af mikilli fyrirlitningu um fjórflokkinn. Eins og það sé bara einn flokkur. Þetta er auðvitað firra. Sjálfstæðisflokkurinn með dyggri aðstoð framsóknar hefur komið þessu skeri á hausinn.SF á reyndar nokkra sök í þeim efnum. Það hefur verið upplýst að minnisblaðið úr seðlabankanum um dökkt útlit í bankamálum var lesið upp fyrir þau Geir, Árna Matt og ISG í febrúar. ISG hefur sennilega verið of upptekinn við að rembast við að koma okkur inní öryggisráð SÞ. Það var draugurinn sem átti upphaflegu hugmyndina að þeirri fáfengilegu dellu. ISG hefði betur varið kröftum sínum í önnur og betri málefni. Hún hefur nú dregið sig í hlé. Það er sorglegt á sinn hátt. Ég gleymi aldrei þætti hennar í að fella íhaldsmeirihlutann í Reykjavík. Þar átti hún langstærsta þáttinn. Vonandi nær hún heilsu sinni á ný. Af eigin rammleik og með hjálp góðra vætta. Samkvæmt nýjustu skoðanakönnun fréttablaðsins fá SF og VG 38 þingmenn, íhaldið 20 og framsóknarmaddaman aðeins 5.Þetta er þó aðeins niðurstaða könnunar en óákveðnum er þó að fækka. Náhirð íhaldsins skilar sér öll en margir kjósendur þess utan hirðarinnar hafa séð að sér. Ef fram fer sem horfir verður VG stórsigurvegari í kosningunum. Þó ég sé flokkslaus maður yrði það mér mikið fagnaðarefni og ég verð ekki í vandræðum við kjörborðið.Áherslur fólks á borð við Ögmund Jónasson eru mér að skapi. Það er sá stjórnmálamaður sem ég hef langmest álit á nú. Eins og reyndar áður. Ég hef lítillega kynnst Ögmundi persónulega og ég held að lífsskoðanir okkar séu ákaflega líkar. Ég þarf ekki að rekja þær hér.Það er mikið af góðu fólki í SF. Því miður á markaðshyggjan þar líka marga formælendur. Og oftrúin á ESB er líka vond. Ég hef nánast þrástagast á því að það á að spyrja þjóðina áður en aðildarviðræður verða hafnar. Blása til þjóðaratkvæðagreiðslu um hvort við eigum að sækja um aðild. Mér finnst það eðlileg og lýðræðisleg lausn. Krónuræfillinn okkar er nú aumari en nokkru sinni fyrr. Þar er ærið og vandasamt verkefni framundan. Því miður eru engar töfralausnir til í þeim efnum. Mörg nýju ríkin í ESB eru í miklum vandræðum þrátt fyrir evruna. Allt fyrir ekkert eru ein frægustu öfugmæli stjórnmálasögunnar síðustu áratugi. Flati 20% niðurskurðurinn á skuldum heimila er heldur ekki góður. Mér líst miklu betur á niðurskurð í krónutölu. Það er bæði ódýrara og kemur þeim verstsettu best. Og það verður að gæta þess vel að þessir fjármunir verði notaðir til lækkunar húsnæðislánanna eingöngu. Ekki vil ég aðstoð úr almannasjóðum til að greiða lánið á grænu þrumunni.Ef sigur VG verður nógu stór í kosningunum munu hin betri gildi SF verða ofaná í flokknum. Þá megum við eiga von á öflugri umbótastjórn sem breytir algjörlega um stefnu. Náhirðin mun verða úti í kuldanum með lík framsóknar í eftirdragi. Þá verður aftur gaman.
Enn er bið eftir vori. Hitinn oftast við eða undir frostmarki. Við Maggi bíðum bara færis á að bruna í Tangavatn. Það verður örugglega heilmikið vorkikk. Við Rækó erum hressir. Hann er æ meira útivið eftir að birtan hefur ýtt mesta myrkrinu burt. Mér voru gefnir 4 pokar af harðfiski í vikunni. Næstu laugardagar verða nammidagar hjá okkur. Bestu kveðjur frá okkur rauðliðum, ykkar Hösmagi.

Viltu vera memm......

2009-03-20T00:55:00.000-07:00

í dag. Vorjafndægur og blíða. Samkvæmt stjörnuspánni eru fiskar hamingjusamir í dag. Og það vilja allir vera með hamingjusömu fólki. Kannski kemst ég bara á séns? Aldrei að vita hvað dagurinn ber í skauti sér. Í gær kom hér einn íbúi í þessari ágætu Ástjarnarblokk. Vantaði minniháttar aðstoð við að koma frá sér framtalinu. Það var ekki stórmál. Vanur maður hér við skrifborðið. Við sátum og spjölluðum og þar kom að ég kveikti mér í vindli. Með sálarlausm plastkveikjara sem kominn er að fótum fram. Þegar alíensinn náði af mér kveikjaranum í febrúar láðist honum að taka eldsneytið með. Það stendur hér á borðinu og gesturinn rak augun í það. Ég rakti raunir mínar fyrir honum og lýsti fólkubrögðum ódósins í smáatriðum. Hann komst við en sagði að lítið mál væri að bæta úr. Hann ætti nokkra Zippóa, hljóp niður og kom að vörmu spori með þetta ekta eldfæri. Ég var snöggur að dæla eldsneyti í púðann og það var hrein lífsnautn að tendra eld með þessu frábæra tæki. Stálið volgt og dásamlegt að kreppa um það hnefann. Gesturinn sagði mér að hann hefði verið gjarn á að " týna" Zippóum. Hafði oftar en einu sinni verið búinn að kaupa nýja en síðan "fundið" þá sem "glatast" höfðu. Ég sagði fátt þó ég vissi upp á hár hvar maðkurinn lægi í mysunni. Hrekkjabrögð ódóanna lýsa sér í ýmsum myndum. Ég naut þó góðs af og er þessvegna ákaflega hamingjusamur í dag. Það var ljúft að leggja í hann í morgun með glitrandi stálið meðferðis. Veðrið dásamlegt og Raikonen hnusandi í móanum hér sunnan við blokkina. Þegar heim kom hafði Dýri skilað sér inn um gluggann og fagnaði mér ógurlega. Nú er Lancerinn kominn með rauða 10 miðann á sitt flotta númer. Hann er nú ekinn rúmlega 180.000 km. Ég keypti nýja tímareim í gær. Allur er varinn góður. Ef tímareimin bilar er illt í efni. Enginn ekur bíl með kengbogna ventla. Það veit herra J.L.B. Matekoni manna best.Galdramaðurinn Hörður hefur lofað aðstoð við að skipta um reimina.Og hann verður snöggur að því ef ég þekki hann rétt. Svona ámóta og þegar hann skipti um miðstöðina í gamla Volvóinum mínum um árið. Hann gerði það á þremur tímum en kaupfélagsverkstæðið framkvæmdi slíkar aðgerður á tveim heilum dögum. Það er eins og ég hef sagt áður gott að þekkja svona snillinga. Hamingjan ríkir hjá gömlum veiðimanni sem enn er þungt haldinn af bíladellu. Græna þruman á stalli sínum. Gljáandi eftir nostursamlegan sápuþvott í gær. Tilbúinn til veiðiferða hvenær sem er. Spíttmótorinn á sínum stað. Þegar ég les um Tlokweng spíttmótora, fyrirtæki hr. J.L.B. Matekonis, kemur mér græna þruman ævinlega í hug. Verðandi eiginmaður kvenspæjarans yrði hrifinn ef hann kynntist slíkum vagni.
Það verður nóg að starfa um helgina. Hinn almenni frestur til framtalsskila rennur úr á mánudaginn. Ég er á góðu róli í þeim efnum. Gef mér örugglega tíma fyrir Fullan skáp af lífi, 5. bókina um kvenspæjarann og allt hitt skemmtilega fólkið.
Andvari vorsins leikur um íbúð okkar Kimis. Svaladyrnar uppá gátt. Dýrið liggur í gluggakistunni og ég með volgt stálið í greip minni. Megi dagurinn færa ykkur gleði. Ykkar Hösmagi.

Þíða.

2009-03-17T02:33:00.000-07:00

Tíminn flýgur áfram og það eru vorjafndægur á föstudaginn. Það er komin hláka og það er spáð 6-8 gráðum næstu daga. Kominn fiðringur í gamlan veiðimann eins og alltaf þegar vorið nálgast. Þrátt fyrir kreppu og óáran eftir andskotans íhaldið er til margs að hlakka. T.d. ófara sjálfstæðisflokksins í næstu kosningum. Dræm þáttataka í prófkjörum er að mínu mati vísbending um að margir íhaldsmenn ætli að refsa flokknum í vor. Það þarf að senda hann í endurhæfingu. Í nokkra áratugi. Það virðist svo að allur flokkurinn sé í álíka afneitun og hinn dæmdi þjófur sem vermir 2. sæti listans hér í suðurkjördæmi. Allt tæknileg mistök sem eru öðrum að kenna en þeim sjálfum. Að fólk skuli hafa geð í sér til að kjósa íhaldið eftir það sem á undan er gengið er mér hulin ráðgáta. Niður með sjálfstæðisflokkinn. Og norður líka.
Við Dýri vorum komnir á stjá fyrir allar aldir. Bardúsuðum ýmislegt og lögðum okkur svo aftur. Nú er komið hlið á veginn að óðalinu undir Búrfelli. Ég skrapp uppeftir á sunnudaginn. Þetta er rafrænt hlið og opnast þegar maður hringir í það úr GSM síma. Brauðsniðugt og varnar þjófum inngöngu á svæðið. Landið kúrði undir snjónum en nú styttist í að það ilmi á ný. Eftir Gímsnesför lagði ég leið mína niður á strönd. Nánar tiltekið á Eyrarbakka. Þar skoðaði ég agnarsmátt dýr. Kettling sem fæddist á laugardaginn. Hann kom hárlaus í heiminn. Þetta mun vera þekkt erlendis en er afar fátítt hér. Þessi anganóri lifði þó aðeins í 2 sólarhringa þó móðirin og eigendur hennar gerðu sitt besta. Kannski átti hann aldrei möguleika. Hann er nú kominn á önnur tilverusvið með mörgum öðrum.
Það gengur allt sinn vanagang hér í Ástjörn. Vinnutarnir og letilíf inná milli. Nú er ég með 4ðu bókina um Mmm Ramotswe. Skemmtileg lesning og hver bók er akkúrat mátulega löng. Krossgáturnar eru í algjöru fríi. Ég þarf svo í Hveragerði einhverntíma í dag. Þar er verið að gera Lancernum smávegis til góða. Ótrúlega seigur vagn þrátt fyrir þjóðernið. Ekta snattari sem getur dugað í nokkur ár enn.
Kimi var að stinga sér út um gluggan. Aldeilis gott að hnusa smávegis af góða veðrinu. Bestu kveðjur til allra vina okkar, ykkar Hösmagi.

Harðfiskur.....

2009-03-12T02:00:00.000-07:00

er ákaflega holl og góð fæða. Við Kimi gæðum okkur stundum á svona lostæti. Ég keypti nokkra poka af Eyrarfiski í gærmorgun. Sérlega ljúffengur fiskur sem verkaður er af kunnáttumönnum á Stokkseyri. Þegar heim kom setti ég pokana í ísskápinn. Þeir voru umluktir öðrum poka. Kimi lá í dyngju sinni og tók ekki eftir neinu. Sem betur fer. Hann er ákaflega sólginn í þennan dýra mat.Kannski væri við hæfi að kalla þetta Dýramat. En þessi snilldarafurð sjávar var ætluð öðrum. Undir kvöldmat tók ég pokann úr skápnum því ég var á leið til Reykjavíkur. Þrátt fyrir góðar umbúðir var kötturinn ekki í neinum vafa um innihaldið. Það var enginn friður með þennan poka. Hnus og hnus. Svo starði dýrið á mig. Ætlaði fóstri virkilega ekki að opna posann og gefa smakk? Ég var búinn að koma sjálfum mér í vandræði. Ég átti ekki meira. Mér leið bara alls ekki vel þegar ég yfirgaf íbúðina. Kisi starandi á mig. Spyrjandi með depurð í augum. Hvernig gat fóstri verðið svona harðbrjósta og andsyggilegur? Ég hélt til Harðar bílameistara sem fór með mér í bæinn. Kom fiskinum af mér og hann er svo á leið til Skotlands í fyrramálið. Hélt áfram að hugsa til gæludýrsins sem varð að láta sér nægja reykinn af réttunum. Þegar við komum aftur á Selfoss skilaði ég Herði til síns heima. Síðan renndi ég að Samkaupum. Leist vel á bitafiskinn frá Harðfisksölunni og fjárfesti án hiks í einum poka. Mér var að sjálfsögðu vel fagnað að venju við heimkomuna. Svo var pokinn opnaður. Þá glaðnaði yfir litlu dýri. Við skiptum innihaldinu bróðurlega á milli okkar svo sem góðra vina er siður. Þegar við gengum til náða var mikið kumr og mal. Alsælir fósturfeðgar sofnuðu von bráðar. Þegar sá eldri vaknaði í morgun var sá yngri kominn á stjá. Hann hafði gætt þess vel að lofa þeim eldri að sofa í friði. Örugglega minnugur harðfisksins í gærkvöldi.
Það er sól hér. Úti og inni. Ingólfsfjall með gráan koll. Hitastigið aðeins ofan við núllið. Kyrrð og friður yfir öllu. Nú er svo málum komið að ég mun áfram eiga grænu þrumuna. Það er gott fyrir sálina. Ég hef hugsað vel um þennan dásamlega vagn og mun gera það áfram. Með sama akstri og síðastliðin 3 ár mun hann endast mér vel næstu 25 árin. Þá verð ég níræður. Ég mun bruna áhyggjulaus til fjalla á þessari sjálfrennireið næstu sumur. Bílagenið er meðfætt og dellan ólæknandi. Það er nóg fyrir stafni hjá Hösmaga þessa dagana. Nú held ég áfram þar sem frá var horfið í gær.
Vellíðanin hefur völdin og tilhlökkunin til sumarsins einlæg. Veiði og útivera. Samvera við þá sem mér finnst svo vænt um. Og sólargeislinn. Sólargeislinn litli. Ný grein á ættartrénu. Mesta tilhlökkunarefnið.Við harðfiskæturnar í Ástjörn 7 sendum ykkur bestu kveðjur. Þetta verður góður dagur. Ykkar Hösmagi.

Raunir Dýra.

2009-03-08T23:36:00.000-07:00

Í pistli gærdagsins sagði ég frá leik Kára utandyra. Silfur Egils var að byrja þegar ég lauk pistlinum. Þegar því lauk var ég orðinn vindlalaus. Ég átti vindla í bílskúrnum.Tók lásinn af útidyrahurðinni þó ég væri með lyklana í vasanum. Allur er varinn góður eftir að hafa marglæst mig úti. Ég hef ekki lokað nógu vel. Hurðin fauk upp og Kári skaust inn og feykti svalahurðinni upp líka. Myndin í forstofunni lá á gólfinu. Þetta hefur verið heljarhvellur. Ég kom mér þægilega fyrir í gamla letistólnum í stofunni. Klóskerpunni sjálfri. Fékk mér vindil og lét mig dreyma um dásemdir sumarsins. Færði mig svo fram að tölvunni og sá að Dýri hafði yfirgefið ból sitt á teppinu góða. Kippti mér ekki upp við það þvi hann breytir um legustað annað slagið. Eftir dund á kontornum fékk ég mér annan vindil. Svo fór ég að leita að gæludýrinu. Það virtist gufað upp. Mér komu ódóin í hug. Gat það verið að þau hefðu numið þennan góða vin minn á brott? Þau eru nú þekkt fyrir annað eins.Dýri var bara alls ekki innandyra. Þrátt fyrir rokið opnaði ég gluggann á kontornum. Fékk mér að éta og tíminn leið. Eftir sirka 2 tíma birtist mitt kæra gæludýr. Með kollhúfur og heldur framlágt. Vindhvellurinn hefur líkst jarðskjálftanum mikla í fyrra. Kisi dúndraði sér fram af svölunum og flýði. Hann var þó fljótari að jafna sig nú. Það urðu engir eftirskjálftar í kjölfar hvellsins. En dýrið hafði vara á sér það sem eftir lifði dagsins. Hélt sig að fóstra sínum. Svo mjög að aldrei voru nema nokkrir sentimetrar á milli. Nú erum við hér báðir við borðið klukkan 7 að morgni. Vindurinn er að ganga niður og kaffið smakkast vel að venju. Framundan er stórframtalsgerð sem ég hyggst ljúka fyrir hádegi. Ég er eiginlega hættur að skilja hvernig ég hafði þrek í framtalsgerðina áður en netframtalið kom til. Mikill vinnusparnaður og öryggið líka meira.
Það er að verða dúnalogn. Kimi með trýnið út um gluggann. Kaffið búið og nú er bara að hefjast handa við möppurnar. Bestu kveðjur, ykkar Hösmagi.

Sólskin og norðanátt.

2009-03-08T05:03:00.000-07:00

Það er alþjóðabaráttudagur kvenna í dag. Ég sendi öllum stelpunum góða strauma.
Það er sólskin og svolítið kalt
ég sit bara hér og hugsa um þig.
Ég er eins og gíraffinn.
Ég hef ekkert nema tár mín að gefa þér.

Sá rauðbröndótti liggur á teppinu frá Edinborg. Það er miklu betra að kúra hjá fóstra sínum en að þvælast útí rokinu. Það er einstaklega friðsælt í Ástjarnarhreiðrinu í dag. Það er gott. Úti næðir stormurinn. Hlaupinn galsi í Kára og hann kann sér varla læti. Það er nauðsynlegt að leika sér annað slagið. Ég ætla að leika mér mikið í sumar. Meðan vindurinn geysar læt ég mér draumana nægja. Í dag hugsa ég ekki um kreppuna. Né heldur hyskið, sjálfstæðisflokkinn eða framsókn. Mér líður sérstkaklega vel. Nú fer silfrið að byrja og þvínæst siðprýði fallegra stúlkna.
Hösmagi skrifar ekki alltaf svona. En hann er umvafinn góðum hugsunum í dag. Hugurinn bjartur og tær. Það hafa sumir sunnudagar verið erfiðari. Það var gott að vakna í morgun eftir draumlausan nætursvefn. Ég vona að ykkur líði öllum svona vel. Við Kimi sendum blaktandi kveðjur til allra vina, ykkar Hösmagi.

Niðurtalning.

2009-03-06T01:08:00.000-08:00

Ég er kominn á sextugastaogsjötta aldursárið. Niðurtalningin er hafin. 729 dagar í löggildinguna. Fallegur morgunn þó frostið bíti aðeins. Ég borðaði kjötbollur í sósu í tilefni gærdagsins. Raikonen fékk Eyrarfisk og ég fékk líka að smakka úr pokanum. Báðir harla ánægðir. Í gær birtist skoðanakönnun frá Gallup. SF og VG með hreinan meirihluta. Það sem mér fannst afar athyglisvert í þessari könnun var það, að 41% kjósenda 30 ára og yngri ætla að kjósa VG. 25% sama hóps ætla að kjósa íhaldið. Þó það sé auðvitað alltof hátt hlutfall gleður þessi niðurstaða gamalt vinstrihjarta.Mogginn hefur ekki enn minnst á þetta. Og Rúv er við sama heygarðshornið. Þeir báru könnunina bara undir Geir og Jóhönnu. Ég held að núverandi ástand brenni heitast á þessu unga fólki. Fólkinu, sem hefur skuldsett sig mikið undanfarin ár og á slatta af börnum. Margt af þessu fólki á mjög erfitt eftir skaðræðisstjórn íhaldsins á þessu blessaða landi undanfarin ár. Þó ég sé flokkslaus maður er ég enn sama sinnis í pólitíkinni. Ég vil ekki " grunngildi sjálfsstæðisflokksins" né " mannúðarlega markaðsstefnu" hans. Því miður mun hann fá allt of mikið fylgi. Hann mun þó verða í sögulegu lágmarki og vonandi verður hann áhriflítill um stjórn landsins um langa framtíð. Þó margt skilji SF og VG að er það þó von mín og trú að þeir muni starfa saman eftir kosningar. Það yrðu söguleg tímamót á Íslandi. Blátt áfram unaðslegt að hafa íhaldið í frosti með framsóknarflokknum. Frjálslyndir hafa tekið upp iðju termítanna og eru búnir að tortíma flokknum. Farið hefur fé betra. Ég hef heldur ekki mikla trú á nýjum framboðum. Þau eiga að sjálfsögðu fullan rétt á sér en ég held að uppskeran verði rýr. Þó ekki skipti meginmáli hvort SF eða VG hafi forystuhlutverkið í nýrri stjórn tel ég þó miklu eðlilegra að VG fengi það, verði niðurstöður kosninganna svipaðar og í könnuninni. SF stæði í stað en fjöldi þingmanna VG færi úr 9 í 17. Það yrði einn stærsti sigur stjórnmálaflokks á lýðveldistímanum.

Hér ríkir ró og friður. Vellíðan íbúanna í Ástjörn 7, 205 er mikil. Annar sefur í dyngju sinni og dreymir um veiðilendur. Hinn með fullri rænu við tölvu sína og hugsar líka um veiðilendur. Góan er enn köld en það eru bara 2 vikur í jafndægri á vori. Ég hef á tilfinningunni að apríl verði góður mánuður. Tangavatn með Magga og kannski verður sjóbirtingurinn snemma á ferðinni eins og stundum í gamla daga. Óskir um indælan dag til ykkar allra, ykkar Hösmagi.

Tár gíraffans.

2009-03-04T00:54:00.000-08:00

Þegar gott fólk er farið að kvarta undan bloggleti verður að bæta úr. Eftir að hafa lokið við Þráinn Bertelsson, Sjón, Þórberg og herra Pip tók Alexander McCall Smith við. Búinn með kvenspæjarastofu nr. 1 og kominn á leið með tár gíraffans. Þessi höfundur er góður og þýðandinn er undirrituðum ákaflega kær. Kærari en nokkurntíma fyrr af alveg sérstökum ástæðum. Fyrir þá sem ekki þekkja til skal upplýst að þýðandinn er heitkona skáldsins míns. Ég hugsa til þeirra í dag. Þessi höfundur á allt það lof skilið sem hlaðið hefur verið á hann. Það er mikið tilhlökkunarefni að leggjast í flet sitt þegar kvölda tekur og njóta þessa yndislega lesturs. Einkadóttirin lánaði mér allar 7 bækurnar svo bókasafnið fær frí frá mér í bili. Nú er ég aðeins byrjaður á framtölunum og brátt fer fólk að taka við sér. Líðan okkar fósturfeðga er alveg geysilega góð í dag. Sá yngri horfir spekingslega út um gluggann. Ingólfsfjall að mestu grátt. Gjóla og lítilsháttar frost úti. Löngu orðið albjart og nú bíð ég eftir hlýjunni. Öll veiðileyfi sumarsins í húsi. Því miður fékk ég færri daga í Ölfusá en ég átti von á. Mikil ásókn í veiðileyfi þrátt fyrir kreppu.Menn reikna með góðri veiði og hugsa til sumarsins í fyrra. Þetta verður til þess að ég mun örugglega reyna fyrir mér í Kaldaðarnesi. Það er í rauninni afar einkennilegt að ég skuli aldrei hafa bleytt færi á þessum víðkunna veiðistað. Örstutt að fara og þarna eru einhver bestu sjóbirtingsmiðin á svæðinu. Sumir halda því fram að megnið af sjóbirtingnum sem gengur í Ölfusá fari ekki lengra. Sannarlega mun ég láta reyna á þetta í sumar og haust. Þegar Hösmagi hættir að hugsa um bakka ár og vatna verður hann orðinn ansi aumur. Þó aldurinn færist yfir og nú séu bara 2 ár og dagur í löggildinguna er ég sæll með tilveruna. Þrátt fyrir tekjufall skrimtir þetta allt saman og græna þruman verður a.m.k. enn um hríð í eigu Hösmaga ehf. Félagið varð 4urrra ára á sunnudaginn var. Nokkuð bratt og á framtíðina fyrir sér. Kaffið er uppdrukkið og Kimi hefur aftur dregið sig í dyngju sína. Við erum báðir alveg arfaslakir á sál og líkama. Ég hlakka til komandi daga með sól í sinni. Í einlægni, ykkar Hösmagi.

Meira af húfum.

2009-02-24T22:36:00.000-08:00

Ég fór í Húsasmiðjuna á föstudaginn en þar var engin góð húfa til sölu. Ég hitti Viktor Óskarsson stórveiðimann sem vinnur þarna og sagði honum mínar farir ekki sléttar. Geimvera hefði stolið minni heittelskuðu húfu. Viktor gaf mér húfu með merki Húsasmiðjunnar. Svona frekar en ekki neitt. Síðan fór ég í Nótatún en gekk þaðan bónleiður. Þegar ég var sestur uppí Lancerinn hringdi síminn. Það var Gréta. Mín kæra húfa var fundin. Franski rennilásinn hafði krækst í ponsjóið hennar. Þetta var sem sagt létt grín hjá geimverunni. Ég varð alshugar feginn og það var virkilega notalegt að setja þetta blessaða höfuðskjól upp aftur. Ég er nýkominn inn úr gjólunni og það var gott að skýla eyrunum fyrir Kára. Ég vaknaði klukkan eitt í nótt. Mig hafði dreymt að ég hefði verið dæmdur til dauða. Ásamt mörgum öðrum. Alveg voðalegt mál. Það var búið að taka nokkra af og röðin var komin að mér. Ég vildi alls ekki sætta mig við þetta. Réðst á einn djöflamerginn og í því að ég var að ganga frá honum hrökk ég upp. Ég treysti mér ekki til að sofna aftur. Hitaði mér kaffi, kíkti á netið og lyfti teningunum nokkrum sinnum. Sofnaði svo aftur út frá herra Pip.
Yfirnagarinn var í kastljósinu í gærkvöldi. Oft hefur mér blöskrað þessi maður. Ræða hans var eitt samfellt lof um hann sjálfan. Hrakyrti spyrilinn og alla þá sem hafa vogað sér að gagnrýna hann. Þó ég sé lítt menntaður í sálfræði og geðsýki hugsaði ég mitt. Þessi maður er bæði með mikilmennskubrjálæði og ofsóknaræði á háu stigi. Dónaskapurinn er ekki nýr af nálinni. Dólgshátturinn alkunnur. Hvenær skyldi þessari martröð ljúka? Vonandi sem allra fyrst. Tapsár framsóknarmaður hefur reyndar lengt veru þessarar martraðar í seðlabankanum. Það er að koma í ljós það sem ég óttaðist. Ríkisstjórnin er í gíslingu framsóknarflokksins. Það er vont hlutskipti. Ég vona að við berum gæfu til að kjósa rétt í apríl. VG og SF fái hreinan meirihluta. Stærsta ágreiningsefni þessara flokka, aðild að ESB, er auðvelt að leysa. Láta þjóðina kjósa um hvort við sækjum um aðild eða ekki og una niðurstöðunni. Það mun verða nokkur endurnýjun í þingliði þessara flokka. Ég vona að skynsemin sigri. Íhaldið verði útí kuldanum og framsókn á ekkert gott skilið. Það á að draga glæpahyskið fyrir rétt. Freista þess með öllum ráðum að finna það þýfi sem enn kann að vera til. Réttlætiskennd okkar krefst þess. Við bíðum og sjáum hvað gerist í kosningunum.
Það styttist í mars. Hann verður fljótur að líða eins og janúar og febrúar. Veturinn bærilegur og vorið nálgast óðfluga. Hugurinn þegar farinn að leita til bakkanna. Við Dýri biðjum að heilsa, ykkar Hösmagi.

Djöfullinn sjálfur.

2009-02-23T04:44:00.001-08:00

Í pistlinum á föstudagsmorguninn var ég að tala um fjárfestingu í nýjum Zippó. Þegar ég kom í búðina til Boga Karls voru bara til 3. Einhvernveginn leist mér ekki á neinn. Einn var upphleyptur einhverju krumsprangi, annar málaður gulur og gott ef ekki blár að auki og sá þriðji með viðbættri plötu öðrumegin. Þeir höfðuðu ekki til míns alþekkta fegurðarskyns. Alíensarnar hafa orðið uppvægir og tóku heldur betur til sinna ráða. Ég keypti mér andskoti góða húfu í vetur. Með loðfóðri. Hlýja og notalega. Það hefur alls ekki veitt af slíkum þarfahlut í umhleypingum vetrarins. Ég fór út með húfuna á laugardaginn. Ég var líka með hana síðdegis. Við Gréta skruppum niður á Eyrarbakka að kíkja á brimið. Ég drakk svo kaffi hjá henni þegar við komum til baka. Í gærmorgun greip ég í tómt á forstofusnaganum. Varð að láta gamla ullarhúfu nægja.Ágætt pottlok en ullin ertir ennið. Loðhúfan var ekki í Lancernum né í bílskúrnum. Ég hringdi í Grétu rétt áðan. Engin húfa. Húfan er semsagt HORFIN. Það þarf ekki frekari vitna við. Ódóin eru enn á sveimi í kringum mig. Þau ættu sannarlega ekki á góðu von næði ég til þeirra. Sennilega komist inní forstofuna og eldsnöggt gripið þetta góða höfuðskjól. Ég er alveg bálillur. Það er kreppa. Hver króna er dýrmæt í dag. Nú verð ég að kaupa mér aðra húfu. Reima hana svo vandlega á hausinn áður en ég geng til náða á kvöldin. Þetta fer að verða skrautlegt í svefnherberginu. Ég með húfu, bleika dulan undir koddanum og herconinn á milli okkar Dýra. Af hverju ráðast þessi kvikindi ekki á Árna Matt með allar millurnar? Árna æruprýdda nýúthreinsaðan frá Póllandi? Ekki hef ég neitt til saka unnið annað en að vera til. Ég er bæði reiður og undrandi. Þessi ódó virðast hafa einstakt yndi af að skaprauna mér. Ég ákalla nú hin góðu öfl mér til verndar og fulltingis. Vona að þau slái um mig skjaldborg og reki þessi kvikindi til síns heima. Það er ekki góð líðan að vera hugsandi um hvar þau höggvi næst. Nú fer ég á stúfana í húfuleit. Bestu kveðjur aftur, ykkar Hösmagi.

Drungi.

2009-02-23T01:50:00.000-08:00

Snjókoma morgunsins er að verða að slyddu og slyddan verður brátt að rigningu. Hálf drungalegt veður á öðrum degi Góu. Ég renndi í Garðabæ í gær. Fjölmenni í afmæli Egils sterka og miklar kræsingar í boði að venju. Kom við hjá systur minni yngri á Kársnesbraut. Þar var bógsteik á borðum. Léttbrúnaðar smákartöflur og annað meðlæti. Ég stóð á blístri við heimkomuna. Verð líklega að gæta mín á að fá ekki velmegunarístru í kreppunni. Hef þó ekki miklar áhyggjur og treð bara í mig því sem mér gott þykir. Það vill mér til að vera á öfugu róli við svo marga aðra. Sífelld barátta við að halda holdum meðan þeirra barátta er við spikpúkann. Við Kimi erum báðir fremur grannir. Spengilegir og að sjálfsögðu fjallmyndarlegir. Hann vingsar nú skotti sínu yfir lyklaborðið og það er ekki til bóta við pistlaskrif.
Mig klæjar orðið í puttana eftir að byrja á framtölunum. Það verður allt komið á fullt í næstu viku.Netframtalið opnar á sunnudaginn og ég mun byrja á sjálfum mér. Létt verk og löðurmannlegt. Þarf ekki einu sinni að telja köttinn fram. Hann er mér þó heilmikils virði. Fagnaði mér ógurlega í gærkvöldi við heimkomuna úr sunnudagsreisunni. Það verður væntanlega nóg að gera í marsmánuði. Svo kemur apríl með páska og þá er víst að herconinn verður virkjaður. Við Maggi eigum dag inni við Tangavatn. Ég hringi í frúna og fæ vitneskju um hvenær sleppt verður í vatnið. Næstu mánuðir eru tilhlökkunarefni að venju. Birta, fiskur og útivera. Nóttlaus veröld og ég gleymi íhaldinu, framsókn og öðrum leiðindafyrirbærum. Verk þessara flokka ætla ég ekki að fyrirgefa. Bara allsekki. Við rauðliðarnir sendum bestu kveðjur til vina okkar. Allra sem okkur finnst vænt um. Og þeir eru þónokkrir. Ykkar Hösmagi.

Kalt regn.

2009-02-19T22:17:00.000-08:00

Dimmviðri og regnið er blautt og kalt. Smýgur innað beini. Gott að koma aftur inní hlýjuna og ekki spilltu móttökurnar. Kominn föstudagur og enn ein helgin að skella á.Gangrimlahjólið herðir stöðugt á sér. Góan að byrja og aðeins mánuður í vorjafndægur. Hinn þungi niður tímans er samur við sig. Eilífðin blívur. Allt er þó afstætt. Hinn rómaði 3ja stanga dagur er t.d. ótrúlega fljótur að líða. En stundum er eins og tíminn sé við það að stöðvast. Vikudvöl á gjörgæsludeildinni í desember 1985 var eins og heilt ár. Þar var ys og þys. Ekki út af engu heldur vegna þess að þar var mikið af veiku fólki. Það var stór klukka á einum veggnum. Ég horfði mikið á þessa klukku þegar ég var með rænu. Eitt kvöldið leit ég á þessa klukku tilveru minnar. Hún var nákvæmlega 9 að kvöldi. Ég ákvað að kúra mig niður og sofa sem lengst. Það tókst og ég sveif inní drauma mína og dvaldi þar lengi. Þegar ég komst til meðvitundar aftur voru liðnar 2 mínútur. Stuttur tími en heil eilífð fyrir mig. Það er stundum gott að líta aftur fyrir sig. Án þess að velta sér upp úr fortíðinni. Oftast hefur lífið verið mér ljúft og gjöfult. Hið neikvæða er að mestu gleymt. Hið ljúfa og góða stendur eftir. Í hinni endalausu bylgjuhreyfingu er útsýnið eftirminnilegra af öldutoppunum en úr dalnum á milli þeirra. Ég hlakka enn til komandi daga. Þó febrúarregnið sé kalt kemur sólin upp aftur. Vorið skilar sér að venju. Þessi dásamlegi tími þegar ilmurinn af landinu fyllir vitin. Fiskurinn fer að vaka og Himbriminn kætist. Þá víkja vond stjórnvöld og þjófahyski á braut.

Þottavélin hamast með úlpurnar mínar í maganum. Raikonen löngu hættur að kippa sér upp við svoleiðis smámuni. Jafnvel ryksugan er orðin hættulaus. Fyrir lítið dýr er nóg að fá mat, vatn og stroku annað slagið.
Í dag ætla ég að taka áhættu. Gerast áhættufjárfestir. Kaupa mér nýjan Zippó. Ég ætla að kreista hann í greip minni dag og nótt. Ég veit að það hlakkar í ódóunum. Ég hef það samt á tilfinningunni að hið góða muni standa með mér. Ég geti tekið gleði mína að fullu á ný. Kvikindin verði úti í kuldanum. Snúi sér að Finni, Ólafi, Davíð og draugskrattanum. Álgerði, Geir og véfréttinni frá Bifröst. Ég ætla samt að vera á varðbergi. Alíensarnir er lúmskir og liggja stundum á fleti fyrir þar sem maður síst á von á þeim. Þvottahúsrokkurinn er nú þagnaður og tími til að hengja upp. Kaffið uppurið og Kimi sofnaður aftur. Yndiskveðjur frá okkur, ykkar Hösmagi.

Þokuloft.

2009-02-16T03:14:00.000-08:00

Það er þokuloft og sá sem setti snjóinn á svalirnar mínar hefur nú fjarlægt hann. Kimi er ánægður með það og viðrar þar skott sitt. Þetta er merkisdagur því Hæstiréttur er 90 ára í dag. Ég minnist dagsins því Orator, félag laganema, gerði þetta að sínum hátíðardegi. Okkur var gjarnan boðið eitthvað þennan dag. Margir fengu sér aðeins í ranann og svo var oftast ball að kvöldi. Þetta var ágæt tilbreyting frá hversdagsleikanum. Stundum var ég að vinna á orkustofnun og slapp við gleðskap og tilheyrandi timburmenn.
Nú hef ég lokið við æviminningar Þráins Bertelssonar. Æskusöguna sem lýkur við stúdentsprófið og svo hina sem spannar næstu 10 árin. Fyrri bókin er frábær lesning. Einlæg og heilmikil lýrik í henni. Kannski finn ég samkennd með Þráni í mörgu sem hann segir frá. Við erum fæddir sama árið og ég kannast við mikinn fjölda fólks í bókinni. Hann ólst upp hjá föður sínum sem honum fannst afar vænt um. Móðir hans var sjúklingur og vistuð á Kleppi. Hann saknaði hennar mjög. Seinni bókin er ágæt líka en höfðaði minna til mín. Kannski skrifar hann framhald síðar. Lipur penni og húmoristi ágætur.
Enn er ég að kveikja mér í Bagatello. Blái plastkveikjarinn dugar svo sem, en söknuðurinn er enn sár eftir óþokkabragð geimverunnar. Mig langar í annan Zippó en þori varla að kaupa hann. Örugglega fleiri ódó á höttunum eftir slíku verkfæri. Bleika dulan góða og Herconinn eru þó enn í mínum höndum. En þetta eru þrælslæg kvikindi og til alls vís. Skaprauna fátækum alþýðumanni með grikkjum sínum. Ég magna þau á seðlabankastjórann. Útrásarvíkingana og forsetann. Íhaldið eins og það leggur sig. Það myndi líka bara gleðja mig ef þau hrekktu Finn Ingólfsson og Ólaf í Samskipum.
Ég skrapp með Herði uppí Grímsnes á laugardaginn. Óðalið kúrði undir Búrfellinu. Eitthvað ljúfsárt við að koma þarna uppeftir. Ljúft að hugsa um draumana um kærleikskotið og hin andlegu sköpunarverk. Lyngið og bláberin. Sárt vegna glæpahyskisins sem nánast hefur komið í veg fyrir að draumarnir geti rætst. Það væri verðugt verkefni fyrir alíensana að koma votti af samvisku í hausinn á hyskinu. Þá væri smávon til að þeir fengju mína fyrirgefningu.
Nú er hugur minn í Edinborg. Ég veit reyndar ekki hvort skáldið er komið aftur úr svíaríki til heitkonu sinnar. Hugurinn hvarflar til jóla 2004. Þegar skáldið setti upp þessa bloggsíðu og fyrsti pistillinn fór í loftið. Síðan hef ég bætt 599 við að þessum meðtöldum. Það er eiginlega hálfgildings afmæli. Rúm 4 ár liðin svo pistill nr. 1313 gæti sem best orðið að veruleika í kringum sjötugsafmælið. Þrátt fyrir allt er enn gaman að þessu. Og fleiru. Ég er hlaðinn orku og æðruleysi. Hlakka til vorsins eins og fyrr. Við Kimi, rauðliðarnir galvösku, sendum vinum okkar bestu kveðjur. Spes kveðja til litla sólargeislans, ykkar Hösmagi.

Gas, gas, gas.

2009-02-13T02:04:00.000-08:00

Margir muna eftir gasmanninum við Rauðavatn í fyrra. Spreyjandi gasi á saklausa borgara. Mér datt þessi geðsjúklingur í hug þegar ég las frétt á mbl.is um að danir hugleiddu nú að leggja gasskatt á danska kúabændur. Með því að ropa og reka við gefa beljurnar frá sér einhver ósköp af metangasi. Og svínin líka. Mér finnst þetta nú hálf spaugilegt. Bóndi hér í nágrenninu hefur reyndar virkjað beljurnar sínar. Orðin gasbóndi og notar það á bíla og traktora. Frábært framtak. Kannski er þetta þjóðráð á krepputímum. Kannski gæti ég virkjað köttinn minn. Og sjálfan mig að auki. Framleitt gas til að spara rafmagn. Lifa á þrumara, appelsínum, þurrkuðum perum og baunum. Þetta er líklega léleg hugmynd. Of lítið til að vinnsla borgi sig. En allt í lagi að huga að sparnaðarleiðum. Svokölluð dagvara hefur hækkað um 32% á einu ári. Það er ekki lítill útlátaauki fyrir okkur. U.þ.b. 15.000 manns án atvinnu. Og litlu íhaldsstrákarnir á þingi, einkum Sigurður Kári og Birgir Ármannsson, segja að það þýði ekkert að "klína" þessu á sjálfstæðisflokkinn. Þeir djöflast bara á ríkisstjórn sem aðeins hefur setið í nokkra daga. Þyrla upp endalausu moldviðri til að reyna að fela afglöp síðustu 18 ára. Afglöp, sem komið hafa þorra almennings á vonarvöl. Nú þurfum við nánast leyfi frá alþjóða gjaldeyrissjóðnum til að fá að reka við. Kannski kemur krafa frá sjóðnum að gasið verði virkjað. Ég hef stundum talað hér um hvað trúin hefur verið mannkyninu skaðleg. Í nærri 2 áratugi hafa stjórnvöld trúað á frjálshyggju og hin óheftu markaðslögmál. Allt eftirlit af hinu vonda. Markaðurinn sjálfur átti að sjá um það. Og árangurinn er þjóðargjaldþrot. Ég er nú ekki að óska eftir skömmtunaröldinni aftur. Brauðmiðum og leyfi frá fjárhagsráði til að kaupa einn poka af sementi. Hinsvegar æpa íhaldsmennir á þá sem leyfa sér að gagnrýna flokkinn þeirra. Þetta er alþekkt aðferð. Í nýliðnu morðæði ísraelsmanna á Gaza voru þeir sem leyfðu sér að gagnrýna þá kallaðir gyðingahatarar. Því miður munu alltof margir kjósa íhaldið í næstu kosningum. Vegna trúar sinnar á flokkinn. Flokkinn sem brást svo herfilega. Þrælslundin er sérkennilegt fyrirbæri. Kossarnir á vönd kvalaranna eru undirrituðum óskiljanlegir. Á 18 árum hefur íhaldið plantað sínu fólki allsstaðar í stjórnsýsluna. Birgir Ármannsson fimbulfambaði um tölvupóst frá gjaldeyrissjóðnum löngu áður en forsætisráðherra var kunnugt um hann. Ástæðan er öllum ljós. Hann fékk meldingu frá einum trójuhestinum í ráðuneytinu. Og var nógu vitlaus til að hlaupa með hana í ræðustól í þinginu. Við skulum bara hreinsa til.Látum andskotans íhaldið gaspra sem hæst og líkja eðlilegum mannabreytingum við hreinsanir Stalíns. Þeir vita miklu betur. Þeir vilja bara ekki sætta sig við að þeirra tími er liðinn. Og geta ekki sætt sig við að stefna þeirra hefur beðið algjört skipbrot. Þeir eiga ekki skilið eitt einasta atkvæði frá okkur lýðnum. Punktum og basta.
Nú er hitinn að nálgast 5 gráður. Væta og mikið krap. Helgi framundan og ég þarf að taka mig á í heimilisstörfunum. Ryk og skúm út um allt. Nú væri gott að hafa vélmenni til aðstoðar. En gamla lagið er ágætt líka. Bara að byrja og þá verður eftirleikurinn auðveldur. Kimi skrapp aðeins út að viðra sig. Lagstur aftur eins og Ólafur Kárason forðum. Bestu kveðjur frá báðum, ykkar Hösmagi.

Drulla.

2009-02-12T03:49:00.000-08:00

Geir viðukennir í dag að hafa drullað á stofugólfið hjá mér. En hann telur enga ástæðu til að biðjast afsökunar. Aðrir hafi kannski drullað enn meira en hann sjálfur. Það verði að bíða niðurstöðu rannsóknar sérstaks saksóknara á hver hafi skitið mest. Hún er undarleg hegðun sjálfstæðismanna þessa dagana. Þeir trúa því varla að þeir hafi misst völdin. Gremjan og heiftin ráða för. Hvalveiðikvóti Einars Guðfinnssonar var gefinn út í þeim tilgangi einum að blása til vandræða. Björn heimtar rannsókn á blaðrinu í Ólafi Ragnari. Það er verið að tefja ríkisstjórnina sem mest má. Þrasa um einskisverða hluti. Íhaldsmennirnir 2 sem voru bankaráðsformenn Glitnis og Kaupþings sögðu af sér í fyrradag. Það átti að líta svo út að þetta væru pólitískar hreinsanir. Steingrímur bað þá báða að sitja fram á vor. Magnús og Valur misstu glæpinn og íhaldsmennir eru bálreiðir kjaftfora sveitamanninum sem nú vermir stól fjármálaráðherra. Stjórnin hefur nú 71 dag til starfa. Þar af eru 26 helgi- og hátíðisdagar. Þá eru 45 eftir.Ég óska ríkisstjórninni farsældar í störfum. Ekki mun af veita. Hún situr uppá náð og miskunn framsóknarflokksins. Illt er að eiga þræl að einkavin var einu sinni sagt. Ég treysti ekki þessum flokki nú frekar en áður. Hann er að reyna að smeygja sér inn bakdyramegin og látast vera ábyrgur. Og gullfiskaminni kjósenda er alþekkt hér. Flokkshollustan rík. Sjallarnir hér munu raða þeim Árnum báðum í efstu sæti listans.Annar dæmdur þjófur og hinn þekktur fyrir að gefa bróður sínum leifarnar af hergóssinu suður í Keflavík og þverbrjóta stjórnsýslulög við skipun héraðsdómara. Þeim er greinilega ekki klígjugjarnt sjöllunum hér í suðurkjördæmi. Andskotinn eigi þetta lið allt saman.
Það er enn lítilsháttar frost. Það er þó hlýrra loft á leiðinni. Ég varði gærdeginum í að rifja upp lögfræðina. Og að auki er skattframtal Hösmaga ehf. tilbúið til sendingar. Kimi var eitthvað lumpinn í gær og ældi á stofugólfið. Þótti það greinilega mjög miður. Það var þó bara smámál að strjúka þetta af parketinu. Hann hresstist svo þegar á daginn leið. Liggur nú og sefur í dyngju sinni.

Ég sendi lambakónginum mínum hjartanlegar hamingjuóskir með daginn.Kjósum rétt í vor, bestu kveðjur, ykkar Hösmagi.

Afmælisdagar.

2009-02-11T01:46:00.000-08:00

Frumburðurinn, Berglind Anna, á afmæli í dag og sonur hennar, lambakóngurinn sjálfur verður 23ja á morgun. Samt finnst mér alls ekki að ég sé að verða forngripur. Rúmar 3vikur í 65 ára afmælið.Þá byrja ég að telja niður úr 730. Löggilt gamalmenni 67. Ómagi á ríkiskassanum til æviloka. Og það ætla ég að verða lengi. En ég vona að ég verði ljúfur. Ekki geðvondur og sínöldrandi yfir öllu. En þó mun ég áfram andskotast út í framsókn. Og íhaldið líka. Nagarann og afturgönguna. Nú bíðum við eftir kosningum. Þær verða nokkur prófsteinn á skynsemi þjóðarinnar. Það er sannarlega engin öfundsverður að taka við framtíðarstjórn landsins. Tólf ára valdaferill íhalds og framsóknar verður okkur dýr. SF ber nokkra sök en þó er hún smámunir einir í samanburði við hina. Mestu máli skiptir að rasskella sjálfstæðisflokkinn þannig að hann verði helst sem áhrifaminnstur í áratugi. Ofurtrú markaðhyggjunnar verður að setja til hliðar. Núverandi ástand er m.a. afleiðing hennar. Græðgisvæðingin, krógi þeirra Davíðs og draugsins, hefur leitt til þess að tugþúsundir íslendinga eru í slæmum málum þó þjófarnir séu flestir með allt sitt á þurru. Þó ég sé nú flokkslaus maður verð ég ekki í vandræðum við kjörborðið í vor.
Það er búið að vera kalt hér alllengi. Svona 6-9 stiga frost en nú er von á breytingu. Hláka framundan langt fram í næstu viku. Góð tilbreyting og styttir veturinn. Þrátt fyrir ástandið hlakka ég til vorsins. Veiðiskapar og útiveru við ár og vötn í sumar. Ég mun berjast með kjafti og klóm fyrir því að ég fái notið þessara dásemda.
Það er mikil ró yfir okkur kisa mínum. Hann er latur við útiveru í snjó og frosti. Ég held mínu striki á morgnana. Mjög hressandi að teygja að sér hreina loftið þó það sé svolítið kalt. Andleg og líkamleg vellíðan er mikilverð og ég er bara í góðu formi á báðum sviðum. Og sólargeislinn minn skín og yljar. Við Kimi sendum öllum vinum okkar bestu kveðjur, ykkar Hösmagi.

Geimvera...?

2009-02-04T02:42:00.000-08:00

Fyrir allmörgum árum vorum við Siggi Þráinn á leið austur Flóaveg. Þá mælir hann allt í einu: Afi, túir þú á guð. Mér varð lítið úr svörum og þá varð lambakónginum að orði: Ég trúi ekki á guð en ég trúi á geimverur. Sennilega er hálfur annar áratugur síðan þessi orð voru sögð. Kannski muna einhverjir eftir pistlinum um kveikjarann sem hvarf. Þar komu geimverur mjög við sögu. Þegar Zippóinn kom í leitirnar í fóðrinu á úlpunni þá fór ég aftur að efast um tilveru geimveranna. En nú er ég ekki í nokkrum vafa og koma blessuð eldfærin aftur við sögu. Dag einn í síðustu viku þegar ég var á leið útúr húsi snemma morguns, stakk ég vindlapakkanum og Zippóinum í hægri hliðarvasann á úlpunni. Samkvæmt venju.Hélt mína leið og fylgdist með morgunsauðunum. Þar kom að ég fann til löngunar í þessa vindlategund sem ég hef svælt í 38 ár. Kannski er nú iðja sú engum til fyrirmyndar. Vindlarnir voru í vasanum en eldfærið í stálhylkinu var horfið. Þegar heim kom hófust miklar þreifingar. Járnið hlyti að vera í fóðrinu. En ég varð fyrir vonbrigðum. Þessi yndisgripur var gjörsamlega uppgufaður. Nú er ég sannfærður um að ósýnileg geimvera sat fyrir mér við útidyrnar og laumaðist í vasa minn án þess ég yrði þess var. Smeygði sér svo hlakkandi frá, stolt yfir þessu óþverrabragði. Það getur engin önnur skýring verði á hvarfi kveikjarans. Bara alls engin.Nú sit ég eftir með sárt ennið og velti fyrir mér dulargátum tilverunnar. Þessi missir kemur sér afar illa í kreppunni. Einkum og sérílagi fyrir skaðasára menn eins og mig. Ég skora hér með á þennan alíens að skila þessum dýrgrip ekki seinna en strax. Sálarlíf mitt hefur beðið hnekki og ég get vart á heilum mér tekið. Finnst þetta verulega andstyggilegur verknaður. Nú verð ég að notast við sálarlausan plastkveikjara. Get ekki vegið volgt stálið í hendi mér né dedúað við við að hella bensíni í púðann. Kannski hefur þessi geimveruskratti verið í útrás. Eins og glæpahyskið sem stal margfaldri þjóðarframleiðslunni. Ég er vonlítill um að sjá Zippóinn minn aftur. Shitbara.

Nú er 8 stiga gaddur. Glampandi sól og nokkur vindur og nauðsyn að klæða sig vel utanhúss. Græna þruman í tjöruþvotti eftir of margar ferðir til höfuðstaðarins. Ég bara varð að fórna aurum í þessi þrif. Saltið og tjaran eiga alls ekki heima á svona gullvagni. Kimi er nýrisinn úr dyngju sinni. Bætti á sig mat í eldhúsinu og er nú sofnaður að nýju í gamla tágastólnum. Samvera okkar góð sem fyrr og báðum kær. Bestu kveðjur frá okkur rauðliðum, ykkar Hösmagi.

Pólís,Pólis, Bauka Jón og jarðarför.

2009-02-01T03:33:00.000-08:00

Febrúar byrjar með frosti og snjópeðringi. Síðasti dagur janúar var ægifagur. Hitinn yfir frostmarki, glampandi sól og logn að auki. Ég lauk við söguna af Bauka Jóni. Sögu frá sautjándu öld eftir sagnfræðinginn Jón Þ. Þór. Fróðleg og skemmtileg saga af Jóni Vigfússyni, sem bæði var sýslumaður og biskup. Þegar hann var dæmdur frá embætti sem sýslumaður borgfirðinga hélt hann til Kaupmannahafnar og þar bætti einvaldskóngurinn upp embættismissinn og gerði hann að varabiskup. Hann hélt heimleiðis og beið svo bara eftir að Hólabiskip þóknaðist að gefa upp öndina.Það hitnaði líka verulega undir honum í því embætti. Hann dó úr landfararsótt áður en mótdrægismenn hans gætu komið honum frá embætti. Þeir sektuðu hinsvegar líkið frekar en ekki neitt. Eftir að hafa lokið við Bauka Jón tóku Sjöwall og Wahlöö við á ný. Pólís, pólís, pungurinn frýs með pylsu og ís. Þá á ég bara 2 síðustu bækurnar eftir.
Ég fylgdi svo gamalli konu til grafar eftir hádegið. Hún hét Þóra Magnúsdóttir og varð 88 ára að aldri. Það hlýtur að vera gott að láta jarða sig í svona fallegu veðri. Þóra var einn af skjólstæðingum mínum í lagalegum efnum. Hún var löngu búinn að leggja sitt af mörkum til þjóðfélagsins og hefur örugglega dáið sátt.
Við Kimi höfðum það síðan gott hér heima það sem eftir lifði dagsins. Spaugstofan nokkuð góð í gærkvöldi. Evróvision áþjánin að henni lokinni. Ég fylgdist með svona einu sinni. Meðan kosið er hefur hrúturinn Hreinn völdin. Magnþrunginn karakter sem ég hef ákaflega gaman af og læt ekki framhjá mér fara. Það var allt vaðandi í geimverum í þessum þætti. Ég segi ykkur bráðum meira af alíensunum. Þær eru ekki alveg af baki dottnar gagnvart undirrituðum. Gerðu mér óþverragrikk fyrir nokkrum dögum.
Nú fer silfur Egils að byrja. Yfirleitt ágætur þáttur sem ég reyni að missa ekki af. Svo fáum við líklega nýja ríkisstjórn þegar á daginn líður. Kosningar verða svo 25. apríl og vonandi verða þá algjör þáttaskil. Hagsmunir almennings teknir fram yfir gróðahyggju nokkura vesalinga. Vesalinganna, sem eiga mesta sök á hvernig fyrir okkur er nú komið. Glæpahyskis sem bæst væri að úthýsa úr mannlegu samfélagi.
Eftir speltbrauð með reyktum Ölfusárlaxi er gott að fá sér einn vindil með silfrinu. Við Dýri sendum okkar bestu kveðjur til allra vina, ykkar Hösmagi.

Föstudagur.

2009-01-30T00:25:00.000-08:00

Janúar senn lokið. Fremur svalt og u.þ.b. 20 cm jafnfallinn snjór. Ekki beinlínis vítamínsprauta á geðheilsuna og nú er hann hættur við hlákuna sem átti að koma eftir helgina. Veður er þó kyrrt og birtan eykst með degi hverjum. Aðalfundur stangveiðifélagsins er í kvöld. Þangað fer ég með pöntun á 8 veiðidögum og geri ráð fyrir hinum rómaða 3ja stanga degi þann 16. júlí. Sá 17. er frátekinn fyrir afadrottninguna Ingunni Önnu. Svo er Veiðivatnaferðin ráðgerð 11.-13. ágúst. Þó ástandið í þjóðfélaginu sé bágborið þýðir ekki að leggjast í sút og leggja árar í bát. Ég sótti jeppann aftur í gær og hafði nærri tekist að selja hann hér. Það klikkaði þó á síðustu stundu en ég er vongóður um að það takist samt innan tíðar. Það myndi létta mikið á stöðunni. Kimi snuddar hér í kringum mig og lítill áhugi fyrir útiveru í kulda og snjó.Samvera okkar hin ljúfasta eins og áður.
Nú er búist við nýrri ríkisstjórn um helgina. Talið líklegt að Gylfi Magnússon verði viðskiptaráðherra og Björg Thorarensen dómsmálaráðherra. Þetta er gott fólk sem örugglega styrkir stjórnina. Það er þó mikilvægt að hún sitji í sem allra skemmstan tíma. Við þurfum nýjar línur eftir að þjóðin hefur kosið. Því miður erum við nú þekkt fyrir gullfiskaminni og undir niðri óttast ég að við verðum í pattstöðu. Skilyrði framsóknar fyrir stuðningi við stjórn VG og SF eru líka erfið. Vonandi tekst þó að gera góða hluti á þessum stutta tíma fram að kosningum. Það væri strax verulegur árangur ef tækist að moka út úr musterinu við Svörtuloft. Gera yfirnagarann áhrifalausan til eilífðar. Það hefur alltaf verið borin von að ætla sér að breyta skítlegu eðli. Það væri verðugt rannsóknarefni að kryfja áhrifs þessa manns í þjóðmálum síðasta aldarfjórðunginn.
Myrkrið grúfir enn yfir. Ég er á útleið á eftir. Til að berjast í bönkum eins Flosi Ólafsson orðaði það um árið. VG er með heilmikla ráðstefnu á Hótel Selfossi á morgun. M.a. messar Jón Hjartarson yfir lýðnum. Haldiði ekki að ég hlaupi þangað? Ekki aldeilis. Ég fer ekki rassgat og mun nýta tímann á betri veg. Við Kimi sendum bestu kveðju úr hinni myrku kyrrð, ykkar Hösmagi.

Flipp.

2009-01-26T09:38:00.000-08:00

Stjórnin féll í dag svo sem augljóst var orðið. Geir nýfarinn frá Bessastöðum. Og fréttamannafundi ÓRG var að ljúka. Yfirklappstýru útrásarvíkinganna.Ég hélt að forsetinn hefði lært eitthvað af þessu hruni.En hann virðist eiga erfitt með að átta sig á verksviði sínu. Hann byrjaði fundinn með því að leggja stjórnmálamönnum línurnar í 4 liðum. Karlálftin er á algjörum villigötum í hlutverki sínu. Enginn efast um að það er í hans hendi að gefa einhverjum stjórnarmyndunarumboð. En það á hann að gera án skilyrða. Ef fyrir liggur að núverandi þingmenn geti komið saman starfhæfri ríksisstjórn fram að kosningum þá er það nóg. Það er ekki forsetans að marka stefnuna í pólitíkinni. Oft hefur gustað um þennan mann. Ég hef nú oft verið honum sammála enda kaus ég hann á sínum tíma. En nú flippaði hann algjörlega. Ég vona að hann gangi samt heill til skógar en ég hef hreinlega efasemdir um það. Er það kannski aldurinn? Hann er ári eldri en ég. Ekki er ég svona. Andskotakornið. Maður verður að vísu drjúgari með sig eftir því sem aldurinn færist yfir. Laxarnir sem ég missti stækka með hverju árinu. Íþróttaafrekin ljóma meira, bæði andleg og líkamleg. En ég er alveg meðvitaður um vald mitt og hlutverk sem almúgamaður. En það virðist mikið skorta á það hjá Ólafi Ragnari sem forseta. Ég er viss um að nú munu bloggheimar loga. Það á allt eftir að verða vitlaust. Ég ætla bara rétt að vona að þetta frumhlaup valdi eins litlum skaða og frekast er unnt. Skaðinn er samt skeður og nú er nagaranum örugglega skemmt. Ósköp verð ég feginn þegar við verðum laus við báða þessa menn þó ólíkum sé saman að jafna. Margt ágætt sem ÓRG hefur gert sem forseti en ansi fátt gott frá hinum. Hvorugur mun segja af sér og nú er bara að bíða spenntur næstu klukkutímana. Ekki aldeilis neinar gúrkur á borðum í dag.

Ég svaf heillengi í morgun eftir útiveru. Dreymdi ýmislegt skemmtilegt, m.a. hitti ég Martin Beck í draumalandinu. Uppáhaldsskáldsagnapersónuna úr sögum Sjövall og Waahlö. Hann var að sjálfsögðu líka á Grand Jeep Cherokee eins og undirrritaður.Það fór vel á með okkur og mér leið ákaflega vel þegar ég vaknaði. Litla svefnpurkan á heimilinu nú mætt hér, lögst á borðið og sofnuð aftur. Bestu óskir frá okkur báðum á þessum merkilega degi, ykkar Hösmagi.

Þorri....

2009-01-24T01:35:00.000-08:00

hófst í gær. Lætin í veðrinu sneyddu alveg framhjá Selfossi. Hér er nú logn og 5 stiga hiti. Varla hægt að kvarta yfir slíku veðri um hávetur. Í dag eru nákvæmlega 3 ár síðan ég eignaðist grænu þrumuna. Ingibjörg systir mín verður löggilt gamalmenni á þessum degi. Sendi henni bestu kveðjur mínar með von um að grásleppan sem ég færði henni í vikunni hafi bragðast vel.Heilmikil tíðindi úr pólitíkinni í gær. Það er áfangasigur að allir flokkarnir sammælist um nýjar þingkosningar. Nú verður tækifæri á að gefa íhaldinu langt frí. Það mun þó taka mörg ár að snúa dæminu við. Margt af því sem þessi flokkur hefur gert okkur, með dyggri aðstoð framsóknarflokksins, verður aldrei bætt. Arfur draugsins og yfirnagarans hvílir eins og óhugnanleg mara yfir öllu hér. Fyrir svona venjulega meðaljóna eins og Hösmaga er lítið annað að gera en bíða og vona hið besta. Nota atkvæðisréttinn rétt svo hægt sé að líta til baka með góðri samvisku. Vona að hnípin þjóð í vanda geti horfst í augu við framtíðina með bjartari augum en áður. Landið er enn á sínum stað. Hér höfum við þraukað í þúsund ár og munum gera áfram. Mig þyrstir ekki í blóð heldur rættlæti. Þó það væri ekki nema snefill af því. Ég er algjörlega ósammála að ekki eigi að leita sökudólga. Ekki eigi að "persónugera" hlutina. Það er hér slatti af mönnum sem eiga heima undir lás og slá. Enn hef ég von um að svo verði. Þessir glæponar vita ekki hvað samviska er. Þeir eru enn að. Og munu verða meðan hægt er. Óstjórn og eftirlitsleysi stjórnvalda síðustu ára hefur orðið til þess að nokkur þúsund milljarðar hafa horfið. Sumt af þessu fé er þó til enn. Falið erlendis. Við skulum leita þess og gera það upptækt. Við þurfum ekki nýtt lýðveldi eða nýja stjórnarskrá. Það nægir að hreinsa ærlega til. Taka upp nýja stefnu og ný gildi. Sigurður Líndal, minn gamli lærifaðir í lagadeildinni sagði einu sinni í fyrirlestri að verstu einræðisríkin væru með flottustu stjórnarskrár veraldar. Þar voru mannréttindi varin í bak og fyrir. Bara marklaus plögg sem voru fólkinu miklu verri en engin.
Aðalfundur stangveiðifélagsins er á föstudaginn kemur. Leiðir hugann að komandi vori og sumri.Þó hart sé á dalnum nú um stundir verða einhver ráð til þess að strengja línur í sumar. Annars væri bara allt ómögulegt. Herconinn bíður átaka. Það er einkar ljúft að hugsa til þess. Við Dýri erum nokkuð slakir. Hann þó enn slakari. Steinsofandi hér á móti mér. Gamli hægindastóllin sem hefur svo lengi verið klóskerpa fór út í bílskúr í gær. Þar var annar samskonar eðalstóll. Dugar örugglega nokkur ár þó hann eigi harðar árásir í vændum. Ég ætla á mótmælafund klukkan eitt. Hann verður friðsamur og fyrst og fremst táknrænn. Bestu kveðjur frá okkur Kimi. ykkar Hösmagi.

Sólargeisli.

2009-01-20T23:39:00.000-08:00

Það er að verða sauðljóst á þessum miðvikudegi.Hiti 2 gráður og fremur kyrrt. Það var gott að vakna í morgun. Stundum er gott að vakna eftir slæmar draumfarir. En í morgun var það af öðrum ástæðum. Það hefur að vísu lítið lagast í þjóðmálunum. Það voru þó kröftug mótmæli gegn stjórnvöldum í gær og mín trú er að þessi volaða ríkisstjórn sé á síðustu metrunum. Feigðarmerkin augljós og stutt í endalokin. Það verður byrjunin á batnandi geðheilsu þjóðarinnar. En það sem gerði það svo gott að vakna í morgun var sólargeisli í sál Hösmaga sem kviknaði við símtal í gærkvöldi.Sólargeisli, sem mun verma hugann og gleður gamlan veiðimann mjög. Sem betur fer gerast stundum góðir hlutir í svartnættinu. Hvað er ljúfara en að vonir rætist? Hösmagi er glaður í sinni í dag, stoltur og alveg bráðhress.
Ég er hugsa um að heimsækja höguðborgina í dag. Koma grænu þrumunni á nýja bílasölu. Það verður hver að sníða sér stakk eftir vexti. Þegar mikið tekjufall verður þarf að grípa til ráðstafana. Lífið heldur alltaf áfram þó á móti blási. Ég hef ósjaldan lofað þessa glæsibifreið í þessum pistlum. Besti og skemmtilegasti vagn sem ég hef eignast á minni ævi. Samt er þetta nú bara bíll. Smá eftirsjá fyrst í stað en ég fer ekki á límingunum við það. Svo er nú gamla ljóðlínan um að alltaf megi fá annað skip og annað föruneyti.
Dýri er nú risinn upp af beði sínum. Liggur í glugganum og gáir til veðurs. Hann var nokkuð drjúgur með sig í gær. Ófétið sem situr um að komast inn um gluggann, ræna mat og angra mitt ljúfa dýr sat hvæsandi á svalaganginum. Bálillur yfir lokuðum glugga. Og Dýri hvæsti hressilega á móti. Ófétið er bara áþján sem við verðum að búa við. Kannski hverfur það eins og ríkisstjórnaráþjánin mun gera fyrr en varir.
Það var aftur fiskiveisla í gærkvöldi. Rauðmagi á borðum. Þetta er feitur fiskur og bráðnar á tungu. Ákaflega bragðgóður og svo eykur hann tilfinninguna um að vorið kemur þrátt fyrir fáráðlingana í ríkisstjórninni. Það kemur að venju og ég hlakka enn meira til þess með sólargeislann í sinni. Við Kimi sendum okkar bestu kveðjur, ykkar Hösmagi.

Hækkandi sól.

2009-01-18T07:11:00.000-08:00

Fjórar vikur liðnar frá vetrarsólstöðum. Glampandi sólskin og hitinn rétt neðan við núllið. Það er værð yfir okkur Dýra. Hann sefur nú inní fataskáp í svefnherberginu en ég rolast hér við tölvuna. Horfði á Silfur Egils sem er líklega það eina sem hægt er að horfa á á þeim bæ í dag. Dagskránni fer aftur með hverri vikunni sem líður. Það var þó nokkuð fyndið að sjá framsókn veittar nábjargirnar í spaugstofunni í gær. Ég varði nú reyndar ríkisútvarpið lengst af. En mér ofbýður orðið sjálfbirgingshátturinn og metnaðarleysið. Kannski er bara öll fjölmiðlun á niðurleið.Ég keypti mér reyndar helgaráskrift að mogganum í gær. Þá fær maður lesbókina og yfirleitt eru nokkuð margar greinar í sunnudagsblaðinu. Svo er auðvelt að hætta við ef þannig snýst. Það er allt við sama á stjórnarheimilinu. Það er skondið að heyra Geira lýsa því yfir að gremjulegast sé að ríkiskerfið skyldi ekki slá á putta stórþjófanna. Í hvaða veröld er þessi hagfræðingur. Hann og fleiri ráðherrar, t.d. Þorgerður, áttu vart orð til að lýsa hneykslun sinni og vanþóknum á þeim sem vöruðu við því sem var yfirvofandi. Þetta þjóðfélag er að verða svo ömurlegt að það er að verða manni áþján að vakna á morgnana. Það er þó jákvæð þróun að mótmæli almennings virðast hafa orðið til þess að æ fleira fólk innan stjórnarflokkanna sjálfra er farið að tala um nauðsyn nýrra kosninga. Hösmagi mótmælti allur við ráðhús Árborgar í gær. Það lá reyndar við að ég léti mig hverfa þegar ég sá Jón forseta á mættan. Þessa sól VG hér á staðnum. Foringjann mikla, sem talar við hirðina eins og 5 ára skólabörn. Hann verður þó nauðugur að víkja úr musterinu á næsta ári. Það væri indælt ef öflugt utanflokkaframboð kæmi fram hér á næsta ári. Fólk með nýja sýn á það sem gera þarf.Þá gæti maður hugsanlega kosið.
Dýri er nú vaknaður og hefur komið sér fyrir hér á borðinu. Malar og vil þrífa skegg fóstra síns. Ég er nú ekki sérlega hrifinn. Það er þó enginn vafi á að þetta er vel meint.
Það voru mikil veisluhöld hér í vikunni. Hrogn, lifur og þorskur. Góð tilbreyting eftir allt kjötátið og svo er þetta hollt og hækkar gáfnavísitöluna. Þorramaturinn er orðinn á stjarnfræðilegu verði. Hann er þó alíslenskur og ótengdur gengi krónunnar. Þó mér þyki sumt af þessu góður matur eru þó takmörk fyrir hvað ég læt bjóða mér. Við Dýri deildum með okkur Eyrarfiski í gær. Kílóverðið yfir 5 þúsundkall. Og nú er að verða lítill sparnaður af að versla í bónus. Þar hefur allt hækkað meira en annarsstaðar. Það vantar kannski fleiri aura í þotur og snekkjur.
Klukkan er 4 og albjart enn. Þrátt fyrir allt hlakka ég til vorsins. Unaðsstunda á bökkum Ölfusár og bjartra nátta. Við rauðliðar sendum vinum okkar bestu kveðjur, ykkar Hösmagi.

Hreinviðri.

2009-01-16T03:35:00.000-08:00

Ágætisveður þó enn sé smásnjór á jörðu og fjallið góða hvítt niður í rætur. Hér gengur lífið sinn gang og við Kimi umberum hvorn annan og rúmlega það. Ég lauk við Berlínaraspirnar í gær. Þetta mun vera vinsælt lesefni og ég var svona nokkurnveginn sáttur við lesturinn. Kannski ekki meiriháttar bókmenntaverk en einhvernveginn heldur höfundurinn manni við efnið. Nú er ég byrjaður á Auschwitz eftir Laurence Rees og síðan kemur Valkyrjuáætlunin um tilræðið við der fuhrer. Nú er hálfur annar mánuður í skattavertíðina og það er bara tilhlökkunarefni. Í gær fékk ég loksins launin frá atvinnuleysistryggingasjóði svo allt virðist hafa skilað sér að lokum.
Ég lét skoða grænu þrumuna í fyrradag. Í fyrsta sinn því nú eru tæp 3 ár frá kaupunum. Hún rann að sjálfsögðu í gegn. Það sem mér þótti þó miður var að nú skreytir blái liturinn númerið. Miðinn fyrir 2011 er sem sagt með hinum heiðbláa íhaldslit. Ég verð að una við það en þetta óprýðir að sjálfsögðu þennan eðalvagn.
Í dag byrjar flokksþing hjá framsókn. Þeir eru voða brattir og segja að lýðurinn flykkist nú undir merkin. Sannleikurinn er þó sá að smölum kandidatanna til formanns hefur tekist að lokka til sín 150 sálir. Flokkurinn er löngu búinn að vera. Ný andlit hreinsa ekki spillinguna af þessu hræi. Hlutverki flokksins sem bændaflokks er löngu lokið og hann mun aldrei ná sér á strik aftur. Sporin hræða og hið andlega krabbamein flokksins verður ekki læknað. Svo kemur íhaldið í mánaðarlokin. Þar logar allt í illdeilum og flokkurinn í reynd þverklofinn. Eftir 18 ár á valdastóli hefur hann skilið við landið í rústum með dyggri aðstoð framsóknar. SF virðist enga burði hafa til að tjónka við hann. Enda vantar bæði hugsjónirnar og viljann. Æ fleiri SF liðar eru að verða þreyttir á ástandinu og það hlýtur að verða þar uppgjör. Ekkert er nauðsynlegra enn alsherjar endurnýjun í íslenskum stjórnmálum. Hikið, fálmið og kuklið eru orðin afar dýrkeypt. Það mun sýna sig að við munum ekki sætta okkur við þetta vonlausa lið áfram. Verst er að það er bæði blint og heyrnarlaust. Sjálfumgleðin verður til þess að það þekkir ekki sinn vitjunartíma. Þetta er þyngra en tárum taki og óhamingjunni verður allt að liði. Úff, hvílík andstyggð.Bestu kveðjur frá okkur Dýra, ykkar Hösmagi.

Kerfið.

2009-01-12T02:52:00.000-08:00

Það er ýmislegt skrítið í kýrhöfðinu. Í fyrsta sinn um mína daga á ég rétt á atvinnuleysisbótum. Ef fram fer sem horfir verður helmingur þjóðarinnar í þessum hópi. Ég fékk einhverja smáaura í byrjun desembermánaðar. Líklega fyrir eins og eina viku í nóvember. Mér var tjáð að ég fengi svo fullar bætur fyrir desember þann 2. janúar. En það gerðist ekkert. Þann 5. var mér sagt að það vantaði skilagrein yfir staðgreiðsluskyld laun í desember. Fékk staðfesta útskrift frá sýsla og nú áttu aurarnir að koma 9. janúar. Öngvir aurar þann daginn. Ég fór aftur á stúfana í morgun. Eftir japl, jaml og fuður kom í ljós að kerfið hafði týnt bleðlinum frá sýslumanni. Ég sótti nýjan. Fékk ádrátt um aura næsta föstudag. Það er farið að jaðra við að ég vilji verða 67 ára á næsta fæðingardegi mínum. Löggilt gamalmenni. En, sem betur fer, verð ég bara hálfsjötugur þá. Það er bagalegt að fá ekki launin sín á réttum tíma. Maður verður að ómerkingi og þarf að greiða vanskilagjöld, dráttarvexti og svoleiðis fínerí. Bara helvítis fokking fokk. Ég ætla að halda ró minni þó þetta sé fúlt.
Nú er veðurspáin gjörbreytt. Frostinu ýtt til hliðar og hitastigið um og ofanvið núllið fram á helgi. Kimi viðraði sig heillengi í morgun en er nú enn lagstur fyrir í gamla körfustólnum. Sem betur fer er hann ómeðvitaður um ríkisstjórnina og aðra óáran hér á skerinu. Þessu blessða skeri, sem mér finnst enn vænt um þrátt fyrir illþýðið sem enn ræður og vini þess, stórþjófana. Einn hinna stórtæku, Bjarni Ármannsson sagðist hafa "skilað" 370 millum. Sannleikurinn er þó sá að Glitnir hafði lýst því yfir að þessar eftirstöðvar milljarðsins sem honum var skammtaður við flóttann úr hinu sökkvandi skipi, yrðu ekki greiddar. Þetta var því aðeins sýndarmennskan ein. Rannsókn á verkum útásarglæponanna mun taka langan tíma. Þegar staðreyndirnar liggja fyrir verður hver einasti eyrir þýfisins horfinn. Það er líka vitað að tætararnir í bönkunum hafa verið á fullu síðan þeir féllu, enda sama liðið við iðju sína áfram. Á þessu bera þau Geiri og Solla fulla ábyrgð.
Ég mun aldrei framar tala fyrir samstarfi vinstra fólks við íhaldið. Það er enn slatti af góðu fólki í SF.Jafnvel örfáir heiðarlegir framsóknarmenn. Umbótasinnað fólk verður að taka höndum saman um hin nýju gildi. Fyrsta verk verður að reka gjörspillta embættismenn. Frysta það af þýfinu sem enn er tiltækt. Þá verður miklu skárra að vera til. Þá kemur sólin upp aftur og vindurinn leikur í laufi. Bestu kveðjur, ykkar Hösmagi.

Ónenna.

2009-01-11T08:08:00.000-08:00

Ég er svo latur í dag að ég nenni varla að draga andann. Kötturinn jafnvel enn verri og liggur alveg flatur í dyngju sinni. Ég horfði þó á silfur Egils og fékk mér flís af reyktu folaldakjöti sem ég sauð í gær. Rúmið er að verða aðaldvalarstaður undirritaðs nú í seinni tíð. Ég les og móki á milli. Bíð eftir að öll vandamál leysist af sjálfu sér. Það er nú varla vænlegt til árangurs. Kannski reyni ég bara að hefja nýtt líf í fyrramálið. Láta verkin tala eins og sumir stjórnmálamenn orða það. Það er þó ekki auðvelt í þessu landi eins og ástandið er. Afar vond stjórnvöld og stjórnsýslan öll morkin í gegn. Hagar sem eru í eigu Baugs hafa nýverið keypt allar BT verslanirnar. Þær voru staðgreiddar með láni frá Elínu Sigúsdóttur sem er núverandi bankastjóri nýja Landsbankans. Fituhlussunni sem var hægri hönd Sigurjóns í gamla bankanum. Fékk góða aðstoð frá Trygga Jónssyni fyrrum aðstoðarforstjóra Baugs. Hann er dæmdur glæpamaður. Þetta er sama siðferðið og áður. Það er alveg vonlaust að breytingar verði í þessum efnum meðan núverandi stjórnvöld sitja. ISG lýsti yfir fullu trausti á Árna Matt í kastljósi nú í vikunni. Mann, sem þverbrotið hefur stjórnsýlulögin. Hann var nýlega sæmdur titlinum skítseyði ársins. Enginn ráðherranna er tilbúin til að axla minnstu ábyrgð á því hvernig komið er. Það eitt og sér er næg ástæða til að krefjast kosninga. Það eru þó litlar líkur á að svo verði í bráð. SF er ekki skárri en íhaldið í sjálfbirgingshættinum og valdasýkinni. Ekki að furða þó margir landsmenn séu daprir og vonlitlir. Þessa dagana er verið að leggja heilbrigðiskerfið í rústir. Það er stefnt á að einkavæða það allt á mettíma. Því stjórnar einn af Vökustaurum íhaldsins. En það heyrist heldur ekki stuna né hósti frá SF. Þessum íhaldsmanni er líka treyst til allra góðra verka. Ef SF stígur ekki á bremsurnar mun fylgi flokksins hrynja. Það er reyndar farið að dala nú þegar. Þetta er bara allt veruleg andstyggð. Framkvæmdavaldið hefur sölsað undir sig öll völd í landinu. Þingmeirihluti íhaldsins og SF fær heilu lagabálkana tilbúna til samþykkta. Það þarf ekki að ræða þá því ráðherrarnir hugsa fyrir öllu. Mín von er þó sú að þetti gervilýðræði muni ekki vara til lengdar. Þjóðin rísi upp og komi þessari óstjórn útí hafsauga. Eða á uppeldisstofnun til endurhæfingar.

Það hefur kólnað og Ingólfsfjall að mestu hvítt. Spáð verulegu frosti næstu daga. Það gæti kostað enn meiri sængurlegu. Ég lauk við síðustu bókina af bókasafninu í dag. Kem þar aftur við á morgun. Ætla m.a. að ná mér í Berlínaraspirnar. Ég hugsa ekki um vond stjórnvöld þegar ég hef sökkt mér niður í lesturinn. Þennan samviskusnauða kvikfénað ógæfunnar sem ekki þekkir sinn vitjunartíma og trónir á skítahaug sinna eigin illverka. Og vinir þessa fénaðar eru kátir. Hvað annað? Með kveðju frá okkur letihaugunum, ykkar Hösmagi.

13ándi.

2009-01-05T23:08:00.000-08:00

Siðasti dagur jóla runninn upp.Þau hafa verið ágæt og liðið hratt. Við Magnús gerðum för okkar í Tangavatn í fyrradag. Veður var prýðisgott en við komum öngulsárir til baka. Höfðum ágæta útiveru en fiskurinn var ekki tilkippilegur.Fáum að reyna okkur aftur síðar án endurgjalds. Við Kimi erum löngu komnir á stjá eftir góðan nætursvefn. Annars er ég farinn að halda að kötturinn sé með svefnsýki því hann dormar meira og minna allan sólarhringinn. Tekur þó vökustundir inná milli. Hann er nú langt kominn með gamla leðurstólinn í stofunni. Tók við þar sem hinn eini og sanni Hösmagi hætti hérna um árið. Beittar klær vinna hægt og hægt eins og dropinn sem holar steininn. Hér verður þrettándagleði í kvöld með stórskotahríð. Það heitir að rota jólin. Sumir fá sér jafnvel í glas. Það verður minna um það á bindindisheimilinu í Ástjörn 7.
Það er enn sama veðurfarið. Sæmilega hlýtt en þungbúið og myrkrið ræður enn ríkjum. Rúmur hálfur mánuður frá vetrarsólstöðum og þetta fer að tosast. Fyrr en varir kemur aftur vor. Vonandi færir það okkur nýja ríkisstjórn. Feigðarmerkin eru augljós á þeirri sem enn situr. Báðir stjórnarflokkarnir eru að klofna í viðamiklum málum. ESB og stóriðjubrjálæðinu. Össur boðar 360.000 tonna álver í Helguvík. Sama þrælslundin að baki og jafnan áður. Rafmagn á broti af því verði sem við greiðum fyrir það. Fimmmilljarða ríkisstyrkur sem startgjald. Þetta er fagra Ísland sem SF boðaði fyrir síðustu kosningar. Sem betur fer eru þó ekki allir í SF ánægðir með þennan yfirblaðrara. Gasprarann, sem fyrir margt löngu grenjaði eftir stuðningi í sjónvarpinu svo hann gæti slegist við íhaldið. Slagsmálin hafa falist í því að þjóna þessu sama íhaldi til borðs og sængur. Gott er að hafa tungur tvær og tala sitt með hvorri segir máltækið. Ráðherrar þessarar ríkisstjórnar eru allir í eigin heimi. Allt öðrum heimi en flest okkar hinna. Það virðist engin vitglóra til í þessu fólki. Við þurfum að gefa þeim öllum frí. Það er til nóg af hæfu fólki til að leysa þá af hólmi. Kveða alla messíasarkomplexa niður eins og draugana í gamla daga. Reyndar finnst mér nauðsynlegt að svona u.þ.b. 90% af núverandi þingmönnum ættu að hætta og leggja eitthvað annað fyrir sig. Það eru þó litlar líkur á að mér verði að ósk minni.Það væri fróðlegt að vita meðalgreind þessa liðs. Hún er örugglega lægri en hinna venjulegu Jóns og Gunnu. Ég ætla að hætta hér. Er að verða pirraður á að tala um þennan ruslaralýð, blindan og heyrnarlausan. Fari hann allur í fúlan rass.

Nú passar að leggja sig aðeins. Ljúka við alkasamfélagið hans Orra Harðarssonar sem ég náði í á bókasafnið í gær. Mjög vel skrifuð bók og margt er þar talað eins og úr mínu eigin hjarta. Síðan held ég áfram með Sjöwall og Wahlöö. Luktar dyr, Maður uppi á þaki og Maðurinn á svölunum. Semsagt gott krúttin mín, ykkar Hösmagi.

2009.

2009-01-04T02:14:00.000-08:00

Þó klukkan sé að ganga ellefu grúfir myrkrið enn yfir. Rigning, en ágætlega hlýtt og Kári hefur sig lítið í frammi. Þetta hefði nú stundum þótt veiðiveður. Ég velti fyrir mér Tangavatnsför. Nægilegt að fara af stað um hádegi og dunda sér við dorg í svona 3 tíma. Við Kimi tókum daginn snemma en erum búnir að leggja okkur aftur. Gott að dorma aðeins eftir að hafa farið í daglega eftirlitsferð. Þrátt fyrir allt leggst þetta ár nokkuð vel í mig. Ég trúi ekki öðru en það verði skárra en síðasta ár. Það þarf að vísu að taka ærlega til. Skipta um vonlausa ríkisstjórn og pilla alla fasistana út úr stjórnkerfinu. Það er afar mikilvægt að hreinsa óværurnar út úr stjórnarráðinu, seðlabankanum, fjármálaráðuneytinu og fjöldamörgum ríkisstofnunum. Þar sitja þær sem fastast og munu gera ef ekki verður gerð alsherjarhreingerning.Við þurfum að breyta lenskunni að embættismenn noti starf sitt fyrst og fremst í eigin þágu. Skari eld að sinni köku í stað þess að þjóna almenningi í þessu landi. Þeir eru flestallir ráðnir eftir pólitískum skoðunum sínum án tillits til hæfileika sinna.Ég vona að hugarfarsbreyting verði meðal nægilega margra til að þetta megi gerast. Það er þó augljóst að langt er í land. T.d. sagði Geir í áramótaávarpinu þegar hann hugleiddi stöðuna að hafi honum orðið á mistök þá þætti honum það leitt. Raunveruleikafirringin er algjör. Það sama gildir um alla aðra ráðherra. Þeir munu stritast við að sitja á meðan sætt er. Íhaldið hefur ráðið í meira en 17 ár. Stuðst við auðmjúkt hækjulið framsóknar lengst af og nú við SF sem sífellt er til í að láta hugsjónir lönd og leið fyrir völd og þægilega stóla. Reyndar er varla hægt að tala um hugsjónir. Fagurgalinn fyrir kosningar hefur reynst hjómið eitt. Innan flokksins er þó enn talsvert af ágætu fólki sem mundi sóma sér vel í nýrri umbótasinnaðri vinstri stjórn. Það er sannarlega tími til kominn að þjóðin vakni.

Nú er ég búinn að tala við frúna á Galtalæk. Þar er hið ljúfasta veður eins og hér, snjólaust og fiskur í vatninu. Það þarf varla meiri brýningu. Græna þruman í bílskúrnum ásamt Herconinum og annars sem til þarf. Ég held að þetta sé bara alveg rakið. Raikonen verður í húsvarðarhlutverkinu á meðan. Við sendum bestu kveðjur til vina og vandamanna, ykkar Hösmagi.

Gamla árið senn á enda.

2008-12-31T01:25:00.000-08:00

Það er hvít jörð á þessum síðasta degi ársins. Árs erfiðleika af völdum útrásarvíkinga og illrar ríkisstjórnar. Ef nýja árið færir okkur ekki ný stjórnvöld og þjófarnir fá ekki makleg málagjöld er ekkert réttlæti til. Þrásetu forstjóra FME og seðlabankastjóranna verður að linna. Ég fékk tölvupóst á ensku í gær. Þar er DO kallaður the biggest asshole in Iceland. Það er laukrétt. Annar af upphafsmönnum einkavæðingarinnar sem hefur leitt þjóðina á þær slóðir sem hún er nú. Mér dettur Rimbaud í hug. Ríkisstjórnin er kvikfénaður ógæfunnar. Við verðum að losna við þessa lygamerði sem einungis gera axarsköft. Flest af aulahætti en önnur meðvituð. Hugsa um eigið skinn framar öllu öðru. Við skulum festa allt þetta lið upp í næstu kosningum. Láta það dingla öðrum til varnaðar.

Ég hef ekki haft mig í veiðitúr. Hugurinn er hjá Ingibjörgu systur minni.Freysteinn mágur minn lést í fyrradag eftir mikil og erfið veikindi. Ég hef áður hér í þessum pistlum mínum líst aðdáun minni á þessum manni. Fluggreindur, góður heimilisfaðir og sérstaklega góður drengur. Ég hef einnig dáðst að æðruleysi hans sem mér er að vissu leyti óskiljanlegt. Og reyndar gildir það sama um systur mína. Það eru ekki allir sem stæðu þau áföll af sér sem þau hafa orðið fyrir um sína daga. Eftir lifir minningin um góð kynni og vináttu okkar mágs míns, sem aldrei bar skugga á í þá tæpu hálfu öld sem við þekktumst. Líf okkar hinna heldur áfram og ég vona að hið góða verði nálægt systur minni og einkadótturinni.

Það er kyrrð og rólegheit hjá okkur kisa mínum. Þó jörð hafi hvítnað er indælisveður.Ég ætla að bregða út af vananum í mat kvöldsins. Það verður lax á borðum. Það verður ljúft eftir óhemjukjötát síðustu viku. Pækillæri, hangisauður og svo svín hjá IÞM í fyrradag. Allt mjög ljúffengt. Ég strengi nú varla mörg áramótaheit. Þrátt fyrir breytta tíma er ég bjartsýnn sem fyrr. Hlakka til birtunnar og hinnar nóttlausu voraldar veraldar á komandi vori. Útiveru og veiði. Samveru við fólkið mitt sem mér er svo kært. Við Dýri sendum því öllu, ásamt vinum, okkar albestu kveðjur með ósk um farsæld til framtíðar, ykkar Hösmagi.

Morðæði.

2008-12-29T03:09:00.000-08:00

Enn eru ísraelsmenn byrjaðir. Aðferðirnar eru svipaðar og þýsku nasistarnir notuðu til að ná árangri. Ef einn var sekur af 100 sem þeir stilltu upp við vegginn skutu þeir alla. Voru þá vissir um að hinum seka hafði verið refsað og hinir 99 skiptu engu. Megnið af því fólki sem síonistarnir eru nú að drepa eru venjulegir saklausir borgarar. Þetta er gert í krafti stuðningsins frá USA. Þar hafa gyðingar löngum haft tögl og hagldir í fjármálalífi, hergagnaiðnaði og reyndar í stjórnmálum einnig. Hamas samtökin eru nú kannski ekki nein guðslömb. Ekkert réttlætir þó framferði ísraelsmanna. Þeim er nákvæmlega sama um viðbrögð heimsins. Þeir vita sem er að þeir geta farið sínu fram. SÞ geta ekkert. Kanarnir ráða þar öllu sem þeir vilja. Við verðum að horfa uppá morðæði þessarar þjóðar. Enginn tekur heldur mark á okkur frekar en fyrri daginn þó ISG haldi það ef til vill. Konan sem raunverulega hélt að við ættum mökuleika á setu í öryggisráðinu og eyddi mörg hundruð milljónum í það vonlausa verkefni. Peningum og tíma sem betur hefði verið varið til gagnlegri hluta.

Í gær lauk ég við ævisögu Dags Sigurðarsonar. Ég gef þessari bók ekki háa einkunn. Hálf sundurlaus lesning og maður er ekki miklu nær um þennan þekkta íslending en áður.

Við kisi erum hér í miklum rólegheitum. Enn blíðviðri og við báðir búnir að viðra okkur. Af sérstökum ástæðum sló ég Tangavatnsför á frest í gær. Hef þó alls ekki afskrifað veiðitúr. Spáin enn ágæt þó heldur fari veður kólnandi. Bestu kveðjur frá okkur fósturfeðgum, ykkar Hösmagi.

Letilíf.

2008-12-26T04:26:00.000-08:00

Við Kimi höfum slappað vel af það sem af er jólum. Vöknuðum þó nokkuð snemma. Hitinn við frostmarkið, grá jörð og blankalogn. Kimi dvaldi utandyra á annan klukkutíma og undirritaður fór í eftirlitsferð um gamla þorpið sitt sem nú er titlað bær. Þegar heim kom lagðist ég flatur í beð minn og lauk við brunabílinn sem týndist. Þá var hæfilegt að leggja sig aftur. Draumalandið kom strax til mín. Gekk svo frá minniháttar uppvaski og þaðan lá leiðin aftur til sængur með Rimbaud. Eftir lestur u.þ.b. 4 hluta kversins lognaðist ég enn útaf. Lauk við að ryksuga hornin sem útundan höfðu orðið og Kimi lagði niður skott sitt og flýði fram á kontórinn. Aldrei hrifinn af óhljóðunum í þessu apparati. Hann situr í glugganum og horfir heimspekilega á Ingólfsfjall. Þar eru skaflar í giljum en stórir flekkir auðir. Jólasólin er komin upp fyrir nokkru og sendir geisla sína á þetta tignarlega fjall sem blasir við hér úr norðurglugganum.

Ég hef stundum sagt að við breytum ekki því sem liðið er. Kraftaverkaliðið í stjórn landsins getur það ekki einu sinni. Þar er líka fremur lítill áhugi á að reyna að gera eitthvað vitrænt eftir öll afglöpin. ISG ætlar ekki að skipta út ráðherrum af því íhaldið ætlar ekki að gera það. Það sýnir vel hvað SF er límd föst við þennan flokk. Þetta ættu allir sannir vinstri menn sem glæptust á að kjósa SF á alröngum forsendum að athuga vel. Því miður trúðu of margir á fagurgalann fyrir síðustu kosningar. SF hefur ekki reynst hótinu skárri en gamli alþýðuflokkurinn sem var hækja íhaldsins öll " viðreisnarárin". Það þarf mikla endurnýjun í stjórnmálin. Það gildir raunar um alla flokkana. Hlutverki framsóknar er löngu lokið. Það á bara eftir að róta yfir þetta hræ. Frjálslyndi flokkurinn er klofinn í marga smáflokka. Hann hefur reyndar aldrei gegnt neinu hlutverki í stjórnmálum landsins og á líka eftir að hverfa.Þegar búið verður að taka ærlega til í SF verður kannski von til að hægt verði að mynda vinstri velferðarstjórn í þessu landi. Íhaldið úti í frostinu og ný gildi sett í öndvegi.Græðginni hent á haugana og hinn smái tekinn fram fyrir þann stóra og sterka. Þá munum við ekki þola yfirnagarann í musterinu. Þá verður tekið til í FME. Þá verður miklu betra að lifa hér en áður. Þetta er engin draumsýn. Undiraldan er til staðar. Gremjan og fyrirlitningin á glæpahyskinu. Á stjórnvöldum sem hafa staðið aðgerðalaus. Láta hyskið rannsaka sjálft sig og ræður stjórnendur gömlu bankanna sem yfirmenn í nýju ríkisbönkunum. Stjórnvöld eru með allt niðrum sig. Berstrípuð eins og keisarinn forðum. Ég vona að eitthvað mikið og gott gerist á næsta ári. Nýr fallegur fáni rísi og landinu verði stjórnað með hag almennings að leiðarljósi. Þó nú sé útlitið ekki mjög bjart ætla ég að láta bjartsýnina hafa völdin eins og áður. Vorið kemur enn einu sinni á næsta ári.Útivera,lax og urriði.Langar bjartar nætur. Við Kimi sendum öllum vinum og vandamönnum bestu óskir um farsæld á nýju ári, ykkar Hösmagi.

Jóladagur.

2008-12-25T01:52:00.000-08:00

Jóladagur runninn upp. Jörð hefur aftur hvítnað í nótt og það hlýtur að gleðja þá sem vilja hvít jól. Hiti rúm 2 stig og gjóla. Langt síðan Hösmagi hefur sofið fram á dag. Við Kimi rumskuðum ekki fyrr en klukkan var farin að ganga tíu. Morgundöggin smakkast vel en myrkrið hefur enn völdin. Kisi var ósköp kátur þegar ég renndi í hlað um miðnætti í gær. Hann fékk 3 jólagjafir. Herta ýsubita frá Ingu systur minni. Wiskas kræsingar frá hinum aldna ketti Loka, sem er köttur Helgu Soffíu. Hann er nú 17 ára gamall. Biksvartur og afar virðulegur. Ég gaf honum herra Gorm. Einhverskonar tígrisskepnu dinglandi í spotta. Kimi er hálfsmeykur við kauða en samt afar forvitinn. Gærdagurinn var ljúfur og góður. Veðrið indælt. Ég var kominn til höfuðborgarinnar um eittleytið. Grjónagrautur í Hjallaseli hjá foreldrum Helgu Soffíu. Síðan lá leiðin í Fossvogskirkjugarð, til Ingu systur á Kársnesbraut, Greniás til Magga, Boggu og strákanna og svo til Beggu og fjölskyldu í Kjarrmóum. Þar undi ég glaður við mitt frameftir kvöldi. Frábærlega góður matur og ekki spillti samveran við dóttur, tengdason, afastelpu og lambakónginn nafna minn. Það er vandfundinn maður sem er jafn geðljúfur og sá piltur. Ekki spillti það heldur að hann hafði fósturson sinn með sér. Köttinn Júlíus Cesar. Blanda af norskum skógarketti, persa og íslendingi. Með ákaflega virðilegt skott sem stendur jafnan þráðbeint uppí loftið. Ég er því eiginlega orðinn langafi nú þegar. Heimferðin gekk greiðlega. Marauður vegur og indælis veður. Ég las jólapóstinn, naut návista við Kimi og skreið síðan undir sæng mína og hélt áfram með brunabílinn sem hvarf eftir Sjöwall og Wahlöö. Eftir nokkrar síður var unaðslegt að svífa inní draumalandið. Það verða rólegheit í dag. Meiri bóklestur og sauðahangikjöt með viðeigandi meðlæti. Kannski tek ég eins og einn rúnt á grænu þrumunni. Tilveran ljúf og góð. Við Rauðskott sendum jólaóskir til allra vina okkar og vonum að þið njótið dagsins, ykkar Hösmagi.

Dagur heilags Þorláks.

2008-12-23T01:40:00.000-08:00

Þorláksmessa. Kári er glettinn utandyra en inni er hlýtt og notalegt. Ilminn af pækillærinu í ofninum leggur hingað fram. Hlákan kætir Hösmaga þó hann geti nú unnt fólki þess að eitthvað verði eftir af snjónum um jólin. Þetta er ágætisveður en samkvæmt spám á að koma nýr hvellur þegar líður á daginn. Ég viðraði mig í morgun og það var indælt að teyga að sér hreina loftið. Bara smásnjórönd eftir á svölunum. Sagan endurtekur sig. Sá sem setti snjóinn þar er nú langt kominn með að fjarlægja hann. Við félagar sváfum mjög vel og sá yngri lét fóstra sinn alveg í friði. Hér hafa klútar verið á lofti. Ryk og skúm orðið fyrir stórárásum. Frekari umbun fæst þegar skúringum lýkur. Svo kemur nýr og ljúfur ilmur í hýbýlin þegar húsvíska sauðalærið fer í pottinn að áliðnum degi. Aldrei þessu vant hljómar rás 1 í útvarpinu. Jólakveðjurnar minna á forn jól. Þá var gamla gufan það eina sem heyrðist og dugði ágætlega. Ég ætla að gefa henni meira rúm framvegis en undanfarin ár. Miklu meira af menningarlegu efni þar en annarsstaðar.

Það er létt yfir gömlum veiðref í dag. Rólyndi hugans hefur völdin. Dagurinn í dag er dagurinn hans. Hið slæma úti í kuldanum og það er bara tilhlökkun til komandi daga. Svo verður fylgst með veðurspám fyrir dagana milli jóla og nýárs. Herconinn er á sínum stað og hefði ekkert á móti strengdum línum. Við Kimi sendum öllu góðu fólki okkar bestu kveðjur, ykkar Hösmagi.